Парламент әзаси тәйис ротен: “уйғур қирғинчилиқини тохтитиш үчүн қолимиздин кәлгәнни қилимиз”

Ихтиярий мухбиримиз әркин тарим
2022.11.01
Share on WhatsApp
Share on WhatsApp
gollandiyede-uyghur-awazi-korgezmisi Голландийәниң амстердам шәһиридики “дәбалиә” тиятирханисиниң алдида өткүзүлгән “уйғурларниң авази” намидики паалийәттин көрүнүш. 2022-Йили 25-өктәбир.
RFA/Erkin Tarim

25-Өктәбир башланған голландийәниң амстердам шәһиридики “дәбалиә” тиятирханисидики “уйғурларниң авази” намлиқ паалийәт 2-ноябирғичә давамлишиду.

Голландийәликләр уюштурған мәзкур паалийәткә голландийәлик сиясәтчи, ишчилар партийәсиниң явропа парламенти әзаси тәйис ротер әпәнди билән амстердам шәһириниң сабиқ башлиқи җоб коһән әпәнди қатарлиқлар иштирак қилған. Тәйис ротен әпәнди “уйғур авази” көргәзмисини көргәндин кейин туйғулирини баян қилип, уйғурларға һесдашлиқ қилидиғанлиқини вә уйғур қирғинчилиқини тохтитиш үчүн қолидин кәлгәнни қилидиғанлиқини ейтқан.

Тиятирханиниң алдиға чедир қурулған болуп, чедирниң ичидики екранда “шинҗаң сақчи һөҗҗәтлири” дики рәсимләр чиқип туридикән. Униңда лагер шаһитлириниң сөзлириму чиқип туридикән. Бу чедирниң сиртиға голландийәликләр өзлири лайиһәлигән икки чоң лозунка есилған болуп, мәзкур лозункиниң үстигә голланд ( недерланд) тилида “уйғурларниң авази” дегән хәт йезилған. Голландийәдики лагер шаһити өмәрбәк алий голландийәликләрниң бу паалийәтни өткүзүштики мәқситиниң хитайниң уйғурларға елип бериватқан “ирқий қирғинчилиқи” ни испатлар билән көрситиш арқилиқ голландийә һөкүмитини хитайға қарши конкрет тәдбир елишқа қисташтин ибарәт икәнликини илгири сүрди.

Голландийәниң амстердам шәһиридики “дәбалиә” тиятирханисиниң алдида өткүзүлгән “уйғурларниң авази” намидики паалийәттә голландийәлик сиясәтчи, ишчилар партийәсиниң явропа парламенти әзаси тейис ротен(Thijs Reuten) уйғур паалийәтчи абдуреһим ғени билән. 2022-Йили 25-өктәбир.
Голландийәниң амстердам шәһиридики “дәбалиә” тиятирханисиниң алдида өткүзүлгән “уйғурларниң авази” намидики паалийәттә голландийәлик сиясәтчи, ишчилар партийәсиниң явропа парламенти әзаси тейис ротен(Thijs Reuten) уйғур паалийәтчи абдуреһим ғени билән. 2022-Йили 25-өктәбир.
RFA/Erkin Tarim

10-Айниң 25-күни өткүзүлгән ечилиш мурасимида амстердам шәһириниң сабиқ башлиқи җоб коһән әпәнди билән мәзкур паалийәтни уюштурған “дәбалиә” ниң мәсуллири ечилиш нутқи сөзләп, уйғурлар тоғрисида тохталған. Мәзкур көргәзмидә көрситилгән испатлар, болупму кәчүрүм тәшкилати елан қилған рәсимләр уйғурларниң һазирқи еғир вәзийитини наһайити яхши йорутуп бәргән болуп, буларни көргәнләр юқири баһа бәргән. Бу һәқтә зияритимизни қобул қилған уйғур паалийәтчи абдуреһим ғени әпәнди буниң голландийәликләр тәрипидин уюштурулған чоң бир паалийәт һесаблинидиғанлиқини, хәлқниң күчлүк диққитини тартиватқанлиқини илгири сүрди.

Голландийәдики лагер шаһити қәлбинур сидиқ ханим соалимизға җаваб берип мундақ деди: “голландийә дөлити америка вә канададин кейинла йәни-2021йили-2айниң-25күнидә хитайниң уйғурларға елип бериватқан зулум сияситини ‛ирқий қирғинчилиқ вә инсанийәткә қарши җинайәт‛дәп елан қилған үчинчи дөләт һесаблиниду. Мушундақ бир дөләттә амстердамниң мәркизидә, дөләт ичи вә сиртидин кәлгән саяһәтчиләр әң көп келидиған җайда, ‛уйғурларниң авази‚ намида бундақ бир көргәзмини ечиш уйғурларниң еғир вәзийитини голландийәликләргә вә чәтәлликләргә аңлитишта әһмийити наһайити зор дәп қараймән. Чүнки бу тиятирханиға киридиғанлар наһайити көп икән. Тиятирханиниң ичи вә сиртиға уйғур қирғинчилиқи һәққидә лозункилар есилған. Һәмдә ичидә екранда голландийә тилида чүшәндүрүлүп турған болғачқа буниңға қизиқидиғанлар наһайити көп икән. Шуңа буниң тәсир күчи наһайити зор болиду. Мән голландийә һөкүмитиниңму америкаға охшаш хитайға қарши қанун чиқирип, конкрет тәдбир елишини үмид қилимән”.

Голландийәниң амстердам шәһиридики “дәбалиә” тиятирханисиниң алдида өткүзүлгән “уйғурларниң авази” намидики паалийәттә екранда көрүнүп турған ““шинҗаң сақчи һөҗҗәтлири” дики көрүнүш. 2022-Йили 25-өктәбир.
Голландийәниң амстердам шәһиридики “дәбалиә” тиятирханисиниң алдида өткүзүлгән “уйғурларниң авази” намидики паалийәттә екранда көрүнүп турған ““шинҗаң сақчи һөҗҗәтлири” дики көрүнүш. 2022-Йили 25-өктәбир.
RFA/Erkin Tarim

28-Өктәбирдә голландийәдики ишчилар партийәсидин болған явропа парламент әзаси тәйис ротен әпәнди “уйғурларниң авази” намлиқ көргәзмини зиярәт қилған. У, зиярәттин кейин, уйғурларға һесдашлиқ қилидиғанлиқини вә уйғур қирғинчилиқини тохтитиш үчүн қолидин кәлгәнни қилидиғанлиқини ейтқан. Уйғур паалийәтчи абдурәһим ғени әпәнди бу һәқтә мәлумат бәрди.

Голландийә явропада уйғурлар көп олтурақлашқан дөләтләрдин бири болуп, 30-өктәбир күни ахирлишидиған мәзкур паалийәт уйғурларни наһайити сөйүндүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.