Türkiyede üch Uyghur ayal korona wirusi bilen yuqumlinip wapat boldi

Ixtiyariy muxbirimiz arslan
2020-11-25
Share
virus-uyghur-ayal-karton.gif Korona wirus mezgilidimu japadin qorqmay küresh qilish rohigha ige Uyghur ayallirining simwoligha atap sizilghan karton.
Yettesu

Yéqindin buyan türkiyede korona wirusi bilen yuqumlan'ghuchilarning sani kündin kün'ge köpiyip barmaqta, buninggha egiship türkiyediki Uyghurlardimu köplep yuqumlinish körülüshke bashlidi. Bir qanche kün ichide istanbulda hebibixan bostan, zöhrexan hajim, aminexan hajim qatarliq üch Uyghur ayal korona wirusi bilen yuqumlinip, dawalash önüm bermey wapat boldi.

Türkiyede wirus bilen yuqumlinish ehwali toghrisida sehiye ministi'iri faxrittin koja ependining tiwéttér hésabidin 24-noyabir küni élan qilghan melumatlargha qarighanda, shu küni türkiyede korona wirusi bilen yuqumlan'ghuchilarning sani 7381 bolup, wapat bolghanlarning sani 161 ge yetken. Türkiyede wirus bilen yuqumlan'ghuchilarning omumiy sani 460 ming 916 ge yetken. Toplam wapat bolghanlarning sani 12 ming 672 kishi yetken.

Istanbuldiki Uyghurlarda korona wirusi bilen yuqumliniwatqanlarning nisbiti zadi qanchilik? buninggha qarita qaysiy türde dawalash usuli élip bériwatidu? önümi qandaq boluwatidu? Uyghurlarning korona wirusi yuqumidin saqlinishi üchün qandaq tedbirler élinishi kérek? biz bu heqte istanbulda Uyghur tibabiti doxturxanisi achqan, ilgiri Uyghur tibabetchiliki aliy téxnikomning sabiq mudir wirachi we proféssuri bolup ishligen tiwip mutellip hajim emchi ependi bilen söhbet élip barduq.

Mutellip hajim emchi türkiyede korona wirusi bilen yuqumlinish ehwalining köpiyiwatqanliqini, buninggha egishiship istanbuldiki Uyghurlar arsidimu yuqumlan'ghuchilarning köpiyiwatqanliqini bildürdi. Korona wirusi bilen yuqumlan'ghan Uyghurlarning statiskiliq sanliq melumat yoq iken, biraq proféssur mutellip hajim emchi korona wirusi bilen yuqumlan'ghan 18 Uyghur a'ilisini dora bilen dawalawatqanliqini bildürdi. Uningdin bashqa yene köp sanda Uyghurlar korona wirusi bilen yuqumlan'ghan bolsimu, emma ashkarilashni xalimay mexpiy dawaliniwatqan iken. Ularning sanimu xéli salmaqni igileydiken.

Proféssur mutellip hajim emchi korona wirusi bilen yoqumlan'ghan Uyghurlarni Uyghurlarning en'eniwiy milliy tibabetchilik dawalash usuli boyiche dawalawatqanliqini, Uyghurlar qedimdin ishlitip kelgen "Zufa sherbiti", "Loqi su'al", "Zukam chayliqi", "Hebbe ghariqon", "Kashkap jewhiri" qatarliq dorilarni qollinip, dawalash élip bériwatqanliqini we bu dorilarning önümi körülüwatqanliqini bildürdi.

Proféssur mutellip hajim emchi korona wirusidin saqlinish üchün adem jismdiki her qaysiy ezalarni quwwetlik tutush kéreklikini, bolupmu bu késelning aldi bilen öpkige yoqidighan bolghachqa, öpkini asirash kéreklikini, soghuq ötüp kétishtin saqlinish lazimliqini, shuning bilen birge maska taqash, ariliq saqlash, tazliqqa ehmiyet bérish dégendek sehiye idariliri tewsiye qilghan her türlük qa'idilerge ri'aye qilish kéreklikini tekitlidi.

Sherqiy türkistan ölimalar birliki türkiyede korona wirusi bilen yuqumlinip wapat bolghan üch Uyghur ayal toghrisida teziyename élan qildi. Teziyenamide mundaq déyilgen: "Sherqiy türkistan ölimalar birliki birlik ezaliridin muhterem ustazimiz niyaz damollah hajimning repiqisi hebibexan hajim, hira wexpining re'isi, qérindishimiz loqmanjanning anisi zöhrexan hajim, qérindishimiz adiljan abdulkerimning qéyni'anisi aminexan hajim shundaqla dunyaning herqaysi jaylirida xitay wirosi seweblik wapat bolghan barliq qérindashlirimizgha allahdin rehmet we meghfiret tileymiz. Wapat qilghanlarning hemmisige allah jennetulfirdewstin urun bergey.

Musbi'et igiliri we a'ile tawabatigha allah sebri ata qilghay!"

Biz istanbulda koruna wirusi bilen yuqumlinip wapat bolghan hebibixan hajim bostanning oghli mexmutjan bostan bilen söhbet élip barduq. Mexmutjan bostan 88 yashliq dadisi, diniy alim niyaz damollam we 80 yashliq anisi hebibexan bostanning korona wirusi bilen yuqumlinip doxturxanida jiddi qutquzüsh bölümide dawalan'ghanliqini, dadisi niyaz damollamhajim saqiyip doxturxanidin chiqqan bolsimu, emma anisi hebibexan hajimning jiddi qutquzushta dawalash önüm bermey wapat bolghanliqini bildürdi.

Mexmutjanning bildürüshiche, uning ata-anisi 2016-yili xitay bésimi sewebidin yurtidin ayrilip, istanbulgha kélip olturaqlashqan iken. Emma uning qiz-oghul bolup 8 qérindishining hemmisi yurti toqsunda qalghan iken. U ata-anisi gerche xitay zulumidin qutulghan bolsimu, emma istanbulda yene xitay wirusining ziyankeshlikige uchrap, anisining wapat bolghanliqini bildürdi. U yene dunya jama'itini bu wirusni pütün dunyagha yayghan xitaygha qarshi bir reddiye bérishke chaqiriq qildi.

Korona wirusi bilen yuqumlinip wapat bolghan amine hajimning küyü'oghli adiljan abdulkerim qéyni'anisi amine hajimning korona wirusi bilen yuqumlinip wapat bolghanliqi heqqide féysbuk sehipiside mundaq dep yazghan: "Hörmetlik jama'et, men adiljan abdikirim, yéqinda xitay wirusi bilen jemetim boyiche 12 kishi wirus bilen yuqumlandi. 11-Ayning 21-küni qéyni'anam amine molla 67 yéshida rehmetlik boldi. Merhumning maddi élim-bérimi bolghanlar men bilen alaqe qilsanglar bolidu. Meniwiy heqqi bolghanlar ikki dunyaliq üchün merhumedin razi bolup kétishinglarni ümid qilimen."

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet