Türkiye parlamént ezasi: sherqiy türkistanni hergiz satmaymiz

Ixtiyariy muxbirimiz arslan
2019-12-30
Share
Abdukadir-Karaduman.jpg Eyup sultan meydanida ötküzülgen xitaygha qarshi namayishta parlamént ezasi abdukadir karaduman ependi sözde. 2019-Yili 28-dékabir. Istanbul, türkiye.
RFA/Arslan

Türkiyede Uyghurlarni qollash sadaliri barghanche kücheymekte. Bu hepte axiri istanbulda ikki yerde Uyghurlarni qollash namayishliri ötküzüldi. Bularning biride söz qilghan türkiye sa'adet partiyesining parlamént ezasi Uyghurlarni xitayning puligha satmaydighanliqini, Uyghurlargha rawa körülgen zulumlarni her yerde pash qilidighanliqini bildürdi.

Zeytunburnudiki namayishta islam dunyasi Uyghurlargha ige chiqishqa chaqirildi.

28-Dékabir shenbe küni sa'adet partiyesi istanbul yashlar bölümi 101 ammiwi teshkilatning qollishi bilen eyup sultan meydanida namayish uyushturdi.

Soghuq we yamghurgha qarimay Uyghur we türklerdin bolup 600 din artuq kishi namayishqa qatnashti.

Igilinishiche, bu namayish "Sherqiy türkistanni qollash", "Xitay hakimiyitining Uyghurlar üstidin yürgüzüwatqan zulumgha qarshi naraziliq namayish élip bérish" meqsitide teshkillen'gen.

Namayish jeryanida axbarat élan qilish yighini ötküzüldi. Sa'adet partiyesi yashlar bölümi mes'uli shundaqla türkiye parlamént ezasi abdulqadir qaradoman ependi bayanatni oqup ötti. 

Abdulqadir qaradoman ependi mundaq dédi: "Biz sherqiy türkistanni zalim xitayning puligha hergiz satmaymiz."

U yene mundaq dédi: "Yüzlerche lagér we türmilerde nechche milyonlighan sherqiy türkistanliq qérindashlirimiz mehbus halitide her türlük qiyin-qistaqlar astida nezerbend qilindi. Biz Uyghur xelqi béshidin ötküzüwatqan bu paji'elerni her sahe kishilirige anglitimiz we zalim xitay dölitining qandaq zulum séliwatqanliqini her yerde pash qilimiz."

Parlamént ezasi abdulqadir qaraduman ependi sözning axirida Uyghurlarni her zaman qollaydighanliqini bildürüp mundaq dédi: "Biz sa'adet partiyesi yashlar bölümi bolush süpitimiz bilen bu zulumni hergiz qobul qilmaydighanliqimizni jakarlaymiz. Bu zulum we wehshiylikning derhal xatime bérilishi üchün hem türkiyening her qaysi jaylirida hem xelq'ara sahede qolimizdin kélidighan pütkül imkaniyetlerni ishqa sélip zulumni toxtitishqa tirishimiz shundaqla pütkül döletlerni, musulman rehberlerni xitayning yürgüzüwatqan bu zulum siyasitini tenqid qilishqa, diplomatiye jehette bir qedem bésishqa chaqiriq qilimiz."

"Anatoliye genchlik jem'iyiti" ning istanbul shöbe re'isi yünüs gench ependi, türk bayriqining yénida kök bayraqni lepilditip, sherqiy türkistandiki bésim astida qalghan qérindashliri üchün bir yerge jem bolghanliqini bildürdi.

U mundaq dédi: "Biz u yerdiki qérindashlirimizning yalghuz emeslikini bildürüp nida qilimiz. Hökümet béshidikilermu u qérindashlirimiz üchün kéreklik qedemlerni basidu. Xitayning zulumlirini 3-4 tengge qerzge satmaymiz. Qérindashlirimizning her zaman yénida bolimiz. Sherqiy türkistanliq qérindashlirimiz biz üchün ezizdur."

Namayish jeryanida yene sherqiy türkistan teshkilatlar birlikige wakaliten sherqiy türkistan yéngi ewlad herikitining idare hey'et ezasi abdulhemit pamir ependi söz qildi.

U sözide Uyghurlarni qollap namayish orunlashturghan türk xelqige teshekkür éytti. 

U mundaq dédi: "Pütkül dunya rehberliri, pütkül insaniyet, islam dunyasi, islam hemkarliq teshkilati, türk dunyasi köz yumup sükütte turuwatqan peytte qimmetlik dostlirimiz yénimizda boldi, awazimizgha awaz qoshtunglar, silerge teshekkür éytimiz."

Sa'adet partiyesi yashlar bölümining tiwéttir hésabida 17 ming egeshküchisi bolup, ular twéttir arqiliq, "Sherqiy türkistanning yénida biz, sherqiy türkistanda musulmanlar qetle qiliniwatidu, buninggha süküt qilmaymiz, xitayni toxtat!" dégendek resimlik sho'arlarni yézip tarqatti we türkiye xelq ammisini xitay mallirini bayqut qilishqa chaqirdi.

Namayishta söz qilghan "Sherqiy türkistan yéngi ewlad herikiti" idare hey'iti ezasi abdulhemit pamir ziyaritimizni qobul qilip, namayish heqqide toxtaldi.

28 Dékabir shenbe küni kechte yene istanbulning Uyghurlar köp olturaqlashqan zeytinburnu rayonida yürüsh we axbarat élan qilish pa'aliyiti élip bérildi. Bu pa'aliyetni "1453 Zeytinbu guruppisi" namdiki teshkilat bilen "Sherqiy türkistan teshkilatlar birliki" birlikte uyushturdi.

Zeytinburnuda élip bérilghan yürüshke minglarche kishi qatnashti. Qollirida türkiye we sherqiy türkistan bayraqlirini kötürgen namayishchilar xitay Uyghurlar üstidin yürgüzüwatqan qiyin-qistaq we iskenjilerge qarshi sho'arlarni towlidi.

Zeytinburnunining "Sa'et munari" dégen yerdin ikki kilométirdek yürüsh qilghan namayishchilar qattiq yamghur yéghiwatqan bolsimu chékinmestin yürüshni 58-bulwar meydanighiche dawam qildi.

"1453 Zeytinbu guruppisi" re'isi söz qilip, ammiwi teshkilatlarni birlikte heriketke ötüshke Uyghurlar üstidin yürgüzülüwatqan zulum we qiyin qistaqlargha qarshi turushqa chaqirdi.

Hidayetulla oghuzxan söz qilip dunya jama'iti we islam dunyasini Uyghurlarni qollashqa dewet qildi.

U munda dédi: "Pütkül islam dunyasining imani mejburiyitini ada qilishqa chaqiriq qilimiz. Shundaqla pütkül insaniyetning üstige chüshken insaniy mejburiyetni ada qilishqa chaqirimiz" dédi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet