Xitay bash konsulining yéngidin saylan'ghan istanbul sheher bashliqini tunji bolup ziyaret qilishi diqqet qozghimaqta

Ixtiyariy muxbirimiz arslan
2019-04-22
Élxet
Pikir
Share
Print
Xitayning istanbulda turushluq bash konsuli ju wéy istanbul sheher bashliqi ekrem imam'oghlini ziyaret qildi. 2019-Yili 22-aprél. Istanbul, türkiye.
Xitayning istanbulda turushluq bash konsuli ju wéy istanbul sheher bashliqi ekrem imam'oghlini ziyaret qildi. 2019-Yili 22-aprél. Istanbul, türkiye.
ibb.istanbul

22-Aprél küni xitayning istanbulda turushluq bash konsuli ju wéy yéngidin saylan'ghan istanbul shehirining bashliqi ekrem imam'oghluning ishxanisigha kélip, uni tunji bolup tebrikligen.

Xitay konsuli ju wéy ziyaret jeryanida istanbul bilen shangxeyning "Qérindash sheher" ikenlikini tilgha alghan. 

Ju wéy xitay bilen türkiye arisidiki siyasiy, tijariy, medeniyet we iqtisadiy jehetlerdiki munasiwetlerning yaxshi kétip barghanliqini, shundaqla bu munasiwetlerde istanbulning intayin muhim orunda turidighanliqini tekitligen.

Ekrem imam'oghlu istanbuldiki xitay bash konsulining tunji bolup özini ziyaret qilghanliqi we tebrikligenlikige teshekkür éytidighanliqini bildürgen. 

Istanbul sheher bashliqi ekrem imam'oghlu bilen xitay konsuli ju wéyning deslepki 5 minutluq söhbiti muxbirlargha ochuq bolghan bolsimu, emma kéyinki 25 minutluq söhbiti muxbirlargha yépiq halda élip bérilghan.

Ekrem imam'oghlu yéngidin sheher bashliqi bolup saylinip wezipe tapshuruwalghandin kéyin istanbuldiki xitay bash konsuli ju wéy uni tebrikligen tunji chet'el diplomati iken. 

31-Mart küni türkiyede élip bérilghan yerlik sheher bashliqliri saylimida jumhuriyet xelq partiyesining namzati ekrem imam'oghlu adalet we tereqqiyat partiyesining namzati binali yildirimni 12 mingdin köp awaz bilen yéngip, istanbul shehirining sheher bashliqi bolup saylan'ghan.

Buninggha qarita adalet we tereqqiyat partiyesi bilen milliyetchi heriket partiyesi étiraz bildürüp, istanbul sheher bashliqi saylimini bikar qilip, qaytidin saylam ötküzüshni telep qilghan idi. Emma bu telepke qarita aliy derijilik saylam komitéti téxi birer qarar chiqarmidi. 

S n n türk qanilining 22-aprél künidiki xewiridimu istanbul sheher bashliqi saylimidiki bu jidel-majralar heqqide tepsiliy melumatlar bérildi.

Istanbuldiki xitay konsulining istanbulgha yéngidin sheher bashliqi bolup saylan'ghan ekrem imam'oghluni bunchilik téz waqit ichide aldirap ziyaret qilishidiki meqset zadi néme? buning arqa körünüshige némiler yoshurun'ghan? xitay konsulining bu ziyaritining istanbuldiki Uyghurlar we Uyghur teshkilatlargha eks tesir körsitish éhtimali barmu-yoq? 

Enqerediki istratégiyilik chüshenchiler institutining mutexessisi, doktor erkin ekrem we istanbuldiki Uyghur akadémiyisining bash katipi doktor perhat qurban tengritaghli bu heqte öz qarashlirini otturigha qoyup ötti.

Doktor erkin ekrem ependi mundaq dédi: "Istanbul sheher bashliqi türkiyediki sol partiyidin saylan'ghan bir kishi boldi. Xitay özlirini sotsiyalistik dölet dep qaraydighanliqi üchün, yéqinchiliq bildürüshni meqset qilip, tebrikleshke aldirighan bolsa kérek. Ikkinchi seweb bolsa xitay bu sheher bashliqini qollaydighanliqini bildürüp aldin signal bériwatidu. Yene bir jehettin qarighanda, xitay her sahede istanbul sheher bashliqi bilen yéqin munasiwet qurushni xalaydighanliqini körsitiwatidu."
Doktor erkin ekrem "Xitay konsulining bu ziyaritining istanbuldiki Uyghurlar we Uyghur teshkilatlargha eks tesir körsitish éhtimali barmu?" dégen so'alimizgha "Buning éhtimali zor" dep jawab berdi.

Istanbuldiki Uyghur akadémiyisining bash katipi doktor perhat qurban tengritaghli bu heqte mundaq dédi: "Xitayning istanbuldiki bash konsuli istanbul sheher bashliqi bolup saylan'ghan jumhuriyet xelq partiyesining namzati ekrem imam'oghluni tunji bolup tebriklep bériptu. Biraq bu saylamning bikar bolup kétish éhtimali bar, chünki saylamgha küchlük étiraz boluwatidu. Hazir héch qandaq bir netijide éniq bolmighan ehwal astida xitaylarning aldirap-ténep ekrem imam'oghluni tebriklep bérishining köpligen menaliri bar dep qaraymen."
Perhat qurban tengritaghli yene mundaq dédi: "Bundaq bir ziyarette Uyghur mesilisini aldirap otturigha qoyushtin her ikki terep éhtiyat qilidu, biraq xitaylar bu ziyaret arqiliq terep tutqanliqini bildürgen boldi. Aq partiye terep bu saylamni bikar qilish we qayta saylam ötküzüshni telep qilip resmiyetlerni ötewatqan peytte xitayning aldirapla tebriklishi netije néme bolushtin qet'iynezer, ularning pozitsiyisini ashkarilighan boldi. Aq partiye hökümitining yéqinqi ikki aydin buyan Uyghur mesiliside bergen bayanatliri xitayning jan tomurlirigha tegken bolushi mumkin, shuning üchün xitay terep bu sheher bashliqigha yéqinchiliq körsitish bilen aq partiyige bolghan naraziliqini ipade qiliwatqan bolushi mumkin. Bizmu bir purset tépip, bu kishi bilen körüshüp bezi mesililerni ulargha izah qilishning yolini tépishimiz kérek."

Toluq bet