Sulayman soylu: 10 mingdin artuq qérindishimizni girazhdanliqqa qobul qilduq, yene qobul qilish aldida

Istanbuldiki Uyghurlarning héytlishish pa'aliyitide ministir solayman soylugha kökbayrak we ton chapan doppa hediye qilindi. 2023-Yili aprél, turkiye.

23-Aprél küni istanbulda xelq'ara sherqiy türkistan teshkilatliri birlikining uyushturushi bilen ötküzülgen héytlishish pa'aliyitige qatnashqan türkiye jumhuriyiti ichki ishlar ministiri sulayman soylu Uyghurlargha söz qilip, 10 mingdin artuq Uyghurni türkiye girazhdanliqigha qobul qilghanliqini bildürdi.

Ministir sulayman soylu, türkiye jumhuriyiti prézidénti rejep tayyp erdughanning Uyghurlargha salam yollighanliqini we uning ikki yil ilgiri Uyghurlarni türkiye puqraliqigha qobul qilish üchün mexsus buyruq chiqarghanliqini bildürdi. U, mundaq dédi: “Uyghurlarni tunji kelgenlerdin bashlap türkiye girazhdanliqigha qobul qilishni bashliduq we hazirghiche 10 mingdin artuq qérindishimizni türkiye girazhdanliqigha qobul qilduq, üch kün ilgiri 2000 qérindishimizning girazhdanliqqa ötüsh telipige imza qoyup jumhuriyet prézidénti erdoghan'gha yolliduq, hörmetlik prézidént erdughanning testiqlishi we imza qoyushi bilen qisqa waqit ichide ularmu türkiye girazhdanliqigha qobul bolidu, hazir qolimizda yene 3500 qérindishimizning arxipi imza qoyushqa teyyar boldi, ularning arxiplirini eng yéqin arida yollaymiz we ularmu qisqa waqit ichide türkiye jumhuriyiti girazhdani bolidu, eslide ular tughulushtinla türkiye jumhuriyitining girazhdani hésablinidu”.

Sulayman soylu özining ichki ishlar ministiriliq wezipisini ötesh jeryanida “Sherqiy türkistanliqlarning yénida bolup kelgenliki” ni ipadilidi we “Deslepte Uyghur ösmürlerning qandaq oqushi kérekliki üchün hemmimiz teng köngül bölduq”, dep qoshumche qildi.

U sözide yene Uyghurlarning iqamet, yeni türkiyede turush ruxset kartisini hel qilghanliqini, héchkimni iqametsiz tashlap qoymighanliqini bildürdi.

RFA/Arslan

Ministir sulayman soylu sözide yene 2-ayda türkiyede yüz bergen yer tewresh apitide Uyghurlarning apet yüz bergen rayon'gha bérip yardem qilghanliqini xatiriletti we teshekkür bildürüp mundaq dédi: “Allah silerdin razi bolsun, qérindashliqning, wapadarliqning, qiyin künlerde qol uzitishning qandaq bolidighanliqini her waqit körsitip kéliwatqaninglargha oxshash u yerde buni yene bir qétim otturigha qoydunglar”.

Sulayman soylu, prézidént rejep tayyp erdughanning Uyghurlargha ige chiqish toghrisida buyruq bergenlikini tilgha élip mundaq dédi: “Uyghur qérindashlirimiz bilen nechche yildin buyan yéqin munasiwet qurup kéliwatimiz, 6 yildin buyan ichki ishlar ministiriliq wezipisi ötewatimen, rejep tayyp erdoghan manga, sulayman sendin birinchi telipim, méning sherqiy türkistanliq qérindashlirimni yalghuz tashlap qoymaysen, dégenidi. Prézidéntimizning bu buyruqini men héch qachan isimdin chiqarmidim, bu yerde eng zor, eng qiyinchiliq künlerde, bizni eng éghir bésimgha uchratqan künlerdimu boynimizni egmiduq. Pütün qérindashlirimizgha yardimini bergen türkiyening ‛türkiye yüz yili‚ yalghuz 780 ming kwadrat kilométir bilenla cheklinip qalmaydu belki ‛türkiye yüz yili‚ (2023-2123) pütün türk dunyasining yüz yili bolidu”.

Héyitlishish pa'aliyitide söz qilghan xelq'ara sherqiy türkistan teshkilatliri birliki re'isi hidayetullah oghuzxan, Uyghurlarning roza héytini tebriklesh bilen birge, bu héyitlishish pa'aliyitining ehmiyiti toghrisida toxtilip mundaq dédi: “Gerche qelbimiz qan yighlawatqan we perishan halda bolghan bolsimu, lékin biz chet'eldiki ewladlirimizgha ümid bexsh étish, öz-ara dostluq we qérindashliqimizni kücheytish, muhajiret dunyasidiki sherqiy türkistan jama'etchilikini janliq tutushni körsitiwatimiz. Biz ümidsizlikke dochar bolmasliq, pisxikining buzulmasliqi, ittipaqsizliqning ewj élip ketmesliki üchün, millitimizning rohiy keypiyatini yaxshilash we mewjudiyitimizni saqlash yolida tirishchanliq körsitiwatimiz”.

Héyitlishish pa'aliyitide söz qilghan jama'et erbabi abduqadir yapchan, Uyghurlarning ach-yalingach qalsimu yashiyalaydighanliqini, biraq wetensiz yashiyalmaydighanliqini tilgha élip: “Biz her qandaq bedel tüleshke razi emma zémindin waz kétishke qet'iy razi emes”, dep tekitlidi.

Pa'aliyet jeryanida Uyghur yash naxshichilardin amir qilich we xeyrinnisa qilich qatarliq sen'etchiler sehnige chiqip “Weten” namliq bir qanche parche naxsha orundap yighin ehlining qizghin alqishqa érishti.

Uningdin bashqa yene warisjan isimlik Uyghur yash “Weten hesriti” témisidiki nesir shé'irni oqudi, péshqedem muhajirlardin abdushükür hajim merhum sha'ir abduréhim ötkürning “Iz” namliq shé'irni jarangliq oqup yighin ehlining qizghin alqishqa érishti.

Axirida ösmürlerge bayramliq pul tarqitish bilen pa'aliyet xushal keypiyat ichide axirlashti.