Mehbus memettursun iminning türmidin jesiti chiqqan, ayali yürek késili qozghilip jan üzgen

Qeshqerning yéngisheher nahiyesining xan'ériq yézisiliq bir muhajirning ötken heptidiki inkasida tawaqchi kentidin tutqun qilin'ghan 100 nechche kishi ichidin peqet birla kishining qoyup bérilgenliki we 6 kishining türmidin jesiti chiqqanliqi qeyt qilin'ghanidi. Muxbirimizning éniqlashliri dawamida, mezkur kenttin ölgen 6 kishining isimliri aydinglashti. Shundaqla bulardin bu yil roza héyt harpisida türmidin jesiti chiqqan mehbus memettursun iminning ayali nuriman'gül hashimning jesetni körgendin kéyin yürek késili qozghilip wapat bolghanliqi ashkarilandi. Töwende muxbirimiz shöhret hoshurning bu heqte teyyarlighan pirogrammisi diqqitinglarda bolidu.

2017-Yili chong tutqun bashlan'ghanda qeshqer yéngisheher nahiyesining xan'ériq yézisi tawaqchi kentidin 120 kishining türmige tashlan'ghanliqi, bulardin hazirgha qeder, peqet birla kishining qoyup bérilgenliki we 6 kishining jesiti chiqqanliqi heqqidiki xewer yip uchini ilgirilep éniqlashlirimiz dawamida, türmidin jesiti chiqqan 6 kishining isimliri aydinglashti. Xan'ériqta wezipe ötewatqan saqchi xadimliridin birining ashkarilishiche, bu alte kishi tursun abdukérim, hashimjan, memettursun imin, memet imin qatarliqlardur. Déyilishiche bularning türmidin jesiti chiqqandin kéyin kent saqchilirining asasliq xizmiti mezkur jeset tewe a'ililerge idiyewi xizmet ishlesh we ölüm heqqide jem'iyette söz-chöchek tarqilishning aldini élish bolghan.

Xan'ériqtin téléfonimizni qobul qilghan, emma uzini ashkarilashni xalimighan bireylenning bayan qilishiche, türmidin her qétim jeset chiqqanda kentte herbiy halet sheklide jiddiychilik peyda bolghan. Sirttin kelgen téléfonni qobul qilmasliq, söz-chöchek tarqatmasliq heqqidiki uqturushlar qaytidin ahalilerning ésige sélin'ghan. Musibetlik a'ile zaratgahliqi az dégende bir heptigiche saqchilarning nazariti astida turghan.

Bu kishining yene ashkarilishiche, tawaqchi kentide türmidin eng yéqinda jesiti chiqqan kishi 32 yashliq memettursun imin bolup, uning ayali nuriman'gül jesetni körgendin kéyin, üstige özini tashlap yighlighan we jesetni élip kelgen xizmet guruppisidiki xadimlarni we saqchilarni “Qatillar” dep eyibligen. Jeset yerlikke qoyup bolun'ghandin kéyin saqchilar nuriman'gülni nahiyelik saqchi idarisige élip kétip soraq qilghan. Soraq dawamida nuriman'gül hashimning yürek késili qozghilip jan üzgen.

Téléfonimizni qobul qilghan tawaqchi kentidiki bir saqchi xadimi yuqiriqi uchurlarning toghriliqini delillidi. Bu xadimning déyishiche, tawaqchi kentidin tutqun qilin'ghan yashta chonglar asasliq qatnashqan nezir-chiragh, toy-tökünlerde qilin'ghan teblighlerni anglighanliqi seweblik tutulghan bolsa, yashlar asasliqi qol téléfonidin chiqqan “Mesililer” seweblik tutulghan we késilgen. Nuriman'gülning ata-anisimu “Diniy esebiylik” gumani bilen tutqun qilin'ghan bolup, dadisi hashimjan 3 yil burun türmide jan üzgen, anisi gülqiz hélihem türmide jaza ötimektiken.

Xan'ériqta tarqalghan bezi geplerdin melum bolushiche, nuriman'gül yoldishining jesitining üstige özini tashlap yighlighan we saqchilarni eyibligen waqtida saqchilardin biri uninggha qol salghan. Nuriman'gülning ölümige yürek késili emes saqchidin yégen tayaq zerbisi seweb bolghan. Mezkur saqchi xadimimu nuriman'gülning ölüm sewebi heqqide yuqiriqidek ikki xil gep barliqini eskertti.

Yuqirida dadisi we we yoldishi türmide jan üzgen, anisi türmide jaza ötewatqan nuriman'gül hashimning soraq jeryanida jan üzgenliki heqqide melumat berduq.