Отта көйүп кәткән қәмәрнисаниң йолдиши вә чоң оғлиниң түрмидә икәнлики дәлилләнди

Мухбиримиз шөһрәт һошур
2022.12.09
Отта көйүп кәткән қәмәрнисаниң йолдиши вә чоң оғлиниң түрмидә икәнлики дәлилләнди
Oqurmen teminligen

24-Ноябир үрүмчи от паҗиәси һәққидики хәвәрләрдә ечинишлиқ әһваллардин бири сүпитидә, паҗиәдә җан үзгән қәмәрнисаниң йолдиши мәмәтәли мәтнияз вә чоң оғли иляс мәмәтәлиләрниң түрмидә икәнлики тилға елинғаниди. Хитай тәрәп йошуруп келиватқан бу әһвални хәлқара ахбарат орунлири мәзкур аилиниң түркийәдә пәрзәнтлирини зиярәт қилиш арқилиқ оттуриға чиқарғаниди. Мухбиримизниң уйғур елигә қарита елип барған телефон зиярәтлири давамида мәзкур ата-балиниң керийә вә үрүмчидики түрмидә җаза муддитини өтәватқанлиқи айдиңлашти.

Хитай даирилири 24-ноябир үрүмчи от паҗиәси һәққидики ахбарат баянатида, от кәткән бинадикиләрниң йетәрлик дәриҗидә өзини қутқузуш иқтидари йоқ икәнликини илгири сүргән; мәзкур паҗиәдә һаятидин айрилғанлардин қәмәрнисаниң түркийәдики икки пәрзәнти болса от кәткән бинада ишикләрниң тақақ икәнлики, дадиси мәмәтәли мәтнияз билән акиси иляс мәмәтәлиниң түрмидә икәнликини тилға елип, мәзкур паҗиәниң җавабкари хитай һөкүмити икәнликини тилға алғаниди. Қәмәрнисаниң акисиниң оғли-нөвәттә шветсарийәдә яшаватқан абдулһепиз мәмтиминму қәмәрнисаниң йолдиши вә чоң оғлидин башқа дадиси вә икки акисиниңму түрмидә икәнликини ашкарилиди.

Дейилишичә, қәмәрниса аилиси әслидә хотәнниң илчи йезисидин болуп, кейинчә үрүмчигә йөткәлгәникән.

Үрүмчиниң өт кәткән бина тәвәликидики ғалибийәт сақчиханиси, қәмәрнисаниң йолдиши вә чоң оғли һәққидә мәлумат берәлмиди. Андин биз хотән шәһәр ичидики нурбағ сақчиханисиға телефон қилдуқ. Бу сақчихана хадими үрүмчи от апитидин кейин, бу һәқтә йиғинлар ечилғанлиқи вә от бихәтәрлик тәдбирлириниң күчәйтилгәнликини тилға алди. Абдулһепизниң дейишичә, мәмәтәли чәтәлгә чиққан вақитлиридила сақчилар тәрипидин сүрүштә қилинған вә оғли иляс сақчиханиға чақиртилип сорақ қилинған, 2017-йилиға кәлгәндә, мәтнияз билән иляс мәмәтәли 10 вә 12 йиллиқтин кесилгән.

Илгирики хәвәрлиримиздин мәлум болушичә, 2017-йилдин кейинки чоң тутқунда, тутқунларниң көпинчиси туруватқан йеридики әмәс, әсли юртидики сақчиларға өткүзүп берилгән. Хотән шәһәр ичидики сақчи хадимлириму, аял-балилири от апитидә өлүп кәткән қәмәрнисаниң йолдиши вә оғлиниң қайси түрмидә икәнликидин илчидики алақидар сақчи вә әдлийә хадимлириниң хәвири барлиқини ейтти.

Телефонимизни қобул қилған илчидики бир аманлиқ мудири, мәмәтәли мәтниязниң 10 йиллиқ кесилгәнлики вә нөвәттә керийә түрмисидә җаза муддитини өтәватқанлиқини ашкарилиди.

Абдулһипиз мәмтимин, мәзкур дада балиниң җаза муддитини ақсудики бир биңтуән түрмисидә өтәватқанлиқи һәққидә җәмийәттин учур алған. Әмма мәзкур аманлиқ мудири, мәмәтәлиниң керийә түрмисидә икәнликини билдүрүш билән бирликтә, оғли илясни үрүмчидики бир түрмидә дәп аңлиғанлиқини тилға алди.

Абдулһепизниң дейишичә мәмәтәли мәтнияз өзини сағлам вә ярамлиқ әвлад йетиштүрүшкә беғишлиған бир дада икән. Шуңа у, пиланлиқ туғут сиясиити қаттиқ иҗра қилиниватқан чағларда еғир иқтисадий җәриманиләрни төләш вә бәзидә нопус йөткәш арқилиқ, аялини бала чүшүрүш оператисийәлиридин қоғдап қалған вә 10 балини қатарға қатқаникән.

У қаш теши содиси билән қәд көтүргән тиҗарәтчиләрдин болуп, у мәблиғиниң зор бир қисмини пәрзәнтлириниң маарип тәрбийәсигә сәрп қилған. У бир пәрзәнтини әрәб бирләшмә хәлипиликигә елип чиқип оқушқа орунлаштурған. Арқидин икки пәрзәнтини мисирда оқушқа йолға салған. Мәлум болушичә, униң аилисиниң бәхт-саадити вә җәмийәтниң йүксилиши үчүн көрсәткән бу тиришчанлиқлири 2017-йилдики чоң тутқунда дөләт бихәтәрликигә тәһдит шәкилләндүргән җинайәт дәп қаралған. Мәзкур аманлиқ мудири, мәмәтәли мәтниязниң пиланлиқ туғутқа хилаплиқ қилиш, қанунсиз диний паалийәтләр билән шуғуллиниш вә сәзгүр дөләтләрни зиярәт қилиш қатарлиқ бирқанчә аталмиш җинайәт билән әйибләнгәнликини дәлиллиди.

Юқирида, 24‏-ноябир үрүмчи от паҗиәсидә һаятидин айрилған қәмәрнисаниң йолдиши вә чоң оғлиниң түрмидә икәнликиниң дәлилләнгәнлики тоғрулуқ аңлитиш бәрдуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.