“Ulugh türkistan toyi” namliq xelq'araliq medeniyet féstiwalida Uyghurlar öz medeniyitini namayan qildi

Ixtiyariy muxbirimiz erkin tarim
2019.04.26
Ulugh-Turkistan-Toyi-2019-01.jpeg Turkiyening bursa shehiride otkuzulgen “Ulugh türkistan toyi” namliq xelq'araliq medeniyet féstiwalidin bir korunush. 2019-Yili 25-april. Bursa, türkiye.
RFA/Erkin Tarim

Türkiyening gherbiy rayonigha jaylashqan bursa shehiridiki uludagh uniwérsitétida ötküzülgen “Ulugh türkistan toyi” namliq xelq'araliq medeniyet féstiwalida Uyghurlar öz medeniyitini namayan qildi.

4-Ayning 25-küni sa'et 12din kech sa'et 8 giche dawamlashqan pa'aliyetke ottura asiya türkiy jumhuriyetliridin bursadiki uludagh uniwérsitétigha kélip oquwatqan özbék, qazaq, qirghiz, türkmen qatarliq türkiy milletlerdin oqughuchilar qatniship özlirining medeniyet-sen'itini namayan qilghan, örp-adet, yémek-ichmek we kiyim-kécheklirini tonushturghan. Bulardin sirt en'eniwiy tenterbiye türliri boyiche musabiqimu ötküzülgen. Uyghurlarmu özlirining tarixi, medeniyet-seniti, yémek-ichmek medeniyiti, Uyghurlar toghrisida chiqiwatqan kitablar we zhurnal-gézitlarni körgezme qilghan. Istanbuldin kelgen balilar sen'et ömiki oyun qoyghan.

25-Küni yérim kün dawamlashqan pa'aliyetke bursa shehrining bashliqi mustafa dündar ependi we uludagh uniwérsitétining mudiri qatarliq rehberler qatnaship söz qilghan we nutqida Uyghurlarnimu tilgha alghan. Doktor erdem özdemir ependi pa'aliyetni ötküzüshtiki meqsiti heqqide toxtaldi.

Doktor erdem özdemir ependi pa'aliyetni ötküzüshtiki meqsiti heqqide toxtilip mundaq dédi: “Biz barliq türkiy milletlerning bir pütün ikenlikini kishiler his qilsun, yashlar özara chüshinish hasil qilsun, qérindashlar özara tonushsun, özara dertlirini anglisun dep bu pa'aliyetni ötküzduq. Meqsitimizge yettuq köp adem qatnashti. Buningdin kéyin dawamliq ötküzüsh toghrisida telepler keldi. Bu pa'aliyetke Uyghurlarmu aktip qatnashti”.

Biz pa'aliyet heqqide tepsili melumat igilesh üchün uludagh uniwérsitéti saghlamliq ilmi fakultéti oqughuchisi zeynep enwer bilen söhbetleshtuq. U, féstiwal meydanida Uyghurlarning chalghu eswabliri we kiyim-kécheklirini qoyghanliqini, pa'aliyetning nahayiti yaxshi ötkenlikini bayan qildi.

Bursa türkiyening gherbige jaylashqan sana'et sheherliridin biri bolup, bu sheherdiki uludagh uniwérsitétida 100 etrapida Uyghur oqughuchi oqumaqta. Bu oqughuchilar istanbuldin kelgen Uyghur balilar bilen birlikte 2 toluq ottura mektepte Uyghur sen'itini tonushturghan we Uyghurlarning bügünki weziyitini anglatqan. Kéyin bursa osman'ghazi rayonluq hökümetning bashliqi mustafa dündar ependi Uyghur oqughuchilarni qobul qilghan. Nuray exmet bu heqte melumat berdi.

Bursadiki Uyghur oqughuchilar 2 yildin buyan aktip pa'aliyet élip barmaqta. Bursadiki Uyghur oqughuchilarning wekili abdulqadir abdulkérim özlirining bursadiki aliy mekteptin bashlan'ghuch mektepkiche hemme yerde pa'aliyet ötküzüp bursa xelqining qollishigha érishkenlikini bayan qildi.
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.