Qeshqer tenterbiye mektipining az dégende 8 neper oqutquchisining tutqunda ikenliki ashkarilandi

Muxbirimizning qeshqerge qarita élip barghan téléfon ziyaretliride, qeshqer tenterbiye mektipining 8 neper oqutquchisi, yeni mekteptiki Uyghur ishchi-xizmetchiler sanining %20 i tutqunda ikenliki ashkarilandi. Töwende muxbirimiz shöhret hoshurning bu heqte teyyarlighan programmisi diqqitinglarda bolidu.

Qeshqer “Konasheher saqchi arxipliri” diki tutqunlar toghrisida élip bériwatqan éniqlashlirimiz dawamida, téléfonimiz qeshqer sheher ichide wezipe ötewatqan bir saqchi xadimigha ulandi. Bu xadim özi wezipe ötewatqan saqchixanining bashqurush teweside bolghan qeshqer tenterbiye mektipidiki tutqunlar heqqide melumat berdi. Uning déyishiche, mektepning yénik atlétika oqutquchiliridin adil tursun, amir, osmanjan we qeyserjanlar, 2017-yilining béshidila tutqun qilin'ghan. Déyilishiche, ularning arqidin, tekwando mahiri we trénér abdushükür tutup kétilgen. Andin nöwet matématika oqutquchisi esqerjan'ghan'gha kelgen؛ axirida, mektep xojiliq bölümining ishchisi nurmemet yasinmu chette qalmighan.

AFP

Ilgiriki éniqlashlirimizda, mezkur mektepning walibol oqutquchisi, sabiq mesh'el yetküzgüchi alimjan mahmutning tutqunda ikenliki delillen'gen.

Weziyettin xewerdar kishilerning bildürüshiche, qeshqer tenterbiye mektipining 60 che ishchi-xizmetchisi bar bolup, buning tengdin tolisini xitaylar igileydiken. Shundaq bolghanda, tutqunlar, mezkur mekteptiki Uyghur ishchi-xizmetchilerning %20 che qismini teshkil qilghan.

Uyghuryar fondining tutqundiki ziyaliylar tizimlikide, qeshqer wilayetlik su ishliri idarisidin memtili wahap qatarliq 6 kishining ismi tilgha élin'ghan we éniqlashlirimiz dawamida, mezkur idaridiki Uyghur ishchi-xizmetchilerningmu %15 ning tutqunda ikenliki delillen'gen.

Ejeblinerliki, qeshqer tenterbiye mektipidiki oqutquchilarning tutulush sewebi heqqide mektep rehberliri we ishchi-xizmetchilirila emes, saqchi xadimlirimu melumatqa ige emes iken. “Konasheher saqchi arxipliri” da, köp sanda tutqunlarning tutulush sewebliri bezide términ, bezide nomur bilen katégoriyege ayrilghan؛ yene bezi tutqunlar üchün “Tutulush sewebi éniqsiz” dep qeyt qilin'ghan. Mezkur saqchi xadimi, qeshqer tenterbiye mektipi oqutquchilirining tutulush sewebi heqqide xewiri yoqluqini tekitlesh bilen birlikte, ularning “Yaman gep-sözler bolghan jayda turup qilghanliqi” heqqide jem'iyet uchurliri barliqini eskertti.

Qeshqer “Kona sheher saqchi arxipliri” da, “Gumanliq kishiler bilen bille turup qélish” dégen bir katégoriyemu alahide közge chéliqidu. Bu nuqtidin qaralghanda, mezkur mekteptiki tutqunlarning tutqundiki a'ile tawabi'ati, uruq-tughqanliri, dost-buraderliri we yaki köngül yéqinliri seweblik tutqun qilin'ghanliq éhtimalliqi isharetlenmekte.