Türkiyede yüz bergen éghir derijilik yer tewreshte Uyghurlarmu qutquzush herikitige qatnashti

Türkiyede yer tewresh éghir yüz bergen qahramanmarash shehirige yétip barghan Uyghur pida'iylar. 2023-Yili féwral.

Türkiyening qahramanmarash shehirini merkez qilghan gazi'antep, osmaniye, hatay qatarliq on shehiride 2-ayning 6-küni kéche sa'et 04:17 de 7.6 Bal yer tewrep nurghunlighan binalar örülüp chüshti we nurghun kishi yarilinip köp sanda kishi hayatidin ayrildi. Hayatidin ayrilghanlarning arisida qahramanmarash sütchi'imam uniwérisitétini ötken yili püttürgen Uyghur yash abdulla alimmu bar bolup, u, yer tewreshte örülüp chüshken binaning astida qélip 30 sa'ettin kéyin saq chiqirilghan bolsimu, lékin doxturxanida jiddiy qutquzush bölümide dawalash ünüm bermey jan üzgen.

Türkiye prézidénti rejep tayyip erdoghan bügün, yeni 7-féwral axbaratlargha bergen melumatlirida bildürüshiche, hazirghiche yer tewreshte qaza qilghanlarning sani 4 minggha yetken, 22168 kishi yarilan'ghan, 8000 din artuq kishi örülüp chüshken binaning astidin qutquzulghan. Qutquzüsh herikiti jiddiy dawam qilmaqtiken.

Prézidént erdoghan, yer tewrigen gazi'antep qatarliq 10 sheherde 3 ayliq jiddiy halet élan qilin'ghanliqini bildürdi.

Türkiyediki Uyghur teshkilatliri we xelq ammisi yer tewreshte örülüp chüshken binaning astida qalghan kishilerni qutuldurush üchün qutquzüsh herikitige qatnishish seperwerliki bashlidi.

6-Féwral küni 30 etrapida Uyghur yashtin terkib tapqan bir guruppa istanbuldin yolgha chiqqan bolup, mezkur qutquzüsh etritining mes'uli abdusalam teklimakanning bildürüshiche u etret mashina bilen 24 sa'et yol yürüp yer tewresh éghir yüz bergen qahramanmarash shehirige yétip barghan.

Bu heqte ziyaritimizni qobul qilghan, sherqiy türkistan teshkilatliri birliki re'isi hidayetulla oghuzxan, Uyghur yashliridin terkib tapqan 30 kishilik qutquzüsh etritining qahramanmarashqa bérip qutquzüsh herikitige qatnishish arqiliq türkiye xelq ammisi bilen sherqiy türkistan xelqining pütün qiyinchiliqlarda birge bolidighanliqini ipadilesh üchün qutqüzüsh herikitige qatnashqanliqini bildürdi.

Qutquzüsh etriti bilen qahramanmarashqa barghan Uyghur yash merdan Uyghurning bildürüshiche, istanbuldiki xelq'ara sherqiy türkistan teshkilatliri birlikining uyushturushi bilen 30 etrapida Uyghur yashtin terkib tapqan bir qutquzush pida'iy etriti qahramanmarash shehirige yétip bérip aldi bilen u yerde oquwatqan Uyghur oqughuchi we a'ililiklerni tépip uchrashqanliqini, ularni istanbulgha yolgha sélish üchün özliri kelgen mashinini orunlashturghanliqini, biraq, oghul oqughuchilar u yerde qép qélip qutquzüsh we yardem xizmitige qatnishidighanliqini bildürdi. Uning éytishiche, bu jaydiki Uyghurlardin 11 ayal, 12 kichik bala bolup jem'iy 23 kishi mashina bilen istanbulgha yolgha sélin'ghan.

Uyghur qutquzush etriti yene yer tewreshte wapat bolghan abdulla alim isimlik Uyghur yashning méyitini doxturxanidin tapshurup élip mexsus bir mashina bilen istanbulgha yolgha salghandin kéyin qutquzüsh ishlirigha kiriship ketken.

Merdan Uyghurning bildürüshiche, u yerdiki insanlarning intayin yardemge éhtiyajliq ikenlikini, u yerdiki xelqlerge özliri élip barghan nan we sularni tarqitip bergenlikini, ularning Uyghur ikenlikini bilgen yerlik xelqlerning bek xosh bolghanliqidin tesirlen'genlikini ipadilidi.

Merdan Uyghur, qahramanmarashta binalarning omumyüzlük örülüp chüshkenlikini, nurghun kishilerning sirtta öy-makansiz qalghanliqini, hawa soghuq we qar yéghiwatqanliqini, shuning üchün ularning yémek-ichmek, ediyal, yotqan-körpe we chédir qatarliq maddiy buyumlargha éhtiyajliq ikenlikini bildürdi.

Qahramanmarash sütchi imam uniwérisitétida oquwatqan Uyghur oqughuchi abdughéni tawlan yer tewrigende binadin qéchip chiqqan bolsimu bek qorqup ketkenlikini ipadilidi we yer yérilip özümni yer astigha kirip kétidighandek hés qildim, dédi. Biraq u istanbulgha qaytmastin qutquzüsh ishlirigha yardemlishish üchün shu yerde qalghanliqini, özining pida'iy bolup ishleydighanliqini bildürdi.

Merkizi istanbuldiki dunya Uyghur qurultiyi wexpisi yer tewresh apitide yarilan'ghanlarning qan'gha bolghan hétiyajini qamdash üchün Uyghurlarni qan bérishke chaqiriq qilghan bolup, dunya Uyghur qurultiyi wexpisining re'isi abduréshit abdulhemit ependi qizil'ay qan merkizige bérip qan bérishni özidin bashlighan.

Biz yene yer tewresh apiti toghrisida melumat élish üchün qahramanmarash sütchi'imam uniwérisitétining 4-yilliq sinipida oquwatqan abdulla taghliq isimlik Uyghur oqughuchi bilen söhbet élip barduq. Abdulla taghliqning bildürüshiche, u özi turidighan bina örülüp chüshmigen bolsimu yérilip chak ketken, u binadin chiqip bixeter yerge yötkelgen. Qahramanmarash shehiridiki 80% bina örülüp chüshken bolup saq qalghan binalarghimu chak ketken.

Abdulla taghliq u yerdiki xelqning jiddiy qutquzüshqa éhtiyaji barliqini, shuning üchün istanbulgha qaytmay qutquzüsh herikitige qatniship türk xelqige yardem qilish üchün shu yerde qép qalghanliqini bildürdi.

Türkiyediki yer tewreshke alaqidar dunya Uyghur qurultiyi, xelq'ara sherqiy türkistan teshkilatliri birliki we sherqiy türkistan ölimalar birliki qatarliq ijtima'iy teshikilatlar teziyename élan qilip, yer tewresh apitige uchrap qiyin künlerde qalghan türkiye xelqining yénida bolidighanliqini, maddiy-meniwiy jehettin yardemlishishke teyyar ikenlikini ipadileshti.