«Үч хил күчләр» гә қарши тәшвиқат күришиниң алдинқи сепидики абабәкри абләтму керийә түрмисидә ятмақта

Мухбиримиз шөһрәт һошур
2019-12-05
Елхәт
Пикир
Share
Принт
Хотән педагогика алий техникоминиң мудири абабәкри абләт.
Хотән педагогика алий техникоминиң мудири абабәкри абләт.
Social Media

Йеқинда иҗтимаий ахбарат васитилиридә тарқалған вә үрүмчидики бир университетниң сиясий өгиниши йиғининиң нәқ мәйдан хатириси икәнлики илгири сүрүлгән хитайчә бир аваз хатирисидә тутқундики мәктәп мудирлири қатарида хотән педагогика алий техникоминиң мудириниңму барлиқи қәйт қилинғаниди. Ениқлашлиримиз давамида, мәзкур мудирниң исминиң абабәкри абләт икәнлики вә нөвәттә керийә түрмисидә икәнлики дәлиллиниш билән бирликтә, униң йеқинқи 5 йил ичидә уйғур районида давам қилған «3 хил күчләр» гә қарши зәрбә бериш тәшвиқат долқунида әң алдида кетиватқанлардин бири икәнлики айдиңлашти.

Иҗтимаий таратқуларда тарқалған мәзкур аваз хатирисидә, хотән педагогика алий техникоминиң икки мудириниңму тутқунда икәнлики баян қилиниш билән бирликтә, бу хил кишиләрниң толиму хәтәрлик кишиләр икәнлики тәкитләнгән. Телефонимизни қобул қилған хотәндики сиясий-қанун хадимлиридин бири, хотән педагогика алий техникомидин тутқун қилинғанлардин бири мудир абабәкри абләт икәнликини ашкарилиди. Мәлум болушичә абабәкри абләт илгири шинҗаң педагогика университетиниң тарих факултетиниң башлиқи болған. Тор архиплиридики 2012-йилиға аит бир хәвәрдә, абабәкри абләтниң тарих пәнлири бойичә дотсент икәнлики, ичкиридә ечилған бир мәдәний ядикарлиқлар тәтқиқат йиғинида риясәтчи болғанлиқи тилға елинған. Мәзкур аваз хатирисидә, гәрчә тутқундики башқа мудирларниң аталмиш җинайәтлири тилға елинған болсиму, әмма абабәкри абләтниң немә үчүн тутулғанлиқи еғизға елинмиған. Хотән педагогика алий техникоминиң алақидар хадими абабәкри абләтниң тутулуш сәвәби һәққидә гәп қилиштин өзини тартти. Әмма юқириқи сиясий қанун кадири, абабәкри абләтниң хотәнгә йөткилип кәлгинигә анчә узун болмиғанлиқи, униң илгирики хизмәт орнида өткүзгән хаталиқи сәвәблик тутулғанлиқини баян қилди. Әмма уму абабәкри абләтниң ениқ тутулуш сәвәбини пәрәз қилалмиди. Чүнки, тор архиплиридики хәвәрләрдиму қәйт қилинишичә, у «үч хил күчләр» гә зәрбә бериш тәшвиқат долқуни башланғандин буян, у әң алдинқи сәптә орун алған. 2017-Йили керийәниң җай йезисиниң партком секретари обулқасим мәттурсун «уйғур қериндашлиримға очуқ хәт» намида хитай һакимийитигә қарита садақәт баяннамиси елан қилғандин кейин, абабәкри абләтму тәңритағ торида қәсәмнамә елан қилип, көпчиликини обулқасим мәттурсундин өгинишкә чақирған вә өзиниңму уни үлгә алидиғанлиқини баян қилған. У 2018-йили 6-айда лоп наһийәсидә ечилған, қәсәмяд йиғинида сөз қилип; пүтүн маарип саһәсини «үч хил күчләр» гә сәгәк болушқа дәвәт қилған. У «тәңритағ тори» дики чақириқнамисидә техиму илгириләп, пантүркизм вә панисламниң тәсиригә учриғанларниң зиялийлар арисида хели барлиқини әскәртип, көпчиликни бу нуқтини етирап қилишқа вә өз-өзини тәкшүрүшкә дәвәт қилған вә өзини тәкшүрүшни «үч хил күчләр» гә қарши җәң елан қилишниң башланғуч қәдими дәп шәрһлигән. У хитай һакимийитигә садақәт билдүрүштә обулқасим мәттурсунға чәбдәслик билән әгәшкән, һәтта бәзи чақириқларда, униңдин һалқиған болсиму, немә үчүндур, хитай тәрәпниң ишәнчигә еришәлмигән. У мәзкур мәктәпниң муавин мудири барат турсунбақи билән бирликтә, нөвәттә керийә түрмисидә солунуп ятмақта.

Йәнә, «бәйду» тордики хәвәр архиплирида көрситилишичә, абабәкри обулқасим, 2014-йили диний әсәбийликкә қарши мәхсус һәрикәт долқунидиму, алдинқи сәптә рол ойниған. У шу чағда шинҗаң педагогика университетида ечилған бир сиясий муһакимә йиғинида сөз қилип, уйғур районидики университетлардин топланған 160 чә кишигә диний әсәбийиликкә қарши турушниң әһмийити һәққидә лексийә бәргән.

Хәвәрләрдин мәлум болушичә, хитайниң «үч хил күчләр» гә қарши тәшвиқат долқунида, садақәт қәсәмнамиси елан қилип турупму, тутулуштин халий болалмиғанлар, ялғуз абабәкри абләт әмәс. Шинҗаң университетиниң сабиқ мудири вә профессори ташполат тейип, шинҗаң хәлқ нәшриятиниң башлиқи абдурахман әбәй вә шинҗаң гезитиниң муавин башлиқи илһам вәлиләрму, аз дегәндә бир қетимдин, «үч хил күчләр» гә қарши баянат елан қилған. Әмма улар охшашла тутқундин қутулалмиған. Бу әһвалға асасән муһаҗирәттики уйғур көзәткүчиләр, уйғур зиялийлар тәрипидин 3 йилдин буян елан қилинған қәсәмнамиләрни әмәлийәттә уларниң өзлири язмиғанлиқи, бәлки идарә катиплири тәрипидин йезилғанлиқ еһтималлиқини илгири сүрүшмәктә.

Илгири бу һәқтә пикир баян қилған, шинҗаң университетиниң сабиқ оқутқучиси қутлуқ алмас, уйғурлардин иҗтимаий пән саһәсидә хизмәт қиливатқан илмий хадимларниң һәрқанчә диққәт қилған тәқдирдиму, хитайниң титаң томуриға тегип кетиштин сақлиналмайдиғанлиқини илгири сүргән вә буни илимниң вә һәқиқәтниң күчи дәп тәсвирлигәниди.

Пикирләр (0)
Share
Толуқ бәт