Muhajirettiki lagér shahitliri tursun'ay ziyawdun xanimning salametlikining tézdin eslige kélishige tilekdashliq bildürdi

Ixtiyariy muxbirimiz Uyghur'ay
2021-09-22
Share
Lagérdin tirik qalghan yérim janlar (3)
Photo: RFA

Lagér shahiti tursun'ay ziyawudun xanimning korona wirusi bilen yuqumlan'ghanliqi we doxturxanigha kirip qalghanliqi muhajirettiki Uyghurlarni, bolupmu lagér shahitlirini ensiretken.

Ötken hepte amérikada yashawatqan lagér shahiti tursun'ay ziyawudun xanim féysbuk arqiliq muhajirettiki Uyghurlargha salam yollap, özining korona wirosi bilen yuqumlan'ghanliqini bildürgen. U barliq Uyghur qérindashlarning korona wirusi wabasigha qarita intayin segek bolushini chaqirghan.

Nöwette koruna wirusi we uning yéngi wariyantlirining pütün dunya miqyasida qayta yamrawatqanliqi melum bolmaqta.

Tursun'ay ziyawudun xanim xitayining Uyghurlargha qaratqan irqiy qirghinchiliqi we yoqiri bésimliq basturush siyasetlirini xelq'aragha anglitishta zor küch chiqarghan lagér shahitliridin biri idi. Uning yéqinda korona wirusi bilen yuqumlinip doxturxanigha kirip qélishi, pütün dunyadiki Uyghur jama'itini qattiq endishige salghan. Köpligen Uyghurlar ijtima'iy taratqularda inkas qayturup, tursun'ay xanimgha héssidashliq bildürgen we uning tézdin saqitip kétishini ümid qilghan.

Gollandiyede turushluq lagér shahitliridin ömer bék'ali ependim radiyomiz ziyaritini qobul qilip, özining bu xewerni anglighandin kéyin qattiq endishe qilghanliqini, tursun'ay xanimning tézrek saqiyip kétishi üchün tilekdashliq bildüridighanliqini éytti.

Gollandiyede yashawatqan yene bir lagér shahiti qelbinur sidiq xanimmu özining bu xewerni anglighandin kéyin, tursun'ay xanimning ehwalidin qattiq qayghurghanliqini, shundaqla uning salametlikining baldurraq eslige kélishini chin dilidin ümid qilidighanliqini bildürdi.

Hazir dunyadiki herqaysiy eller mezkur wabaning aldini élish üchün zor kölemlik waksina emlesh herikitini qanat yaydurghan bolsimu, emma bu wirusining yéngidin meydan'gha chiqqan wariyantliri waksina emlesh ishlirigha éghir riqabetlerni yaratmaqta.

Amérika kolumbiye uniwérsitétining méditsina tetqiqatchisi, doktor memet iminning radiyoyimizgha bildürüshiche, hazirqidek yuqum mezgilide waksina emlep bolghanlarmu wirusning yéngi wariyantlirigha qarita aldini élish tedbirlirini hergiz boshashturup qoyushqa bolmaydiken.

U yene mushundaq shara'itta muhajirettiki Uyghurlarning némilerge diqqet qilishi kérekliki we yuqumidin qandaq saqlinishi heqqide chüshenche bérip ötti.

Tursun'ay ziyawudun xanimning koruna wirusi bilen yuqumlan'ghanliqidin qattiq échin'ghan ömer bék'ali ependi, xitayning qattiq bésimda yashawatqan mushundaq künlerde barliq qérindashlarning boshiship qalmay, salametlikige alahide diqqet qilishi kéreklikini tekitlidi.

Tursun'ay ziyawudun xanim lagérdin qutulup chiqqandin buyan, xitayning Uyghurlargha yürgüziwatqan insan qélipidin chiqqan zulumlirini xelq'ara taratqulargha baturluq bilen anglitip kelgen idi. U yéqinda en'gliyede échilghan "Uyghur sot kollégiyesi" dimu dadilliq bilen guwahliq bérip, xitayning Uyghurlargha qaratqan basturush qilmishlirini yene bir qétim dunyagha ashkarilighan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet