Мәһбус мәмәттурсун иминниң түрмидин җәсити чиққан, аяли йүрәк кесили қозғилип җан үзгән

Вашингтондин мухбиримиз шөһрәт һошур тәйярлиди
2024.04.24
Уйғур районида лагер вә қамал Узундин буян хитай йүргүзүват кәң көләмлик юқири техникилиқ назарәт, бастуруш, қайта тәрбийиләш сиясити вә халиғанчә қамилишни баштин кәчүргән уйғурлар әмдиликтә хитайниң вирусни баһанә қилип йүргүзгән қамал қилиш сияситиниң қурбанлириға айлинип, ачарчилиқ вә өлүм һадисилири йүз бәрмәктә.
Photo: RFA

Қәшқәрниң йеңишәһәр наһийәсиниң ханериқ йезисилиқ бир муһаҗирниң өткән һәптидики инкасида тавақчи кәнтидин тутқун қилинған 100 нәччә киши ичидин пәқәт бирла кишиниң қоюп берилгәнлики вә 6 кишиниң түрмидин җәсити чиққанлиқи қәйт қилинғаниди. Мухбиримизниң ениқлашлири давамида, мәзкур кәнттин өлгән 6 кишиниң исимлири айдиңлашти. Шундақла булардин бу йил роза һейт һарписида түрмидин җәсити чиққан мәһбус мәмәттурсун иминниң аяли нуримангүл һашимниң җәсәтни көргәндин кейин йүрәк кесили қозғилип вапат болғанлиқи ашкариланди. Төвәндә мухбиримиз шөһрәт һошурниң бу һәқтә тәйярлиған пирограммиси диққитиңларда болиду.

2017-Йили чоң тутқун башланғанда қәшқәр йеңишәһәр наһийәсиниң ханериқ йезиси тавақчи кәнтидин 120 кишиниң түрмигә ташланғанлиқи, булардин һазирға қәдәр, пәқәт бирла кишиниң қоюп берилгәнлики вә 6 кишиниң җәсити чиққанлиқи һәққидики хәвәр йип учини илгириләп ениқлашлиримиз давамида, түрмидин җәсити чиққан 6 кишиниң исимлири айдиңлашти. Ханериқта вәзипә өтәватқан сақчи хадимлиридин бириниң ашкарилишичә, бу алтә киши турсун абдукерим, һашимҗан, мәмәттурсун имин, мәмәт имин қатарлиқлардур. Дейилишичә буларниң түрмидин җәсити чиққандин кейин кәнт сақчилириниң асаслиқ хизмити мәзкур җәсәт тәвә аилиләргә идийәви хизмәт ишләш вә өлүм һәққидә җәмийәттә сөз-чөчәк тарқилишниң алдини елиш болған.

Ханериқтин телефонимизни қобул қилған, әмма узини ашкарилашни халимиған бирәйләнниң баян қилишичә, түрмидин һәр қетим җәсәт чиққанда кәнттә һәрбий һаләт шәклидә җиддийчилик пәйда болған. Сирттин кәлгән телефонни қобул қилмаслиқ, сөз-чөчәк тарқатмаслиқ һәққидики уқтурушлар қайтидин аһалиләрниң есигә селинған. Мусибәтлик аилә заратгаһлиқи аз дегәндә бир һәптигичә сақчиларниң назарити астида турған.

Бу кишиниң йәнә ашкарилишичә, тавақчи кәнтидә түрмидин әң йеқинда җәсити чиққан киши 32 яшлиқ мәмәттурсун имин болуп, униң аяли нуримангүл җәсәтни көргәндин кейин, үстигә өзини ташлап йиғлиған вә җәсәтни елип кәлгән хизмәт гурупписидики хадимларни вә сақчиларни “қатиллар” дәп әйиблигән. Җәсәт йәрликкә қоюп болунғандин кейин сақчилар нуримангүлни наһийәлик сақчи идарисигә елип кетип сорақ қилған. Сорақ давамида нуримангүл һашимниң йүрәк кесили қозғилип җан үзгән.

Телефонимизни қобул қилған тавақчи кәнтидики бир сақчи хадими юқириқи учурларниң тоғрилиқини дәлиллиди. Бу хадимниң дейишичә, тавақчи кәнтидин тутқун қилинған яшта чоңлар асаслиқ қатнашқан нәзир-чирағ, той-төкүнләрдә қилинған тәблиғләрни аңлиғанлиқи сәвәблик тутулған болса, яшлар асаслиқи қол телефонидин чиққан “мәсилиләр” сәвәблик тутулған вә кесилгән. Нуримангүлниң ата-анисиму “диний әсәбийлик” гумани билән тутқун қилинған болуп, дадиси һашимҗан 3 йил бурун түрмидә җан үзгән, аниси гүлқиз һелиһәм түрмидә җаза өтимәктикән.

Ханериқта тарқалған бәзи гәпләрдин мәлум болушичә, нуримангүл йолдишиниң җәситиниң үстигә өзини ташлап йиғлиған вә сақчиларни әйиблигән вақтида сақчилардин бири униңға қол салған. Нуримангүлниң өлүмигә йүрәк кесили әмәс сақчидин йегән таяқ зәрбиси сәвәб болған. Мәзкур сақчи хадимиму нуримангүлниң өлүм сәвәби һәққидә юқириқидәк икки хил гәп барлиқини әскәртти.

Юқирида дадиси вә вә йолдиши түрмидә җан үзгән, аниси түрмидә җаза өтәватқан нуримангүл һашимниң сорақ җәрянида җан үзгәнлики һәққидә мәлумат бәрдуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.