Истанбулда “шәрқий түркистан миллий күришидә қилишқа тегишлик җиддий хизмәтләр һәққидә юмилақ үстәл йиғини” ечилди

Ихтиярий мухбиримиз азиғ
2022-03-22
Share
Истанбулда “шәрқий түркистан миллий күришидә қилишқа тегишлик җиддий хизмәтләр һәққидә юмилақ үстәл йиғини” ечилди 2022-Йили 20-март йәкшәнбә күни истанбул сәфакөйда 3-қетимлиқ “шәрқий түркистан миллий күришидә қилишқа тегишлик җиддий хизмәтләр һәққидә юмилақ үстәл йиғини” өткүзүлди.
Photo: RFA

20-Март йәкшәнбә күни истанбул сәфакөйда 3-қетимлиқ “шәрқий түркистан миллий күришидә қилишқа тегишлик җиддий хизмәтләр һәққидә юмилақ үстәл йиғини” өткүзүлди.

Уйғур академийәсиниң тәшкиллиши вә шәрқий түркистанлиқлар федератсийәсиниң саһибханилиқида өткүзүлгән мәзкур йиғинда, уйғур тәшкилат мәсуллири, паалийәтчиләр вә тәтқиқатчилар оттурисида лобичилиқ вә тәшкилатчилиқ үстидә өз ара тәҗрибә вә пикир алмаштурулған.

Йиғинға түркийәдики уйғур сиясий вә пуқрави тәшкилатларниң мәсуллири, уйғур давасиға паал аваз қошуп келиватқан җамаәт әрбаблири, уйғур сиясий вәзийити һәққидә издинип келиватқан уйғур мутәхәссис вә тәтқиқатчилар болуп 40 қа йеқин киши қатнашқан.

Уйғур акадимийисиниң муавин рәиси абдулһәмид қарахан әпәндим зияритимизни қобул қилип, паалийәт һәққидә тәпсилий мәлумат бәрди вә паалийәтниң мәқсити тоғрисида тохталди.

Йепиқ шәкилдики мәзкур йиғинниң чүштин бурунқи қисмида тәшкилатчилиқ вә лобичилиқ һәққидә тәтқиқат елип барған вә тәҗрибә қазанған доктор суат кир вә рәҗәп сәйяр қатарлиқ түрк мутәхәссисләр түркийәдики уйғур тәшкилат мәсуллири вә уйғур сиясий паалийәтчилиригә тәшкилатчилиқ вә лобийчилиқ һәққидә мәхсус лексийә бәргән.

Чүштин кейинки йиғинда уйғур мәсилиси вә уйғур сиясий вәзийити үстидә издинип келиватқан уйғур тәтқиқатчи вә мутәхәссисләр билән тәшкилат мәсуллири оттурисида тәшкилатчилиқ вә лобийчилиқ һәққидә юмилақ үстәл музакириси елип берилған.

Мәзкур паалийәткә қатнашқан явропа уйғур акадимийәсиниң рәиси доктор абдүшүкүр абдуришит әпәндим зияритимизни қобул қилип, уйғур давасида тәшкилатчилиқ вә лобичилиқниң роли вә әһмийити һәққидә тохталди. Абдүшүкүр әпәндим йәнә, уйғур зиялийлири, дини затлар вә уйғур тәшкилат мәсуллири оттурисидики чүшинишни илгири сүрүш җәһәттин бу хил паалийәтләрниң интайин муһимлиқини тәкитлиди.

Шәрқий түркистанлиқлар федератсийәсиниң мәсуллиридин “оқу уйғур билик” мәктипиниң мудири һәбибулла көсән әпәнди зияритимизни қобул қилип, бу хил йиғинларниң уйғур давасиға керәклик таянч күчләрни йитиштүрүштики роли вә пайдиси һәққидә тохталди.

Хитай һөкүмитиниң уйғур елидики қирғинчилиқ сиясәтлириниң күнсери еғирлишишиға әгишип, муһаҗирәттики уйғурларниң сиясий паалийәтлириму күнсери күчәймәктә. Мутәхәссисләр уйғур сиясий һәрикәт вә тәшкилатчилиқ паалийәтлириниң сүпити вә тәсириниң ешиши үчүн мутәхәссис вә тәтқиқатчиларниң тәҗрибә вә илмий җуғланмисидин пайдилинишиниң интайин муһимлиқини тәкитлимәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт