Твиттер хитайға мунасивәтлик миңлиған сахта һесабларни тақиған

Мухбиримиз мәмәтҗан җүмә
2021-12-05
Share
Твиттер хитайға мунасивәтлик миңлиған сахта һесабларни тақиған Твиттер хитайға мунасивәтлик миңлиған сахта һесабларни тақиған. 2021-Йили ноябир.
Photo: RFA

Твиттер уйғур районидики кишилик һоқуқ дәпсәндичиликигә қарши тәтүр тәшвиқат һәрикити билән шуғуллинидиған хитай һөкүмитигә алақидар 2 миң 160 сахта тәшвиқат һесабини тақиған. “муһапизәтчи” гезитиниң көрситишичә, мутәхәссисләр буларниң “шәрмәндиләрчә” елип бериливатқан тәшвиқат һәрикитиниң бир қисми икәнликини билдүргән.

Бу һәрикәттә рәсим, аптоматлаштурулған һесаблар вә сахта уйғур абонтлар қоллинилип, “райондики бәхтлик турмуш” тоғрисидики дөләт тәшвиқати вә сахта испатлар тарқитилидикән. Булар сахта учур арқилиқ районда йиллардин буян давам қиливатқан зулум сиясити, кәң көләмлик лагерға ташлаш қилмиши, қайта тәрбийәләш программиси, мәҗбурий әмгәк вә мәҗбурий туғмас қилиш оператсийәси һәққидики әйибләшләрни рәт қилидикән.

Австралийә истратегийәлик сиясәт тәтқиқат институти (ASPI) ниң тәһлилчилириниң сөзигә қариғанда, твиттер тақиған 2160 һесабтики мәзмунлар “шәрмәндиләрчә” ишләнгән икән.

Хитай һөкүмитигә бағланған бу һесаблар икки йүрүш болуп, буларниң әң чоңида хитай компартийәсиниң уйғур дияриға мунасивәтлик тәтүр тәшвиқатини күчәйтидиған 2048 һесаб тори бар икән. Қалған 112 хил иккинчи йүрүш һесаб тори “чаңйү мәдәнийити” намлиқ бир шәхсий ширкәткә четилидикән. ASPI Ниң ашкарилишичә, мәзкур ширкәт уйғурларниң хитай һөкүмитини қоллайдиғанлиқи мәзмун қилинған филимларни ишләш тоғрисида уйғур районлуқ һөкүмәт билән тохтамлашқан икән.

Бу һесабларниң һәр бириниң 30 миңдин артуқ твиттер учури тарқатқанлиқи ениқланған болуп, тивиттиерға уйғур дияридики зиянкәшликләр һәққидә учурлар йолланған һаман улар StopXinjiangRumours# йәни “шинҗаң иғвалирини тохтат” намлиқ һәштәг астида униңға қарши рәсим вә филим қатарлиқ тәтүр тәшвиқатларни тарқитишқа башлайдикән.

ASPI Билдүрүшичә, бу һесабларниң 97 пирсәнтиниң әгәшкүчилири бәш нәпәргиму йәтмәйдиған болса, қалған 73 пирсәнтиниң бирму әгәшкүчиси йоқ икән. Булар тарқатқан 98 пирсәнт учур тивиттерда яқтуруш яки қайта йоллинишқа еришәлмигән болсиму, қалған икки пирсәнт қисмини даим хитай дипломатлири қайта тарқитип, мәзмунни инавәтлик қилидикән.

ASPI Ниң доклатида көрситилишичә, бу тәшвиқат һәрикити хитай компартийәсиниң кәлгүсидики тәтүр тәшвиқат һәрикитиниң йөнилишини әкс әттүридикән.

Һитай һөкүмити вә хитай компартийәсиниң америка сотсиял медия супилиридин пайдилинип тәтүр тәшвиқат тарқитиш һәрикитиниң хели көп учрайдиғанлиқи мәлум.

Бир нәччә күн илгири америкиниң “мета” ширкити хитайниң тәтүр тәшвиқат һәрикитигә четишлиқ 500 дин ошуқ сахта фейсбук һесабини тақиған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт