Tashkentte ötken xelq'ara ussul musabiqiside Uyghur yigiti mukapatqa érishti

Besh döletning tallan'ghan ussulchiliri qatnashqan “Yipek yoli sen'iti” mawzusidiki ussul sen'iti boyiche xelq'ara musabiqining ghalibi rehmetjan yoldashéf. 2023-Yil 26-mart, tashkent, özbékistan.

23-26-Mart künliri özbékistan paytexti tashkent shehiride “Sen'et we medeniy miras” layihesige kirgen “Yipek yoli sen'iti” mawzusida köp zhanirliq we ussul sen'iti boyiche xelq'ara musabiqe bolup ötti. Besh döletning tallan'ghan ussulchiliri qatnashqan bu musabiqide qazaqistanliq rexmetjan yoldashéf bash mukapatqa érishti.

Qazaqistanning “Qazaqaxbarat”, “Zakon”, “Litér”, “Élorda” qatarliq inawetlik ammiwi axbarat wasitilirining 27-marttiki xewerliridin melum bolushiche, tashkentte ötken xelq'ara ussul musabiqisige bélarus, qazaqistan, qirghizistan, rusiye we özbékistanning ussul, naxsha we muzikiliq tiyatir saheliride pa'aliyet élip bériwatqan kolléktipliri hem yekke artisliri qatnashqan. Mezkur musabiqining meqsiti xelqlerning medeniy tereqqiyatigha yardemlishishke, eller arisidiki dostluqni mustehkemleshke, talantliq yashlarni hertereplime qollap-quwwetleshke qaritilghan.

Xewerlerge qarighanda, qazaqistan qoralliq küchliri milliy herbiy-wetenperwerlik merkizining almutadiki shöbisining ussul guruppisining ussulchisi, qatardiki jengchi rexmetjan yoldashéf Uyghur xelq “Tawaq ussuli” ni ijra qilghan. Musabiqe qaziliri uning bu yekke ussulini yuqiri bahalap, pexriy yarliq we birinchi bash mukapat bilen teqdirligen.

Biz rexmetjan yoldashéf bilen alaqileshkinimizde, u mundaq dédi: “Méning sen'etke kélishimge, birinchidin, ata-anam seweb boldi, chünki ularning her ikkisi sen'etkar bolup, shularning terbiyesini aldim. Hélimu ésimde, mektepte oquwatqan chaghlirimda naxsha éytip, ussul oynashni yaxshi körettim. Bolupmu ‛ghunche‚ balilar tiyatirining konsértlirigha qatniship, sehnining, tamashibinning qandaq bolidighanliqini, sehnide özini qandaq tutush kéreklikini chüshendim. Ottura mektepni püttürüp, ürümchidiki sen'et institutida bir yil oqudum, andin oqushumni almutadiki ussul sen'iti mektipide dawam qildim. U yerde üch yil bilim élip, hazirqi quddus ghojamyarof namidiki dölet akadémiyelik Uyghur muzikiliq komédiye tiyatirigha ishqa orunlashtim. Kéyin qazaqistanning otar shehiridiki herbiy qisimning ansambilida ishlidim”.

Rexmetjan yoldashéf ata-anisining we ustazlirining mesliheti we yardimi bilen aliy melumatliq bolghanliqini bildürdi.

“Shu waqitlarda rusiyening chélyabinsk shehiridiki ijtima'iy penler institutida oqup, aliy bilimlik boldum. Andin yene tiyatirda ikki yil emgek qilip, andin herbiy-wetenperwerlik merkizige xizmetke yötkeldim. Mushu jeryanda men köp nersini kördüm, ögendim, özümni sinidim. Mushuning barliqi méning tashkenttiki ussul musabiqisining bash mukapatigha érishishimge asas boldi, dep oylaymen. Elwette, uninggha tejribilik ussulchilar qatniship, ularning barliqi özlirining chirayliq hünerlirini namayish qildi. Shular ichidin bash mukapatni qolgha keltürgenlikim méning üchün kütülmigen weqe boldi. Bu peqet méningla utuqum emes, belki méning ustazlirimningmu, ata-anamningmu, pütkül xelqimningmu utuqi désem, ashurup éytqan bolmaymen”.

U yene tashkentte ötken yene bir sen'et musabiqisige qatniship, 1-orun igiligenlikinimu bildürdi.

Rexmetjan yoldashéfning kespiy ussulchi derijisige yétishige qazaqistanning xizmet körsetken artisi, Uyghur tiyatirining bash ussul yétekchisi, proféssor gülnare sayitowa hem dangliq ussulchi, “Qazaqistanning medeniyet elachisi” médalining sahibi élmira seydullayéwa chong rol oynidi.

Élmira seydullayéwa xanim rexmetjanni kichikidin yaxshi bilidighanliqini, uning bek tirishchan bolup, aldigha qoyghan meqsitidin héch qaytmaydighan bala bolup öskenlikini otturigha qoydi.

U bolupmu köpligen Uyghur yash sen'etkarlirining yétilip chiqishida Uyghur élining tesiri bolghanliqini bildürüp, mundaq dédi: “Xatalashmisam, 8-sinipta oquwatqan waqtida ürümchi shehiridin ustazlar kélip, ürümchidiki sen'et institutida bir yilliq oqush oquydighan'gha yashlarni tallidi. Shu waqitta rexmetjan yashlar arisida shu yaqqa atlinidu. Men üch aydin kéyin bérip, rexmetjan bilen yéqindin tonushtuq. Rexmetjanning kespiy ussulchi ikenliki shu ürümchide bashlandi. Chünki ürümchidiki sen'et mektipi bizning sen'itimiz tarixining qaynimi. Shu qaynamda rexmetjan özining qedemlirini durus bashlidi. U yerde bizge ataqliq ussulchilar, proféssorlar derslerni berdi hem shu balilarning ichidin rexmetjan özini yaxshi tereptin körsetti”.

Élmira seydullayéwa rexmetjan yoldashéfning qabiliyitini bayqighan sen'etkarlarning uni ürümchide ötken konsértlargha hem ussulchi hem riyasetchi süpitidimu köp qétim teklip qilghanliqini, “Dolan” ussulinimu tunjilardin bolup ögen'genlikini, shuning bilen uning kespiy ussulchi derijisige yetkenlikini bayan qildi. U tashkentte yash artisning yetken utuqining shuning bir yarqin delili bolghanliqini körsetti.

Élmira seydullayéwa yene yashlarning kespiy ussulchi bolush üchün köp tirishchanliq körsitish lazimliqini bildürdi.

Igilishimizche, qazaqistanning almuta shehiride orunlashqan zhürgénéf namidiki qazaq milliy sen'et akadémiyeside, chaykowskiy namidiki sen'et mektipide échilghan Uyghur bölümliri, bashqimu sen'et mektepliri köpligen Uyghur yashlirini terbiyelep chiqqan. Ularning köpchiliki hazir Uyghur tiyatiri we bashqimu sen'et ömekliride xizmet qilmaqta.