Fransiyelik sen'etkar maxn klokis lagér shahiti tursun'ay ziyawudunning gigant portéritini marsél shehiride namayen qilghan

Muxbirimiz méhriban
2021-10-13
Share

Uyghur lagér shahiti tursun'ay ziyawudunning gigant portériti fransiyening 2-chong shehiri marséldiki télékom binasining pütün témida namayen qilinishi, fransiye taratqulirida küchlük inkas qozghidi. Mezkur portérit ijtima'iy taratqularda fransiyelik kocha sen'etkari (Mahn Kloix) maxn klokisning yene bir meshhur esiri dep teriplenmekte.

"Fransiye 24" qanilining bu heqtiki xewiride Uyghurlarning nöwettiki weziyiti heqqidimu melumatlar bérilgen. Xewerde birqanchilighan xelq'ara kishilik hoquq teshkilatlirining béyjing da'irilirini kem dégende bir milyon Uyghurni lagérlargha qamighanliqi we ularni mejburiy emgekke salghanliqi bilen eyibligenliki tilgha élin'ghan. Xewerde yene xelq'ara kechürüm teshkilatining bu qilmishlarni "Insaniyetke qarshi jinayet" dep eyibligenliki qeyt qilin'ghan.

12-Öktebir küni tursun'ay ziyawudunning ghayet zor portéritni sizghan ressam maxn klokis ependi radiyomiz ziyaritini qobul qildi.

U aldi bilen özining néme üchün Uyghur lagér shahitliri heqqidiki süretler ichidin tursun'ay ziyawudunning qoli bilen mengzini tutup turghan we xiyal sürüwatqan haliti ipadilen'gen bu süretni qayta sizishni tallighanliqi heqqide toxtaldi.

U mundaq dédi: "Men xitayda Uyghurlarning qandaq ehwalda ikenlikini uqqandin kéyin, bu heqte sözlesh kéreklikini hés qildim. Men nurghunlighan süretlerni kördüm. Méningdin némishqa bu süretni tallidingiz dep sorisingiz, bu sürettiki ayal bir qarashta mulayim hem qayghuluq körünidu, emma uning chirayida yene ümidning nurimu eks-étidu. Men BBC agéntliqining bu heqtiki xewirini oqughandin kéyin, bu süretni Uyghurlarning nöwettiki weziyitini eks ettürüdighan bir portirét qilip talliwaldim."

Guguldiki uchurlardin melum bolushiche, ressam maxn klokis yene kishilik hoquq pa'aliyetchisi bolup, uning köpinche ijadiyetliride ziyankeshlikke we adaletsizlikke uchrighan kishilerning obrazi eks-ettürülgen iken.

U bu heqtiki so'alimizgha jawap bérip, özining ijadiyet mizanida erkinlik, barawerlik we adalet nishan qilin'ghanliqi üchün, bu xil témilarni tallaydighanliqini bildürdi.

Uning bildürüshiche, u köpinche resimliride siyasiy jehette oxshimighan qarashini ipadiligenliki üchün ziyankeshlikke uchrighuchilarni, yeni erkinlik, barawerlik we adalet üchün küresh qilghuchilarni asasliq téma qilidiken. Shunga u eserliride kishilerge hemishe ümid bérishni meqset qilidiken.

Uning tekitlishiche, uning arzusi her bir kishining erkinlikining kapaletke ige qilinishi iken.

Fransiye Uyghur inistitotining bashliqi dilnur reyhan mezkur tam resimi we bu heqte fransiyede bérilgen xewerlerni féysbuk qatarliq ijtima'iy taratqularda tonushturghan Uyghur pa'aliyetchilirining biri.

Dilnur reyhan radiyomiz ziyaritini qobul qilip, mezkur portéritning fransiyede küchlük diqqet qozghighanliqini ilgiri sürdi.

Dilnur reyhan yene Uyghur lagér shahiti tursun'ay ziyawudunning portérit resimining fransiyediki dangliq ressam maxn klokis teripidin sizilishi hemde Uyghurlar weziyitining fransiye senetkarliri teripidin eks ettürülüshining ehmiyiti heqqide toxtaldi.

Amérikadiki lagér shahiti tursun'ay ziyawudun xanimmu ziyaritimizni qobul qildi.

U özining BBC agéntliqining xewiride ishlitilgen süritining tartilish jeryani heqqide ehwal tonushturdi.

Uning éytishiche, bu süretning fransiyelik sen'etkar maxn klokis teripidin marsél shehiride namayen qilinishi, uni qattiq hayajanlandurghan. U yene bu süretning tam resimige aylandurulup, fransiyening ikkinchi chong shehiri bolghan marsélda körsitilishi, Uyghur weziyitini xelq'aragha anglitishta téximu muhim ehmiyetke ige iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet