Enqerede ötküzülgen noruz bayrimida türk dunyasining Uyghurlargha ige chiqishi kérekliki tekitlendi

Ixtiyariy muxbirimiz erkin tarim
2021-03-22
Share
Enqerede ötküzülgen noruz bayrimida türk dunyasining Uyghurlargha ige chiqishi kérekliki tekitlendi Türkiyening paytexti enqerede her yili bolghinidek bu yil 21-mart künimu ottura asiya türkiy jumhuriyetliri, türkiye we dunyaning herqaysi jayliridin kelgen türkiy xelqler bir yerge jem bolup, noruz bayrimini qutlidi.
Social Media

Türkiyening paytexti enqerede her yili bolghinidek bu yil 21-mart künimu ottura asiya türkiy jumhuriyetliri, türkiye we dunyaning herqaysi jayliridin kelgen türkiy xelqler bir yerge jem bolup, noruz bayrimini qutlidi.

Musteqil ottura asiya türkiy jumhuriyetlirining enqerede turushluq bash elchiliri, bezi siyasiy partiyelerning wekilliri we parlamént ezaliri ishtirak qilghan noruz murasimida sherqiy türkistan teshkilatlar birliki mexsus bölme échip, Uyghur medeniyitini tonushturdi. Uyghur ösmürlerdin mujahit qeshqerli "Kishilik hoquqi qeyerde?" dégen shé'irni, satuq bughra qaraxan bolsa sha'ire nur'ela göktürk xanim yazghan "Türkistan'gha qaytimiz" mawzuluq shé'irini déklimatsiye qilip berdi.

Noruz murasimigha sahibxanliq qilghan enqere kéchi'ören rayonluq hökümetning re'isi turghut altin'oq ependi nutuq sözlep, musteqil türkiy döletliri we dunyadiki barliq türkiy xelqlerning öz qérindashliri bolghan Uyghurlargha ige chiqishqa chaqirdi.

21-Mart chüsh sa'et 12 de enqerede ötküzülgen noruz bayrimi pa'aliyitige kéchi'ören rayonluq hökümetning bashliqi turghut altin'oq ependi, ottura asiya türkiy jumhuriyetlirining enqerede turushluq elchiliri we köp sanda parlamént ezaliri qatnashti we söz qildi.

Aldi bilen bu pa'aliyetni uyushturghan kéchi'ören rayonluq hökümet bashliqi turghut altin'oq ependi ependi échilish nutqi qilip, türkiy xelqlerning 5 ming yilliq tarixqa ige qedimiy bayrimi bolghan noruz bayrimigha sahibxaniliq qilghanliqidin özini bextlik hés qiliwatqanliqini, bu pa'aliyetning türkiy xelqlerning birlik we ittipaqliqini kücheytish üchün zor ehmiyetke ige ikenlikini tekitlep ötti. Andin kéyin pütün türk dunyasini, musteqil türkiy jumhuriyetlirini, shundaqla barliq türkiy xelqlerni bügünki éghir künlerde Uyghurlargha ige chiqishni tewsiye qildi.

Pa'aliyet axirlashqandin kéyin bu pa'aliyetni uyushturghan we ishtirak qilghan Uyghur pa'aliyetchilerge mikrofonimizni uzattuq.

Uyghur akadémiyisi ijra'iye komitétining re'isi ablimit qaraxan ependi mezkur pa'aliyetni uyushturghan turghut altin'oq ependining Uyghurlarning noruz bayrimini alahide qutlap, Uyghurlarning hazirqi éghir weziyiti heqqidimu toxtalghanliqini, barliq türkiy xelqlerni Uyghurlargha ige chiqishqa chaqirghanliqini bayan qildi.

Sherqiy türkistan teshkilatlar birlikining enqerediki wekili abdulxemit ependi enqerede ötküzülgen noruz pa'aliyitide teshkilatining mexsus bölme échip, Uyghurlarning medeniyet boyumlirini tonushturush bilen birlikte yene Uyghurlarning éghir weziyitini tonushturghanliqini, pa'aliyetning muweppeqiyetlik ötkenlikini bildürdi.

Ablimit qaraxan ependi 21-mart küni enqerede ötküzülgen noruz pa'aliyitide Uyghur ösmürlerning shé'ir diklimatsiye qilish arqiliq Uyghurlar tartiwatqan zulumlirini janliq bir shekilde anglatqanliqini, kishilerning zor alqishigha érishkenlikini bayan qildi.

Noruz pa'aliyiti herqaysi jaylarda shad-xuramliq asas qilin'ghan her xil shekillerde ötküzülidu. Uyghur élining köpinche jaylirida bir yurt yaki bir mehellini asas qilghan halda hawaliq jaylarda ötküzülidu. Gerche Uyghur xelqi hazir éghir künlerni béshidin ötküzüwatqan bolsimu, emma dunya Uyghur qurultiyining re'isi dolqun eysa ependi mexsus tebrik bayanati élan qilip, Uyghurlarning noruz bayrimini qutlidi. Bu yilliq noruz bayrimi türkiyening enqere, istanbul, bursa we qeyseri qatarliq sheherliride Uyghurlarmu ishtirak qilghan halda türlük murasimlar bilen tentenilik ötküzüldi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet