Түркийәдики 10 сиясий партийә "шәрқий түркистан қан йиғлимақта" темисида ортақ мәтбуат йиғини чақирди

Ихтиярий мухбиримиз әркин тарим
2021-05-19
Share
Түркийәдики 10 сиясий партийә 10 Сиясий партийә хитайниң уйғурларға йүргүзүватқан ирқий қирғинчилиқ сияситигә ләнәт оқуш, түркийә һөкүмитини уйғурларға игә чиқишқа чақириш үчүн бурса шәһиридә өткүзгән "шәрқий түркистан қан йиғлимақта" намлиқ мәтбуат баянати елан қилиш йиғилишидин көрүнүш. 2021-Йили 17-май, түркийә.
RFA/Erkin Tarim

Түркийәдики һәр қайси сиясий партийәләр вә аммиви тәшкилатлар түркийәниң һәр қайси вилайәт, шәһәр вә наһийәлиридә арқа-арқидин һәр хил паалийәтләрни уюштуруп, хитайниң уйғурларға елип бериватқан сияситигә ләнәт оқумақта вә уйғурларға игә чиқидиғанлиқини юқири аваз билән җакарлимақта.

17-Май күни түркийәниң 4-чоң шәһири болған бурса шәһиридә 10 сиясий партийә хитайниң уйғурларға йүргүзүватқан ирқий қирғинчилиқ сияситигә ләнәт оқуш, түркийә һөкүмитини уйғурларға игә чиқишқа чақириш үчүн "шәрқий түркистан қан йиғлимақта" намлиқ мәтбуат баянати елан қилиш йиғилиши өткүзди. Бурса шәһириниң мәркизидики "15-июл демократийә" мәйданида өткүзүлгән паалийәткә җумһурийәт хәлқ партийәси, ийи партийәси, саадәт партийәси, демократ партийәси, демократийәлик сол партийәси, келәчәк партийәси, дәва партийәси, йәнидән рәфаһ партийәси, түркийәни өзгәртиш партийәси вә мәмликәт партийәсиниң бурса вилайитидики вәкиллири, бәзи партийәләрниң парламент әзалири иштирак қилди вә сөз қилди. Булардин сирт һәр қайси партийәләрниң қоллиғучилири вә хәлқ-аммисидин болуп көп санда киши қатнашти.

10 Сиясий партийә хитайниң уйғурларға йүргүзүватқан ирқий қирғинчилиқ сияситигә ләнәт оқуш, түркийә һөкүмитини уйғурларға игә чиқишқа чақириш үчүн бурса шәһиридә өткүзгән

Йиғин риясәтчиси мундақ деди: "'шәрқий түркистан қан йиғлимақта' мавзулуқ мәтбуат баянати елан қилиш йиғиниға хуш келипсиләр. Бу 10 сиясий партийә ортақ уюштурған йиғин. Мән 10 партийәсиниң вәкиллирини сәһнигә тәклип қилимән. Улар шәрқий түркистан тоғрисидики йүрәк сөзлирини оттуриға қоюп өтиду."

Бурсаниң мәркизигә җайлашқан чоң мәйданға қурулған сәһнигә шәрқий түркистанниң ай юлтузлуқ көк байриқи билән түркийә байриқи есилған болуп, биринчи болуп түркийәниң әң чоң өктичи партийәси җумһурийәт хәлқ партийәсиниң бурсадики вәкили исмәт қараҗа әпәнди сөз қилди. У, мундақ деди: "бүгүн шәрқий түркистанда вә башқа мусулман земинлирида зулум давам қиливатиду вә қан еқиватиду. Буниңға қарши чиқиш кишиләрниң инсанлиқ вәзиписидур. У йәрдики зулумни әйибләш һөкүмәтниң вәзиписи әмәс, һөкүмәт бу ирқий қирғинчилиқни тохтитиш үчүн конкрет иш қилиши керәк. Һәрикәткә өтүши керәк."

Арқидин мәйданда йиғилған йиғилиш әһлигә ийи партийәсиниң бурса вилайитидики мәсули сәлчуқ түркоғлу әпәнди сөзләп мундақ деди: "һөрмәтлик парламент әзалири, шәрқий түркистанда йүз бериватқан инсанийәткә қарши җинайәткә, зулумға қарши туруш үчүн кәлгән қиммәтлик юртдашлирим һәммиңлар хуш келипсиләр. Зулумға учраватқан кишиләрниң миллитини сорашқа болмайду. Ким зулум қилса қилсун, қайси милләт зулумға учриса учрисун, зулум қилғанларға қарши турушимиз керәк. Шуңа пәқәтла ләнәт оқуш купайә болмайду. Һөкүмәт сәмимий болуп, һәрикәткә өтүши керәк. Йоқалсун коммунист хитай."

Кейин демократик сол партийәсиниң бурса вилайитидики мәсули җаһит ақинҗи әпәнди, партийәси намидин сөз қилип мунуларни тәкитлиди: "хитайниң шәрқий түркистанда ирқий қирғинчилиқ қиливатқанлиқи бирләшкән дөләтләр тәшкилатиниң 2020-йили елан қилған доклатида бекитилгәниди. Буни билип туруп хитайға қарши чиқмиған адәм бу дунядиму, у дунядиму һесаб берәлмәйду. Бирләшкән дөләтләр тәшкилатида 39 дөләт уйғурларни қоллап қол қойди, түркийә қол қоймиди. Уйғур мәсилисидә һөкүмәт қарап турмаслиқи керәк. Әгәр бундақ туруверидиған болса шәрқий түркистан еқиватқан қанға, зулумға түркийә һөкүмитиму шерик болған болиду."

Мәтбуат баянати елан қилиш йиғинида 10 сиясий партийиниң вәкиллири айрим айрим сөз қилғандин кейин, ортақ баянат оқуп өтүлди. Баянатта хитай қаттиқ әйибләнгәндин кейин түркийә һөкүмити, шәрқий түркистан мәсилисидә һәрикәткә өтүшкә чақирилған.

Бу паалийәтни уюштурушта зор күч чиқарған ийи партийәсиниң бурсадики мәсули сәлчуқ түркоғлу әпәнди телефон зияритимизни қобул қилип мундақ деди: "паалийәткә җәмий 1500 әтрапида киши қатнашти. Ортақ мәтбуат баянати елан қилиш паалийити иди. Қатнашқан 10 партийиниң һәммиси өктичи партийәләр иди. Паалийитимизгә вилайитимиздики ахбарат васитилири вә түркийәдики әң чоң ахбарат васитилири орун бәрди. Һакимийәт бешидики партийә билән һөкүмәтни қоллаватқан милләтчи һәрикәт партийәси қатнашмиди, яхши паалийәт болди."

Бу, түркийәдә тунҗи қетим бундақ охшимайдиған көз қараштики көп санда партийиниң уйғурлар тоғрисида ортақ баянат елан қилиши болуп, бу зор илгириләш икән. Шәрқий түркистан вәхписиниң сабиқ рәиси пешқәдәм паалийәтчи һамутхан гөктүрк әпәнди шәрқий түркистан мәсилисиниң түркийәдики сиясий партийәләрни иттипақлаштуруп бир йәргә җәм қилғанлиқини, буниң шәрқий түркистан дәваси үчүн зор илгириләш икәнликини баян қилди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт