Америка уйғур бирләшмисиниң 9-нөвәтлик сайлими өткүзүлди

Мухбиримиз әзиз
2019-10-28
Share
UUA-Saylam-2019-022.jpg Америка уйғур бирләшмисиниң 9-нөвәтлик сайлимидин бир көрүнүш. 2019-Йили 26-өктәбир. Файрфакс, америка.
RFA/Eziz

Америка уйғур бирләшмиси дуняға кәлгән 1998-йилидин буян бирләшминиң рәиси вә рәис талливалған һәйәт әзалири мәзкур бирләшминиң хизмитигә йетәкчилик қилишни давам қилдуруп кәлгән иди. Шуниңдин буянқи қәрәллик өткүзүлүп келиватқан сайламда америкадики уйғур муһаҗирлириниң ихтиярилиқ билән беләт ташлиши арқилиқ рәисләр оттуриға чүшкән намзатлар арисидин сайлинип келиватқан болуп, бу сайламниң әң йеқинқиси болған 9-нөвәтлик сайлам 26-өктәбир күни вашингтонға қошна болған файрфакс шәһридә өткүзүлди.

Сайлам йиғини башланғанда бу қетимқи йиғинниң риясәтчиси, 2019-йиллиқ сайлам комитетиниң әзалиридин пәрһат билгин алди билән бу қетимқи сайлам паалийитиниң күнтәртипи һәққидә қисқичә мәлумат бәрди. 

Сайлам башлиништин аввал йиллардин буян давам қилип кәлгинидәк алди билән "шәрқий түркистан марши" қоюлғанда пүтүн залдикиләр орнидин туруп маршқа һөрмәт билдүрди. 

Йиғиниң күнтәртипи бойичә алдинқи нөвәтлик америка уйғур бирләшмисиниң сабиқ муавин рәиси өмәр қанат сөзгә чиқип, америка уйғур бирләшмисиниң өткәнки хизмәтлирини шуниңдәк бу җәрянда дуч кәлгән бәзи муһим әһвалларни әсләп өтти. У сөзиниң ахирида бу қетимқи сайлам һәққидә америка уйғурлири вә башқа җайлардики уйғур муһаҗирлири арисида барлиққа кәлгән пикир ихтилаплири һәққидиму алаһидә чүшәнчә бәрди. 

Өмәр қанатниң нутуқидин кейин уйғур давасиниң көзгә көрүнгән вәкили, америка уйғур бирләшмисиниң икки қарарлиқ сабиқ рәиси рабийә қадир ханим сөзгә тәклип қилинди. 

Рабийә қадир ханим сөзидә америка уйғур бирләшмисиниң америкадики уйғур җамаитигә йетәкчилик қилип, уйғур давасини америка һөкүмитигә аңлитиш һәмдә тегишлик ярдәмләрни елишта муһим рол ойнап кәлгән бир тәшкилат икәнликини алаһидә тәкитлиди у йәнә өзиниң америка уйғур бирләшмисиниң буниңдин кейинки хизмәтлириниң техиму утуқлуқ болушидин үмидвар икәнликини билдүрди. 

Америкаға әң дәсләп кәлгән уйғур зиялилириниң бири, америка уйғур бирләшмисиниң тунҗи қетимлиқ рәиси доктур долқун қәмбириму сөзгә чиқип, бирләшмә қурулған вақитлардики әһваллар һәмдә бирләшминиң низамнамилири һәққидә чүшәнчә бәрди. 

Нутуқлардин кейин йиғин әһли америка уйғур бирләшмисиниң сабиқ рәислиридин рабийә қадир ханим, долқун қәмбири қатарлиқларға гүлдәстә тәқдим қилип, америка уйғур җамаитиниң хәлқ үчүн хизмәт қилған пешқәдәмлирини унтуп қалмайдиғанлиқидәк сәмимий әқидисини ипадилигәндә пүтүн зал гүлдүрас алқишқа толди. 

Сайлам рәсмий башлинишниң алдида 9-нөвәтлик рәислик сайлиминиң намзати, "уйғур игилик тиклигүчиләр" ширкитиниң директори қуззат алтай сәһнигә чиқип, йиғин әһлигә өзиниң рәис болғандин кейин қилмақчи болған ишлири һәққидә қисқичә чүшәнчә бәрди. 

Қуззат алтай сөзиниң ахирида өзи таллап чиққан муавин рәис вә һәйәт әзалирини көпчиликкә тонуштуруп чиқти. 

Һәйәт әзалириму айрим айрим сөз қилип, өзлириниң немә үчүн бу қетимқи һәйәт гурупписиға әза болушни таллиши һәққидә көпчиликкә чүшәнчә бәрди. Шуниңдин кейин бу қетимқи сайламға кәлгән америка уйғур җамаити сайлам намзати болған қуззат алтайға қошулидиған яки қошулмайдиғанлиқини билдүрүп, қоллиридики сайлам белитигә бәлгә уруп, ашкара һалда сайлам сандуқиға беләт ташлиди. 

Бу қетимқи сайлам комитетиниң әзалири ташланған беләтләрни санап чиққандин кейин, сайлам йиғининиң риясәтчилиридин Сайлам комитетиниң әзаси Әнвәр мәмәт сайламниң ахириқи нәтиҗисини елан қилди. 

Америка уйғур бирләшмисиниң йеңидин сайлап чиқилған рәиси қуззат алтай көпчиликниң өзигә ишәнгәнликигә өз тәшәккүрини билдүргәндин кейин вашингтон шәһридики уйғур адвукат нурий түркәлниң риясәтчиликидә ай-юлтузлуқ көк байрақниң үстигә елинған "қуран" ни тутуп туруп, вәзипә тапшуривелиш қәсимини бәрди. 

Сайламдин кейин америка уйғур бирләшмисидә узун йиллар хизмәттә болған сабиқ муавин рәис өмәр қанатқа йиғин әһли тон кийгүзүп, өзлириниң униңға болған миннәтдарлиқини билдүргәндә залда йәнә бир қетим қизғин чавак вә алқиш яңриди.

Сайлам ахирлашқандин кейин биз сайламниң алди-кәйнидә уйғур җамаити арисида бәлгилик ғулғула һәм муназиригә сәвәб болған сайламниң вақти вә сайлам комитетиға мунасивәтлик мәсилиләр һәққидә бу қетимқи сайлам комитетиниң әзалириниң пикрини соридуқ. Сайлам комитетиниң әзаси сәмәт авут әпәнди зияритимизни қобул қилип, өз қарашлирини баян қилип өтти.

Америка уйғур бирләшмисиниң сабиқ рәиси елшат һәсән бу қетимқи сайламниң алдида сайлам комитети әзалири "мәнпәәтләр тоқунушмаслиқ" пиринсипиға хилаплиқ қилди, дегән мәзмунда авазлиқ баянат елан қилип, өзиниң бу қетимқи сайлам комитетидин дәргуманда икәнликини билдүргән иди. 

Һалбуки, сәмәт авут әпәнди бу тоғрилиқ сөз қилип, "әмәлий әһвал ундақ әмәс," дегәнни йәнә бир қетим тәкитлиди һәмдә өзиниң "бу қетимқи сайлам адиллиқ асасида өткүзүлди," дәп қарайдиғанлиқини билдүрди. 

Америка уйғур бирләшмисиниң алдинқи нөвәтлик һәйәт әзалиридин җурәт обул әпәндини зиярәт қилип, бу қетимқи сайлам вә униң нәтиҗиси һәққидә қандақ ойлайдиғанлиқини сориғинимизда у өзиниң бу сайламни "қанунсиз" дәп қарайдиғанлиқини тәкитлиди. 

Сайламдин кейин биз америка уйғур бирләшмисиниң йеңи рәиси қуззат алтайни зиярәт қилдуқ. У өзиниң бу қетимқи сайлам түпәйлидин уйғур җамаити арисида пәйда болған пикир ихтилаплирини тоғра чүшинидиғанлиқини шундақла буни тоғра һәл қилип кетишкә тиришидиғанлиқи һәққидә қисқичә чүшәнчә бәрди. 

Ахирида сайламға кәлгән уйғур җамаити вашингтон шәһридики уйғур имам әнқәр һаҗиниң башламчилиқида дуаға қол көтүрүп, америка уйғур бирләшмисиниң бундин кейинки хизмәтлиригә утуқ вә нәтиҗиләр тилиди. 

Бу қетимқи америка уйғур бирләшмисиниң рәис вә һәйәт әзалири үч йил вәзипә өтәйдиған болуп, үч йилдин кейин қайта сайлам өткүзүш арқилиқ кейинки нөвәтлик һәйәт гурупписи сайлап чиқилидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт