Ürümchidiki ot apitide kishilerni qutquzush yolida pidakarliq körsetkenler alqishlanmaqta

Muxbirimiz gülchéhre
2022.12.01
Share on WhatsApp
Share on WhatsApp
urumchi-qamal-ot-apiti-iminjan.jpg Ürümchidiki qamal mezgilidiki ot apitide binaning ichide qamilip qalghan 3 kichik balini qutquzup, özi doxturxanining jiddiy qutquzushta dawaliniwatqan ürümchi pochta idarisi mashina etritidin iminjan isimlik yash. 2022-Yili noyabir, ürümchi.
Social Media

Bashqilarning hayatini qutquzush üchün pidakarliq körsetken qehrimanlar her qandaq jem'iyette, ortaq medhiyelinidighan yuqiri sherepke ige qehriman insanlardur. Ürümchidiki ot apitide ademlerni pidakarliq bilen qutquzghan kishiler ene shundaq medhiyeleshke érishken.

Ürümchi tengritagh rayonidiki köp qewetlik ahaliler olturaq binasida 24-noyabir kéchide yüz bergen ot apiti xitay dölet ichi we dunyada zor inkas qozghawatqan bir peytte, ijtima'iy taratqularda tarqiliwatqan sin körünüshliri we inkaslardin ashkarilinishiche, ot apiti yüz bergen binadiki asasliq ahale Uyghurlar bolup, ot apiti yüz bergende, binaning barliq ishikliri hetta jiddiy qutulush ishiklirimu simlar bilen baghlan'ghan we payatlan'ghan bolghachqa, amma ottin özini qutuldurushqa amalsiz qalghaniken.

Ot öchürüsh xadimliri yétip kélip uzun'ghiche mehellige we binaghimu yéqinlishalmay waqit israp qilghan. Ular 100 kündin ashqan qamal tedbirliri dawamida mehelle we qoruning kirish ishiklirige ornitilghan tosuqlarni buzush bilen helek boluwatqan peytte ot barghanche ulghiyip qewettin qewetke tutashqan, ot ichide qalghan balilarning, anilarning échinishliq chirqirighan, “Qutquzunglar” dep warqirighan awazlirigha chidimighan bir qanche Uyghur yigit öz hayatining xewpke uchrishigha qarimay, lawuldap köyüwatqan ot ichidikilerni qutquzushqa qatnashqan.

Ürümchidiki qamal mezgilidiki ot apitide binaning ichide qamilip qalghan besh ademni qutquzup chiqip oksigén yétishmesliktin doxturxanigha jiddiy qutquzuluwatqan abdulla ablet. 2022-Yili noyabir, ürümchi.
Ürümchidiki qamal mezgilidiki ot apitide binaning ichide qamilip qalghan besh ademni qutquzup chiqip oksigén yétishmesliktin doxturxanigha jiddiy qutquzuluwatqan abdulla ablet. 2022-Yili noyabir, ürümchi.
Social Media

Bir qanche neper pidakar Uyghur yashning qehrimanlarche ish-izliri süretliri bilen qoshup chongqur muhebbetlik mélodiyelerge kirishtürülüp ijtima'iy taratqularda tarqalmaqta.

Bu heqte Uyghur diyaridin tarqiliwatqan qisqa widiyolarni, xelq'araliq ijtima'iy taratqulargha yollap, ot uchqunida chaqnighan bu qehrimanliq hékayiliridin chet'ellerdiki Uyghur jama'itini xewerlendürüp kéliwatqanlardin, amérikadiki lagér shahiti zumret dawut, bu ot apitide pidakarliq körsetken qehrimanlar heqqide tarqalghan widiyolar köp ikenliki, ularning jama'et teripidin zor alqishlinip, paji'elerdin azablan'ghan Uyghurlargha ilham we ümid béghishlawatqanliqini bildürdi.

Radiyomizgha bir Uyghurning, bu qehrimanlarning “Doyin” hésabida, özige köngül bölgen ammigha qayturghan jawablirini menbe qilip ewetken uchurida éytilishiche, ot apitide qutquzushqa qatnashqan ikkiylenning biri abdulla ablet bolup, u besh ademni qutquzup chiqqan, kéyin oksigén yétishmey hoshidin ketkeniken. Hazir dawalashta bolup, u özining dowyin hésabida doxturxana jiddiy qutquzush bölümidiki süriti astigha “Yene ikki künde doxturxanidin chiqimen” dep yézip qoyghaniken.

Yene biri ürümchi pochta idarisi mashina etritidin iminjan isimlik yash bolup, u, otning ichidin üch kichik balini qutquzup chiqqaniken.

Dowyin qatarliq ijtima'iy taratqulardiki Uyghurlarning inkaslirida bu qehriman Uyghur yashliri yüksek insanperwerlik, pidakarliq we qehrimanliqning ülgisi süpitide medhiyelinish bilen bir waqitta, mehelle komitétliridiki peqet hökümetning yuqumni nölge chüshürüsh buyruqini ijra qilghuchi kadirliridiki insanliqning ölgenliki bilen küchlük sélishturma hasil qilin'ghan.

Ürümchidiki qamal mezgilidiki ot apitide binaning ichide qamilip qalghan besh ademni qutquzup chiqip oksigén yétishmesliktin doxturxanigha jiddiy qutquzuluwatqan abdulla ablet. 2022-Yili noyabir, ürümchi.
Ürümchidiki qamal mezgilidiki ot apitide binaning ichide qamilip qalghan besh ademni qutquzup chiqip oksigén yétishmesliktin doxturxanigha jiddiy qutquzuluwatqan abdulla ablet. 2022-Yili noyabir, ürümchi.
Social Media

Ot ketken binagha kirip balilarni qutquzup chiqish jeryanida yarilan'ghan bu Uyghur yashlirini ziyaret qilish üchün alaqilishishqa tirishqan bolsaqmu, hazirche mumkin bolmidi.

Muhajirettiki Uyghur qelemkeshlerdin, shiwétsiyediki rahile kamal xanim, Uyghurlarning ot ichidiki qérindashlirini qutquzush üchün körsetken pidakarliqni, ularning rohidiki millitige bolghan muhebbettin urghup chiqiwatqan qehrimanliq rohi dep medhiyelidi. U yene, bügünki künde Uyghurlar eng mohtaj boluwatqini del bu xil qehrimanliq ikenlikini, Uyghurlarning rohiyitidiki pidakarliq rohning meniwi qudritige sel qarimasliq kéreklikini otturigha qoydi.

Dunya Uyghur qurultiyining diniy ishlar komitéti re'isi, ölima turghunjan allawudin ependi bu heqte inkas qayturup: “Ürümchi ot weqeside meydan'gha kelgen bu qehrimanliqlar, irqiy qirghinchiliqqa uchrap, échinishliq wasitiler arqiliq diniy we milliy kimliki hem milliy rohi yoqitiliwatqan Uyghurlar üchün pütün milletning rohini urghutup, milletning qeddini ruslaydighan, insanliq, Uyghurluq, musulmanliq burchini ada qilishqa righbetlendüridighan rohtin ibarettur” dégenlerni otturigha qoydi.

Ürümchi ammisining ijtima'iy taratqularda tarqatqan uchurlirigha qarighanda, emeliyette bu ot apitini téz arida tizginlesh we bu paji'elerning aldini élish tamamen mumkin bolup, ot ketken binaning tinchliq yoli ot öchürüsh etriti bilen bolghan ariliqi 800 métirdin azraqla artuq, ana-balilar doxturxanisi bilen bolghan ariliqi 860 métirdin artuq, Uyghur aptonom rayonluq xelq doxturxanisi bilen bolghan ariliqimu aran 1.3 Kilométir kélidiken. Bolupmu, ot öchürüsh etriti bilen bolghan ariliqi aran 800 métirlar etrapida kélidighan mezkur binadiki birqanche qewetlerning arqimu-arqidin ot tutushup, kichik balilar, ayallarni öz ichige alghan köp ademning köyüp ölüshigiche ot öchürgüchilerning ünümlük qutquzush élip barmighanliqi hetta ürümchidiki xitay ahaliliriningmu naraziliqlirini qozghighan bolup, bu heqtiki inkaslar ijtima'iy taratqularni qaplidi.

Démek, ene shu ot apitide yuqirida ismi atalghan birqanche Uyghur yash öz hayatining xewpige uchrishigha qarimay ot ichige étilip kirip, ademlerni qutquzup qélishta rol oynap, medhiyeleshke érishkenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.