Gollandiyediki “Ürümchi Uyghur risturani” da gollandiye parlaménit ezalirigha teshekkür bildürüsh pa'aliyiti ötküzülgen

Gollandiyening rottérdam shehiridiki “Ürümchi Uyghur réstorani” ning xojayini zeynidin tursun ependi uyushturghan gollandiye parlaméntigha teshekkür éytish pa'aliyitidin körünüsh. 2021-Yili 21-may, gollandiye.

Gollandiye parlaménti xitayning Uyghurlargha yürgüziwatqan zulumlirini “Irqiy qirghinchiliq” dep élan qilghandin kéyin, gollandiyening rottérdam shehridiki “Ürümchi Uyghur risturani” ning xojayini zeynidin tursun ependi buninggha teshekkür éytish pa'aliyiti uyushturghan. U gollandiye parlaméntidiki Uyghurlarni qollighan parlamént ezalirigha rehmet éytish we Uyghurlarning hazir béshigha kéliwatqan bu zulumlarni téximu köp gollandiye jama'itige anglitish üchün özining réstorani namidin Uyghur medeniyiti we Uyghur ta'amlirini tonushturushni asas qilghan ta'am pa'aliyiti ötküzgen.

Bu pa'aliyet bir ayliq teyyarliqtin kéyin 5-ayning 21-küni halda resmiy bashlan'ghan bolup, yene bir mezgil dawamlishidiken

Zeynidin tursun ependining éytishiche, Uyghur meslisini gollandiyediki taratqu urunliri radiyo we gézit-zhornallarda omumiyyüzlük tonushturush üchün 4-ayning 21künidin bashlap chong kölemlik teyyarliq qilghan. Bu pa'aliyetning orunlashturulushigha xelq'ara kechürüm teshkilatining gollandiye shöbisi hemkarlashqan.

Zeynidin tursun ependining bildürüshiche, “Ürümchi réstorani” bu qétimliq pa'aliyet jeryanida, “Uyghur qirghinchiliqi” ni gollandiyede étirap qilghuzushta küch chiqarghan alte neper parlamént ezasigha alahide tamaq yetküzüp özlirining rehmitini bildürgen. Emma mezkur parlamént ezaliri özlirining isim-famililirini ashkarilashni xalimaydighanliqini bildürgen.

Zeynidin ependi yene xelq'ara kechürüm teshkilati gollandiye shöbisining mudiri daxmar awdishun xanimning bu pa'aliyet üchün alahide küch chiqarghanliqini, uning taratqular ziyaritide Uyghurlar üchün söz qilghanliqini bildürdi.

Bu qétimliq pa'aliyet gollandiye parlaméntidiki Uyghur mesilisige yéqindin yardemde bolup qollap kéliwatqan parlamént ezalirigha rehmet éytishtin bashqa yene keng gollandiye ammisigha Uyghur ta'am medeniyiti we Uyghurlarning hazirqi weziyitini tonushturushnimu meqset qilghan iken.

Bu pa'aliyet jeryanda méhmanlargha Uyghur millitining qisqiche tarixi, Uyghurlarning hazirqi ehwali, Uyghur medeniyiti, Uyghur maqal-temsilliri tonushturulghan. Réstoran'gha teklip qilin'ghan gollandiyelik méhmanlar Uyghurlar heqqide eng yéngi melumatlargha érishken.

Igilishimizche, “Ürümchi Uyghur résturni” da sétilwatqan ta'amlarning türi kündin kün'ge köpiyiwatqan bolup, xéridarlarning alqishigha érishmektiken.

Rottérdamdiki “Ürümchi Uyghur risturani” échilghinigha 6 yil bolghan bulup, zeynidin tursun ependi ilgiri bu risturan namida Uyghur kimliki we medeniyiyini tonutush mezmun qilin'ghan köpligen ijtima'iy we medeniyet pa'aliyi'etlirini ilip barghan.

Zeynidin tursun ependining bildürüshiche, uning réstoranida ötküzülgen bu qétimliqi pa'aliyet burunqi pa'aliyetlerge qarighanda kölimi zor, tesiri küchlük bolghan pa'aliyet hésablinidiken.

Zeynidin tursun ependi dunya Uyghur qurultiyining medeniyet ishliri boyiche muhim ezasi bolup, u öz nöwitide yene xelq'ara kechürüm teshkilatiningmu ezasi iken. U yéqinqi yillardin buyan Uyghur mesilisi we jaza lagérlirini tonutush üchün siyasiy pa'aliyetlirini üzlüksiz dawam qilip kelmektiken.

Bu yil 26-féwral küni gollandiye parlaménti xitayning Uyghurlargha yürgüziwatqan zulumlirini “Irqiy qirghinchiliq” dep élan qilghan idi.