Qazaqistan puqrasi tursun'eli begdölet: axbaratning küchi bilen xitay mendin epu soridi

Qazaqistan puqrasi tursun'eli begdölet ötken aydiki Uyghur élige qarita tughqan yoqlash ziyariti dawamida, xitay saqchilirining awarigerchilikige uchrighan we pasporti tartiwélin'ghan, u neq meydanni sin'gha élip ehwalni qazaqistanda yashawatqan qizigha melum qilghan, radiyomiz bu uchurlargha asasen nilqagha téléfon qilip weqeni delilligen we xelq'aragha ashkarilighanidi. Muxbirimizning ziyaritini qobul qilghan tursun'eli axbaratning küchi bilen xitay terep uninggha pasportini qayturup béripla qalmastin, qilghan awarigerchiliki üchün özidin qayta-qayta epu sorighanliqini ashkarilidi.

Uyghur élining nilqa nahiyeside xitay saqchilirining awarigerchilikige uchrighan qazaqistan puqrasi tursun'eli begdölet, bir ayliq tughqan yoqlash ziyaritini mushu ayning 11 ‏-küni axirlashturup, qazaqistan'gha aman ésen qaytip kelgen. U, 19-yanwar radiyomiz ziyaritini qobul qilip, nilqadiki waqtida uchrighan awarigerchilikining yene bir qisim tepsilati, bolupmu, ehwal xelq'aragha ashkarilan'ghandin kéyin xitay terepte yüz bergen pozitsiye özgirishliri heqqide melumat berdi. Uning déyishiche, u pasportining tartiwélin'ghanliqi we saqchilarning özini soraqxanida tömür orunduqqa olturghuzup, jinayetchi qatarida mu'amile qilghanliqini qazaqistandiki qizigha widiyo arqiliq yetküzgen we bu ehwal téléfon ziyaretlirimiz arqiliq delillinip xelq'aragha ashkarilan'ghandin kéyin, xitay terepning pozitsiyeside burulush xaraktérlik özgirish yüz bergen. Deslepte, uning qazaqistan puqraliqini közge ilmighan we pasportini tartiwalghan xitay saqchiliri uninggha pasportini qayturup béridighanliqini éytqan. Deslepte uni 10 yil burunqi qatnash weqesi üchün 18 ming yüen tölem töleshke qistighan saqchilar, aridin 3 kün ötkende mezkur qatnash délosining taqalghanliqini éytqan. Deslepte uni silkip we düshkellep, hetta qolini arqisigha baghlap tömür orunduqqa olturghuzghan saqchilar, aqiwette uninggha dostanilik we hemkarliq heqqide teklip-tewsiyelerde bolghan؛ ikki dost dölet puqralirigha xas öz'ara yüz xatire qilishni telep qilghan hem uning kélechektiki seperlirige asanliq tughdurup béridighanliqi heqqide wediler bergen. Tursun'eli begdölet bolsa, ehwalni xelq'aragha ashkarilashqa xitay terepning seweb bolghanliqini we pasporti qoligha tegmigen teqdirde, ehwalni xelq'aragha ashkarilashni toxtatmaydighanliqini éytqan. U bashtin axir, musteqil qazaqistan dölitining puqrasigha xas dadil we keskin pozitsiyede bolghan, saqchilar heddidin ashqanda, umu qopal sözler bilen saqchilarning dekkisini bergen. Uning saqchilarni yüzidin yüzige “Xitay” dep xitab qilishi, etraptiki bezi kishilerni chöchütken.

Majiraning axirida xitay terep tursun'elige pasportini qayturup bergen we ish béjirishte xataliq ötküzgenlikini étirap qilghan. Tursun'eli qarshi tereptin, tughdurghan awarichiliki seweblik özidin epu sorashni we tölem töleshni telep qilghan. Saqchining munasiwetlik rehberliri ish béjirgen saqchilargha wakaliten uningdin kechürüm sorighan.

Tursun'eli bu majirada özining bashtin axir qet'iy pozitsiyede bolush arqiliq, özining kishilik qedir qimmitini qoghdapla qalmastin, xitay saqchilirigha heddini bildürüp qoyghanliqi we qazaqistanliq ziyaretchiler yoluqidighan awarigerchiliklerning aldini élishqa tiriship baqqanliqini ilgiri sürdi. U yene bu jeryanda, ehwalni xelq'aragha yetküzüshte rol oynighan pa'aliyetchi we axbarat organlirigha, jümlidin radiyomizgha alahide minnetdarliqini bildüridu.