Уйғур академийәси өзиниң йеңи хизмәт дәврини башлиди

Ихтиярий мухбиримиз әркин тарим
2021-06-21
Share
Уйғур академийәси өзиниң йеңи хизмәт дәврини башлиди Уйғур академийәси вәхписиниң рәиси доктор пәрһат қурбан тәңритағли(солда) билән кеңәш һәйәт әзаси проф. Др. Алимҗан инайәт әпәнди. 2021-Йили 19-июн, түркийә.
RFA/Erkin Tarim

Уйғур академийәси 19-июн күни истанбулда чақирған 5-нөвәтлик омумий йиғинида, уйғур академийәсиниң өзгәртип қуруп чиқилип, буниңдин кейин "уйғур академийәси вәхписи" намида паалийәт қилидиғанлиқини җакарлиди. Бу қетим йәнә уйғур академийәси вәхписиниң йеңи рәһбәрликиму сайлап чиқилған.

Түркийә вә шәрқий түркистанниң истиқлал марши билән башланған йиғинда алди билән уйғур академийәсиниң рәиси, измирдики әгә университети профессори алимҗан инайәт әпәнди уйғур академийәсиниң 2018-йилидин буянқи 3 йиллиқ хизмитидин доклат бәрди. У, доклатида 3 йил җәрянида қолға кәлтүрүлгән нәтиҗиләр вә йетәрсизликләр тоғрисида тохталди.

Алимҗан инайәт әпәнди йиғинда уйғур академийәси башқуруш һәйити әзалириниң 2020-йилиниң ахирида, уйғур академийәсиниң хизмәт даирисини кеңәйтиш мәқсити билән академийәни вәхпигә айландурушни қарар қилип, мунасивәтлик рәсмийәтләрни беҗирип, 2021-йили 5-айниң 9-күни рәсмий тәстиқлашқа еришкәнликини билдүрди.

Арқидин йиғинниң күн тәртипигә бинаән уйғур академийәси вәхписиниң йеңи рәһбәрлик һәйити демократик йоллар билән сайлап чиқилди. Сайламда, 2018-йилидин 2021-йилиғичә уйғур академийәсиниң баш катипилиқ вәзиписини өтигән доктор пәрһат қурбан тәңритағли әпәнди уйғур академийәси вәхписиниң тунҗи қетимлиқ рәисликигә, алимҗан инайәт әпәнди болса 11 кишилик кеңәш һәйитиниң рәисликигә сайланди.

Уйғур академийәсиниң 5-нөвәтлик омумий йиғинидин көрүнүш. 2021-Йили 19-июн, түркийә.

Уйғур академийәси вәхписиниң кеңәш һәйити рәисликигә сайланған алимҗан инайәт әпәнди мәзкур вәхпини қуруштики мәқсити һәққидә тохталди.

Уйғур академийәси вәхписиниң муавин рәиси абдулхәмит қарахан әпәнди мәзкур вәхпиниң уйғур академийәсиниң хизмәтлирини давамлаштуридиғанлиқини, әзалириниңму өзгәрмәйдиғанлиқини баян қилди.

Уйғур академийәси 2009-йили 9-айниң 9-күни түркийәдики 9 уйғур зиялийси тәрипидин қурулған болуп, 12 йилға йеқин вақит ичидә нурғун хизмәтләрни қилған. Алимҗан инайәт әпәнди бу һәқтә тохталди.

Уйғур академийәси вәхписиниң рәиси пәрһат қурбан тәңритағли әпәнди зияритимизни қобул қилип, йошурун беләт ташлаш арқилиқ өзиниң рәисликкә сайланғанлиқини, өзини бу вәзипигә лайиқ көргән зиялийларға рәһмәт етидиғанлиқини, тиришип ишләп уйғур хәлқиниң өзидин күткән үмидини йәрдә қоймайдиғанлиқини ейтти.

Уйғур академийәси вәхписиниң 11 кишидин тәркиб тапқан кеңәш һәйитиниң әзалиридин абдулхәмит қарахан билән доктор мәғпирәт камал ханим муавин рәисликкә, доктор шәвкәт насир әпәнди баш катиплиққа, доктор бурһан улуғйол әпәнди малийә ишлири мудирлиқиға, доктор раһилә қәшқәрли ханим билән доктор алий әхмәтбәйоғлу әпәнди башқуруш һәйити әзалиқиға сайланди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт