Хитай һөкүмити түркийәдики сиясий паалийәтлирини җанландурмақта

Ихтиярий мухбиримиз азиғ
2021-06-29
Share
Хитай һөкүмити түркийәдики сиясий паалийәтлирини җанландурмақта Истанбул валийси алий йәрликая 22-июн күни хитай баш әлчиси лю шиявбин билән көрүшти.
Social Media

Ғәрб дөләтлиридә өткүзүлгән G-7 вә шималий атлантик әһди тәшкилатиниң йиғинидин кийин, түркийәдики хитай дипломатик органлириниң паалийәтлири барғансери җанлинишқа башлиған.

"миллийәт" гезитиниң хәвәр қилишичә, җумһурийәт хәлқ партийәси рәисниң ташқий мунасивәт мәслиһәтчиси, истанбул милләт вәкили үнал чәвиккөз билән истанбул милләт вәкили мансур қилич хитай коммунист партийәси мәркизи комитети ташқий ишлар ярдәмчи министири җу руй билән син сөһбәт йиғини арқилиқ көрүшкән.

Хитай коммунист партийәсиниң 100-йиллиқи, түркийәниң хитай билән орнатқан дипломатик мунасивитиниң 50-йиллиқи мунасивити билән өткүзүлгән йиғинда икки тәрәп мунасивитиниң тарихий тәрәққияти вә ортақлиқи тилға илинған.

Йиғинда икки партийә оттурисида юқири дәриҗилик хадимларниң учришишиниң муһимлиқи тәкитләнгән болуп, җумһурийәт хәлқ партийәси йеқинда өткүзүлидиған хитай коммунист партийәсиниң 100-йиллиқиға һәмкарлиқ тәклипи әвәтидиғанлиқини ейтқан.

Хитай әлчиханиси җумһурийәт хәлқ партийәсидин башқа йәнә вәтән партийәси биләнму бир син йиғин өткүзгән болуп, мәзкур йиғинға қатнашқан хитай дипломатлири уйғур мәсилиси һәққидә тохталған.

Хитай коммунист партийәсиниң 100 йиллиқи вә хитай-түркийә дипломатик мунасивитиниң 50 йиллиқи мунасивити билән өткүзүлгән тор йиғиниға хитайниң түркийәдики әлчиханисиниң мәдәнийәт әлчиси ши руйлин, хитай әлчиханисиниң яш дипломатлири вә вәтән партийәсиниң яшлар гурупписи қатнашқан.

Йиғинда "хитайда ‹кәркәрән күрдистан партийәси' (PKK) гә қарши вә түркийәдә уйғур тәһдитигә қарши бихәтәрлик иңи шәкилләндүрүш үчүн немиләрни қилиш керәк?" дегән соалға хитай әлчиханисиниң мәдәнийәт әлчиси ши руйлин мундақ җавап бәргән: "хитай вә түркийәдә миллий мустәқиллиқимизни қоғдаш бизниң әң муһим вәзипимиз вә асасий сияситимиз. Бәзи тәшкилатларниң түркийәдә хитайға қарши паалийәт көрситишигә биз қарши. Биз түркийә җумһурийити билән һәмкарлишишни өмид қилимиз."

Хитай ишлири мутәхәссиси муһәммәт атавулла әпәнди зияритимизни қубул қилип, хитай дипломатик органлири паалийәтлириниң бирдинла җанлинишини, хәлқара вәзийәттики хитайға қарши кәйпиятниң ешиши вә ғәрибниң хитайға қарши иттипақлиқиниң күчийиши билән мунасивәтлик болуши мумкинликини ейтти.

Униңдин башқа йәнә 22-июн күни хитайниң түркийәдики баш әлчиси лю шявбин истанбул валийси али йәрликая билән көрүшкән. Сөһбәтниң мәзмуни һәққидә ахбаратқа учур бирилмигән болсиму, күзәткүчиләр мәзкур учришишиниң хитайниң истанбулдики консулханиси алдида давамлишиватқан "милләт нөвәттә" паалийити билән мунасивәтлик болуш иһтималлиқини илгири сүрмәктә.

Шивитсийәдики уйғур зиялийси ниҗат турғун әпәнди зияритимизни қубул қилип, хитай әлчиханилириниң тәтүр тәшвиқатлирини мәйли түркийәдә мәйли яврупа итипақида болсун, күчәйтишкә тиришиватқанлиқини, бәзи йәрлик тиллардики гезит-жорналларни пул арқилиқ сетивилип. Өзлириниң тәшвиқатлирини қилишқа силиватқанлиқини, бу хил әһвалларға қарши уйғур тәшкилатлириниң техиму актип болуши керәкликини ийтти.

"милләт нөвәттә" һәрикитиниң башламчиллиридин җәвлан ширмәмәт әпәндим зияритимизни қубул қилип түркийәдики паалийәтчиләр вә тәшкилатларниң хитайниң бу хил паалийәтлиригә тақабил туруши кирәкликини вә йиңи истиратегийәләр түзүп чиқишиниң зөрүрликини ейтти.

Хитай һөкүмити иқтисадий вә сиясий нопузидин пайдилинип түркийәниң уйғур мәсилисидә сүкүт қилишини қолға кәлтүрүш үчүн қаттиқ тиришиватқан болуп, көзәткүчиләр түркийәниң оттура шәрқ вә оттура асиядики тәсири сәвәплик хитайниң һәм әң әнсирәйдиған һәм әң көп мунасивәт қурушқа интилидиған дөләт икәнликини ейтип кәлмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт