Türkiyediki Uyghur oqughuchilar noruz bayrimida Uyghurlar weziyitini anglatti

Ixtiyariy muxbirimiz erkin tarim
2019-03-22
Élxet
Pikir
Share
Print
Türkiyening uludagh uniwérsitétida ötküzülgen noruz pa'aliyitidin bir körünüsh. 2019-Yili 21-mart. Türkiye.
Türkiyening uludagh uniwérsitétida ötküzülgen noruz pa'aliyitidin bir körünüsh. 2019-Yili 21-mart. Türkiye.
RFA/Erkin Tarim

3-Ayning 21-küni kün bilen tün tengshelgen kün bolup, bu alahide kün pütkül türkiy milletlerning en'eniwi noruz bayrimidur.

Bu yilmu türkiyening herqaysi sheherliride noruz bayrimini qutlash pa'aliyetliri ötküzüldi. Bu pa'aliyetke Uyghur oqughuchilarmu aktip qatnashti. Türkiyening shimaligha jaylashqan kastamonu shehiridiki kastamonu uniwérsitétida oquwatqan Uyghur oqughuchilar bilen türkiyening gherbige jaylashqan bursa shehiridiki uludagh uniwérsitétida oquwatqan Uyghur oqughuchilar noruz pa'aliyetlirige aktipliq bilen qatnashqan. 
21-Mart künidiki noruz murasimida söz qilghan kastamonu uniwérsitétining proféssori doktor séyit aydin ependi noruzning sherqiy türkistandin amérika qit'esigiche bolghan da'iridiki pütün türkiy milletler tebrikleydighan milliy bayram ikenlikini tekitligen. U noruz bayrimining peqet bu yerlerdila emes, belki sherqiy türkistandin ottura asiyaghiche, türkiyedin sibiriyegiche, mongghuliyedin amérikaghiche yéngi bir oyghinishni ipadileydighanliqini bildürgen. U mundaq dégen: "Biz üchün noruz peqetla bahar mewsumning yétip kelgenlikining belgisi emes. Noruz bayrimi ming yildin béri tirilishni, beriketni, ittipaqliqni we qérindashliqni ipadilep kelmekte. Uyghurlar gerche musteqilliqini qolgha keltürelmigen bolsimu, emma yéqin kelgüside choqum musteqil bolalaydighanliqigha ishinimen."

Mezkur uniwérsitétta oquydighan Uyghur oqughuchi sübhinur ömer ziyaritimizni qobul qilip, kastamonu uniwérsitétida ötküzülgen noruz bayrimi heqqide melumat berdi.

Noruz pa'aliyitige mezkur uniwérsitétning oqutquchi we oqughuchiliri, shu jümlidin ottura asiya türkiy jumhuriyetliri, sabiq yuguslawiye parchilan'ghandin kéyin musteqil bolghan döletlerdin we ereb döletliridin türkiyege kélip oquwatqan oqughuchilar ishtirak qilghan. Uyghurlargha wakaliten kastamonu uniwérsitétida oquwatqan Uyghur oqughuchilar ay-yultuzluq kök bayraqlarni kötürüp parattin ötken we eng muhimi mexsus "Uyghur chédiri" échip Uyghurlarning parlaq medeniyiti, örp-aditi, kiyim-kéchekliri we hazirqi éghir weziyitini tonushturghan. 

Pa'aliyet jeryanida téléfon ziyaritimizni qobul qilghan türk tili we edebiyati kespining oqughuchisi sübhinur ömer kastamonu uniwérsitétidiki noruz pa'aliyiti heqqide toluqlima berdi. 

Sübhinur ömerning bildürüshiche, kastamonu uniwérsitétidiki noruz pa'aliyitige kastamonu shehirining bashliqi we mektepning mudirimu qatnashqan bolup, ular échilish murasimi axirlashqandin kéyin Uyghur chédirini aylan'ghan we nahayiti yaxshi inkas qayturghan iken. 

Kastamonu uniwérsitétidin bashqa türkiyening gherbige jaylashqan bursa wilayitidiki uludagh uniwérsitétidimu noruz pa'aliyiti ötküzülgen bolup, pa'aliyetke mezkur uniwérsitétta oquwatqan 120 etrapida Uyghur oqughuchilar qatnashqan. Uyghur oqughuchilar wekili abdulqadir bu heqte melumat berdi. 

Uludagh uniwérsitéti diniy ilimler kespining oqughuchisi tursun'gül xanim bu qétimqi noruz pa'aliyitide Uyghurlarning hazirqi éghir weziyitini tonutupla qalmastin, belki yene Uyghur medeniyitinimu tonushturghanliqini bayan qildi. 

Biz igiligen melumatlargha asaslan'ghanda türkiyening bashqa uniwérsitétliridimu noruz pa'aliyiti ötküzülgen bolup, bu pa'aliyetlerge Uyghur oqughuchilarmu qatnashqan.

Toluq bet