Уйғур һәйәт түркийәниң коня вә қаһраманмараш вилайәтлиридә муһим паалийәтләрдә болған

Ихтиярий мухбиримиз әркин тарим
2019-09-23
Елхәт
Пикир
Share
Принт
Уйғур һәйити коня шәһәрлик һөкүмәт катипи әрҗан услу билән биргә. 2019-Йили сентәбир. Коня, түркийә.
Уйғур һәйити коня шәһәрлик һөкүмәт катипи әрҗан услу билән биргә. 2019-Йили сентәбир. Коня, түркийә.
RFA/Erkin Tarim

Түркийәдә уйғур нопусиниң көпийишигә әгишип уйғурларниң мәсилилириму оттуриға чиқмақта.

2014-2015-Йиллардин кейин уйғурлар көп олтурақлашқан шәһәрләрдин бири коня шәһири болуп, мәзкур шәһәрдики уйғурларму түрлүк қийинчилиқларға дучар болмақта. Бу уйғурларниң мәсилилириниң һәл қилинишиға ярдәм қилиш вә уйғурларниң һазирқи еғир вәзийитини коня җамаәтчиликигә аңлитиш мәқсити билән мәркизи истанбулда турушлуқ шәрқий түркистан маарип вә һәмкарлиқ җәмийити рәиси вә шәрқий түркистан тәшкилатлар мунбири рәиси һидайәт оғузхан башчилиқидики 8 кишилик һәйәт 3 күнлүк зиярәт елип барди. 

19-Сентәбирдин 22-сентәбир күнигичә елип барған зиярәттә коня шәһәрлик һөкүмәтниң баш катипи әрҗан услу әпәнди билән ишханисида көрүшүп, конядики уйғурлар дучар болуватқан қийинчилиқлар вә уйғурларниң һазирқи еғир вәзийити тоғрисида мәлумат бәргән. Арқидин йәнә коня қизилай ярдәм тәшкилатиниң рәиси һүсәйин үзмәс әпәнди, коня инсаний ярдәм вәқпиниң башлиқи, коня аммиви тәшкилатлар бирлики, коня қаратай университетиниң муавин мудири қатарлиқ әрбаблар билән көрүшүп, уйғурларниң коняда дуч келиватқан қийинчилиқлири вә уни һәл қилиш йоллири тоғрисида музакирә елип барған. Һидайәтулла оғузхан әпәнди телефон зияритимизни қобул қилип бу һәқтә мәлумат бәрди. 

Әң муһими 20-сентәбир күни ахшими истанбулдики султан сатуқ буғрахан вәқпиниң уюштуруши билән ички анатолийә районидики университетларда яхши оқуватқан оқуғучиларни мукапатлаш мурасими өткүзүлгән. 

Қиммәтлик радио аңлиғучилар, игилишимизчә, түркийәниң коня шәһиридә 70 аилә уйғур муһаҗирлири яшимақтикән. Булардин сирт коняниң чумра наһийисидә 30 аилә уйғур бар болуп, улар шәрқий түркистан муһаҗирлар җәмийитиниң ечилиш мурасимини өткүзгән. Һидайәт оғузхан әпәнди бу тоғрилиқ мәлумат бәрди. 

Шәрқий түркистан аммиви тәшкилатлар мунбириниң рәиси һидайәтулла оғузхан башчилиқидики һәйәт 22-сентәбир күни конядики 3 күнлүк зияритини ахирлаштуруп, түркийәниң шәрқий-җәбуний райониға җайлашқан қаһраманмараш шәһиригә кәлгән. Мәзкур шәһәр әң көп уйғур оқуғучи оқуватқан шәһәрләрдин бири болуп, һәйәт 23-сентәбир күни әтигән қаһраманмараш шәһиридә оқуватқан оқуғучилар билән сөһбәт йиғини өткүзгән. Кейин қаһраманмараштики сүтчү имам университетиниң мудири профессор доктор ниязи җан әпәндини ишханисида зиярәт қилип, уйғур оқуғучиларға қилған ярдими үчүн рәһмәт ейтқан. Улар йәнә мәзкур университетта оқуватқан уйғур оқуғучиларға вә бундин кейин келип оқумақчи болуватқан уйғур оқуғучиларға қулайлиқ яритип беришини тәләп қилған. 

Кейин мәзкур һәйәт қаһраманмараш сүтчү имам университетида әла нәтиҗиләрни қолға кәлтүргән оқуғучиларни мукапатлаш мурасими өткүзгән. Һидайәтулла оғузхан әпәнди бу һәқтә мәлумат бәрди. 

Султан сатуқ буғрахан вәқпи 2012-йили қурулған болуп, түркийәниң коня шәһири билән қаһраманмараш шәһиридә шөбилири ечилған. Мәзкур вәқипниң башқуруш һәйити әзаси доктор алимҗан боғда әпәнди бу һәқтә тохталди.
Уйғур тәшкилатлириниң мәсуллиридин тәркиб тапқан бу һәйәт уйғур оқуғучилар көп болған кастамону, бурса вә измир шәһәрлиригиму зиярәт елип баридикән.

Пикирләр (0)
Share
Толуқ бәт