Уйғур академийәси йеңи хизмәт пилани түзүп чиқти

Ихтиярий мухбиримиз азиғ
2021-07-12
Share
Уйғур академийәси йеңи хизмәт пилани түзүп чиқти
Photo: RFA

Уйғур академийәси фонди җәмийити 10-июл вә 11-июл күни уйғур академийәси қармиқида омумий һәйәтләр йиғини вә яш таянч күчләрниң музакирә йиғини өткүзди.

10-Июл күни истанбулдики уйғур академийәси ишханисида өткүзүлгән һәйәтләр кеңәш йиғинида йеңи хизмәт йилида қилишқа тегишлик хизмәтләр бәлгиләнди вә йеңи хизмәт гурупписи тәшкилләнди.

Уйғур академийәси фонди җәмийитиниң омумий һәйәт йиғиниға уйғур мәсилиси үстидә йиллардин буян тиришчанлиқ көрситип келиватқан журналистлар, илмий хадимлар вә иҗтимаий паалийәтчиләр иштирак қилған болуп, улар илмий вә тәтқиқат саһәсидә хитайға қарши үнүмлүк паалийәтләрни елип бериш үчүн бәзи пиланлар оттуриға қоюлди.

Йиғинда уйғур академийәси узундин буян тәшәббус қилип кәлгән мәһмуд қәшқәри университетини қуруш пилани тәпсилий музакирә қилинди вә бу пилан әтрапида конкрет хизмәт нишани түзүлди.

Уйғур академийәси фонди җәмийитиниң рәиси пәрһат қурбан тәңритағли әпәнди зияритимизни қобул қилип мәзкур йиғинниң мәқсити, нишани вә елинған қарарлар һәққидә тәпсилий мәлумат бәрди.

Уйғур академийиси яш таянч күчләрниң музакирә йиғинидин көрүнүш. 2021-Йили 11-июл, истанбул.
Уйғур академийиси яш таянч күчләрниң музакирә йиғинидин көрүнүш. 2021-Йили 11-июл, истанбул.

11-Июл күни уйғур академийиси яш таянч күчләрниң музакирә йиғинини өткүзгән болуп, йиғинда уйғур оқуғучиларни тәрбийәләш мәсилиси муһим салмақни игилигән.

Йиғинда уйғур академийәсиниң бундин бурун давамлаштуруп келиватқан тәлим-тәрбийә хизмитини техиму үнүмлүк давамлаштуруш билән мунасивәтлик мәсилиләр мулаһизә қилинған вә конкрет пиланлар түзүлгән.

Мәзкур йиғинға қатнашқан истанбул тиҗарәт университети компютер инженерлиқи кәспиниң магистер аспиранти әнвәр әхмәт зияритимизни қобул қилип, яш таянч күчләр музакирә йиғининиң мәқсити вә илинған қарарлар һәққидә тәпсилий мәлумат бәрди.

Уйғур академийәсиниң муавин рәиси абдулһәмид қарахан әпәндим зияритимизни қобул қилип, икки йиғинниң орунлаштурулуши вә уйғур академийәсиниң бундин кейинки хизмәт йөнилиши һәққидә мәлумат бәрди.

2009-Йили истанбулда қурулған уйғур академийәси өзиниң хизмәт даирисини кеңәйтишни мәқсәт қилип, уйғур академийәсини вәхпигә айландурушни қарар қилған иди. Буниң билән 2021-йили 9-май күни уйғур академийәси фонди җәмийәт сүпитидә әнгә илинғанлиқини рәсмий җакарлиди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт