Хитай баш консулиниң йеңидин сайланған истанбул шәһәр башлиқини тунҗи болуп зиярәт қилиши диққәт қозғимақта

Ихтиярий мухбиримиз арслан
2019-04-22
Елхәт
Пикир
Share
Принт
Хитайниң истанбулда турушлуқ баш консули җу вей истанбул шәһәр башлиқи әкрәм имамоғлини зиярәт қилди. 2019-Йили 22-апрел. Истанбул, түркийә.
Хитайниң истанбулда турушлуқ баш консули җу вей истанбул шәһәр башлиқи әкрәм имамоғлини зиярәт қилди. 2019-Йили 22-апрел. Истанбул, түркийә.
ibb.istanbul

22-Апрел күни хитайниң истанбулда турушлуқ баш консули җу вей йеңидин сайланған истанбул шәһириниң башлиқи әкрәм имамоғлуниң ишханисиға келип, уни тунҗи болуп тәбриклигән.

Хитай консули җу вей зиярәт җәрянида истанбул билән шаңхәйниң «қериндаш шәһәр» икәнликини тилға алған. 

Җу вей хитай билән түркийә арисидики сиясий, тиҗарий, мәдәнийәт вә иқтисадий җәһәтләрдики мунасивәтләрниң яхши кетип барғанлиқини, шундақла бу мунасивәтләрдә истанбулниң интайин муһим орунда туридиғанлиқини тәкитлигән.

Әкрәм имамоғлу истанбулдики хитай баш консулиниң тунҗи болуп өзини зиярәт қилғанлиқи вә тәбриклигәнликигә тәшәккүр ейтидиғанлиқини билдүргән. 

Истанбул шәһәр башлиқи әкрәм имамоғлу билән хитай консули җу вейниң дәсләпки 5 минутлуқ сөһбити мухбирларға очуқ болған болсиму, әмма кейинки 25 минутлуқ сөһбити мухбирларға йепиқ һалда елип берилған.

Әкрәм имамоғлу йеңидин шәһәр башлиқи болуп сайлинип вәзипә тапшурувалғандин кейин истанбулдики хитай баш консули җу вей уни тәбриклигән тунҗи чәтәл дипломати икән. 

31-Март күни түркийәдә елип берилған йәрлик шәһәр башлиқлири сайлимида җумһурийәт хәлқ партийәсиниң намзати әкрәм имамоғлу адаләт вә тәрәққият партийәсиниң намзати бинали йилдиримни 12 миңдин көп аваз билән йеңип, истанбул шәһириниң шәһәр башлиқи болуп сайланған.

Буниңға қарита адаләт вә тәрәққият партийәси билән миллийәтчи һәрикәт партийәси етираз билдүрүп, истанбул шәһәр башлиқи сайлимини бикар қилип, қайтидин сайлам өткүзүшни тәләп қилған иди. Әмма бу тәләпкә қарита алий дәриҗилик сайлам комитети техи бирәр қарар чиқармиди. 

С н н түрк қанилиниң 22-апрел күнидики хәвиридиму истанбул шәһәр башлиқи сайлимидики бу җидәл-маҗралар һәққидә тәпсилий мәлуматлар берилди.

Истанбулдики хитай консулиниң истанбулға йеңидин шәһәр башлиқи болуп сайланған әкрәм имамоғлуни бунчилик тез вақит ичидә алдирап зиярәт қилишидики мәқсәт зади немә? буниң арқа көрүнүшигә немиләр йошурунған? хитай консулиниң бу зияритиниң истанбулдики уйғурлар вә уйғур тәшкилатларға әкс тәсир көрситиш еһтимали барму-йоқ? 

Әнқәрәдики истратегийилик чүшәнчиләр институтиниң мутәхәссиси, доктор әркин әкрәм вә истанбулдики уйғур академийисиниң баш катипи доктор пәрһат қурбан тәңритағли бу һәқтә өз қарашлирини оттуриға қоюп өтти.

Доктор әркин әкрәм әпәнди мундақ деди: «истанбул шәһәр башлиқи түркийәдики сол партийидин сайланған бир киши болди. Хитай өзлирини сотсиялистик дөләт дәп қарайдиғанлиқи үчүн, йеқинчилиқ билдүрүшни мәқсәт қилип, тәбрикләшкә алдириған болса керәк. Иккинчи сәвәб болса хитай бу шәһәр башлиқини қоллайдиғанлиқини билдүрүп алдин сигнал бериватиду. Йәнә бир җәһәттин қариғанда, хитай һәр саһәдә истанбул шәһәр башлиқи билән йеқин мунасивәт қурушни халайдиғанлиқини көрситиватиду.»
Доктор әркин әкрәм «хитай консулиниң бу зияритиниң истанбулдики уйғурлар вә уйғур тәшкилатларға әкс тәсир көрситиш еһтимали барму?» дегән соалимизға «буниң еһтимали зор» дәп җаваб бәрди.

Истанбулдики уйғур академийисиниң баш катипи доктор пәрһат қурбан тәңритағли бу һәқтә мундақ деди: «хитайниң истанбулдики баш консули истанбул шәһәр башлиқи болуп сайланған җумһурийәт хәлқ партийәсиниң намзати әкрәм имамоғлуни тунҗи болуп тәбрикләп берипту. Бирақ бу сайламниң бикар болуп кетиш еһтимали бар, чүнки сайламға күчлүк етираз болуватиду. Һазир һеч қандақ бир нәтиҗидә ениқ болмиған әһвал астида хитайларниң алдирап-тенәп әкрәм имамоғлуни тәбрикләп беришиниң көплигән мәналири бар дәп қараймән.»
Пәрһат қурбан тәңритағли йәнә мундақ деди: «бундақ бир зиярәттә уйғур мәсилисини алдирап оттуриға қоюштин һәр икки тәрәп еһтият қилиду, бирақ хитайлар бу зиярәт арқилиқ тәрәп тутқанлиқини билдүргән болди. Ақ партийә тәрәп бу сайламни бикар қилиш вә қайта сайлам өткүзүшни тәләп қилип рәсмийәтләрни өтәватқан пәйттә хитайниң алдирапла тәбриклиши нәтиҗә немә болуштин қәтийнәзәр, уларниң позитсийисини ашкарилиған болди. Ақ партийә һөкүмитиниң йеқинқи икки айдин буян уйғур мәсилисидә бәргән баянатлири хитайниң җан томурлириға тәгкән болуши мумкин, шуниң үчүн хитай тәрәп бу шәһәр башлиқиға йеқинчилиқ көрситиш билән ақ партийигә болған наразилиқини ипадә қиливатқан болуши мумкин. Бизму бир пурсәт тепип, бу киши билән көрүшүп бәзи мәсилиләрни уларға изаһ қилишниң йолини тепишимиз керәк.»

Пикирләр (0)
Share
Толуқ бәт