Түркийәдики уйғур оқуғучилар норуз байримида уйғурлар вәзийитини аңлатти

Ихтиярий мухбиримиз әркин тарим
2019-03-22
Елхәт
Пикир
Share
Принт
Түркийәниң улудағ университетида өткүзүлгән норуз паалийитидин бир көрүнүш. 2019-Йили 21-март. Түркийә.
Түркийәниң улудағ университетида өткүзүлгән норуз паалийитидин бир көрүнүш. 2019-Йили 21-март. Түркийә.
RFA/Erkin Tarim

3-Айниң 21-күни күн билән түн тәңшәлгән күн болуп, бу алаһидә күн пүткүл түркий милләтләрниң әнәниви норуз байримидур.

Бу йилму түркийәниң һәрқайси шәһәрлиридә норуз байримини қутлаш паалийәтлири өткүзүлди. Бу паалийәткә уйғур оқуғучиларму актип қатнашти. Түркийәниң шималиға җайлашқан кастамону шәһиридики кастамону университетида оқуватқан уйғур оқуғучилар билән түркийәниң ғәрбигә җайлашқан бурса шәһиридики улудағ университетида оқуватқан уйғур оқуғучилар норуз паалийәтлиригә актиплиқ билән қатнашқан. 
21-Март күнидики норуз мурасимида сөз қилған кастамону университетиниң профессори доктор сейит айдин әпәнди норузниң шәрқий түркистандин америка қитәсигичә болған даиридики пүтүн түркий милләтләр тәбрикләйдиған миллий байрам икәнликини тәкитлигән. У норуз байриминиң пәқәт бу йәрләрдила әмәс, бәлки шәрқий түркистандин оттура асияғичә, түркийәдин сибирийәгичә, моңғулийәдин америкағичә йеңи бир ойғинишни ипадиләйдиғанлиқини билдүргән. У мундақ дегән: «биз үчүн норуз пәқәтла баһар мәвсумниң йетип кәлгәнликиниң бәлгиси әмәс. Норуз байрими миң йилдин бери тирилишни, бәрикәтни, иттипақлиқни вә қериндашлиқни ипадиләп кәлмәктә. Уйғурлар гәрчә мустәқиллиқини қолға кәлтүрәлмигән болсиму, әмма йеқин кәлгүсидә чоқум мустәқил болалайдиғанлиқиға ишинимән.»

Мәзкур университетта оқуйдиған уйғур оқуғучи сүбһинур өмәр зияритимизни қобул қилип, кастамону университетида өткүзүлгән норуз байрими һәққидә мәлумат бәрди.

Норуз паалийитигә мәзкур университетниң оқутқучи вә оқуғучилири, шу җүмлидин оттура асия түркий җумһурийәтлири, сабиқ югуславийә парчиланғандин кейин мустәқил болған дөләтләрдин вә әрәб дөләтлиридин түркийәгә келип оқуватқан оқуғучилар иштирак қилған. Уйғурларға вакалитән кастамону университетида оқуватқан уйғур оқуғучилар ай-юлтузлуқ көк байрақларни көтүрүп параттин өткән вә әң муһими мәхсус «уйғур чедири» ечип уйғурларниң парлақ мәдәнийити, өрп-адити, кийим-кечәклири вә һазирқи еғир вәзийитини тонуштурған. 

Паалийәт җәрянида телефон зияритимизни қобул қилған түрк тили вә әдәбияти кәспиниң оқуғучиси сүбһинур өмәр кастамону университетидики норуз паалийити һәққидә толуқлима бәрди. 

Сүбһинур өмәрниң билдүрүшичә, кастамону университетидики норуз паалийитигә кастамону шәһириниң башлиқи вә мәктәпниң мудириму қатнашқан болуп, улар ечилиш мурасими ахирлашқандин кейин уйғур чедирини айланған вә наһайити яхши инкас қайтурған икән. 

Кастамону университетидин башқа түркийәниң ғәрбигә җайлашқан бурса вилайитидики улудағ университетидиму норуз паалийити өткүзүлгән болуп, паалийәткә мәзкур университетта оқуватқан 120 әтрапида уйғур оқуғучилар қатнашқан. Уйғур оқуғучилар вәкили абдулқадир бу һәқтә мәлумат бәрди. 

Улудағ университети диний илимләр кәспиниң оқуғучиси турсунгүл ханим бу қетимқи норуз паалийитидә уйғурларниң һазирқи еғир вәзийитини тонутупла қалмастин, бәлки йәнә уйғур мәдәнийитиниму тонуштурғанлиқини баян қилди. 

Биз игилигән мәлуматларға асасланғанда түркийәниң башқа университетлиридиму норуз паалийити өткүзүлгән болуп, бу паалийәтләргә уйғур оқуғучиларму қатнашқан.

Пикирләр (0)
Share
Толуқ бәт