Муһаҗирәттики лагер шаһитлири турсунай зиявдун ханимниң саламәтликиниң тездин әслигә келишигә тиләкдашлиқ билдүрди

Ихтиярий мухбиримиз уйғурай
2021-09-22
Share
Лагердин тирик қалған йерим җанлар (3)
Photo: RFA

Лагер шаһити турсунай зиявудун ханимниң корона вируси билән юқумланғанлиқи вә дохтурханиға кирип қалғанлиқи муһаҗирәттики уйғурларни, болупму лагер шаһитлирини әнсирәткән.

Өткән һәптә америкада яшаватқан лагер шаһити турсунай зиявудун ханим фейсбук арқилиқ муһаҗирәттики уйғурларға салам йоллап, өзиниң корона вироси билән юқумланғанлиқини билдүргән. У барлиқ уйғур қериндашларниң корона вируси вабасиға қарита интайин сәгәк болушини чақирған.

Нөвәттә коруна вируси вә униң йеңи вариянтлириниң пүтүн дуня миқясида қайта ямраватқанлиқи мәлум болмақта.

Турсунай зиявудун ханим хитайиниң уйғурларға қаратқан ирқий қирғинчилиқи вә йоқири бесимлиқ бастуруш сиясәтлирини хәлқараға аңлитишта зор күч чиқарған лагер шаһитлиридин бири иди. Униң йеқинда корона вируси билән юқумлинип дохтурханиға кирип қелиши, пүтүн дунядики уйғур җамаитини қаттиқ әндишигә салған. Көплигән уйғурлар иҗтимаий таратқуларда инкас қайтуруп, турсунай ханимға һессидашлиқ билдүргән вә униң тездин сақитип кетишини үмид қилған.

Голландийәдә турушлуқ лагер шаһитлиридин өмәр бекали әпәндим радийомиз зияритини қобул қилип, өзиниң бу хәвәрни аңлиғандин кейин қаттиқ әндишә қилғанлиқини, турсунай ханимниң тезрәк сақийип кетиши үчүн тиләкдашлиқ билдүридиғанлиқини ейтти.

Голландийәдә яшаватқан йәнә бир лагер шаһити қәлбинур сидиқ ханимму өзиниң бу хәвәрни аңлиғандин кейин, турсунай ханимниң әһвалидин қаттиқ қайғурғанлиқини, шундақла униң саламәтликиниң балдуррақ әслигә келишини чин дилидин үмид қилидиғанлиқини билдүрди.

Һазир дунядики һәрқайсий әлләр мәзкур вабаниң алдини елиш үчүн зор көләмлик ваксина әмләш һәрикитини қанат яйдурған болсиму, әмма бу вирусиниң йеңидин мәйданға чиққан вариянтлири ваксина әмләш ишлириға еғир риқабәтләрни яратмақта.

Америка колумбийә университетиниң медитсина тәтқиқатчиси, доктор мәмәт иминниң радийойимизға билдүрүшичә, һазирқидәк юқум мәзгилидә ваксина әмләп болғанларму вирусниң йеңи вариянтлириға қарита алдини елиш тәдбирлирини һәргиз бошаштуруп қоюшқа болмайдикән.

У йәнә мушундақ шараитта муһаҗирәттики уйғурларниң немиләргә диққәт қилиши керәклики вә юқумидин қандақ сақлиниши һәққидә чүшәнчә берип өтти.

Турсунай зиявудун ханимниң коруна вируси билән юқумланғанлиқидин қаттиқ ечинған өмәр бекали әпәнди, хитайниң қаттиқ бесимда яшаватқан мушундақ күнләрдә барлиқ қериндашларниң бошишип қалмай, саламәтликигә алаһидә диққәт қилиши керәкликини тәкитлиди.

Турсунай зиявудун ханим лагердин қутулуп чиққандин буян, хитайниң уйғурларға йүргүзиватқан инсан қелипидин чиққан зулумлирини хәлқара таратқуларға батурлуқ билән аңлитип кәлгән иди. У йеқинда әнглийәдә ечилған "уйғур сот коллегийәси" диму дадиллиқ билән гуваһлиқ берип, хитайниң уйғурларға қаратқан бастуруш қилмишлирини йәнә бир қетим дуняға ашкарилиған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт