Ghuljada ahalilerni adem etkeschilirining ziyankeshlikidin saqlinishqa chaqirghan nijat isimlik yash tutqun qilin'ghan

Ghuljadiki ghayip balilar heqqide élip barghan éniqlashlirimiz dawamida, da'irilerning weqe yüz bergendin kéyin ghayip balilar yaki adem etkeschilirini izdeshtin bekrek bu weqe heqqide uchur tarqatqanlarni qattiq kontrol qiliwatqanliqi ashkarlandi. Delillinishiche, toxuchiyüzde 13 yashliq abdulla raxmanjanning jesiti tépilghandin kéyin, “Tik-tok” topida mexsus söz qilip, ahalilerni hushyar bolushqa chaqirghan nijat isimlik yash ötken heptining axiri tutqun qilin'ghan

Ghuljada yüz bergen bala yütüp kétish weqeliri heqqide élip barghan téléfon ziyaretlirimiz dawamida, bezi ahaliler saqchilarning weqe yüz bergendin kéyin yütüp ketken bala yaki adem etkeschilirini izdeshtin bekrek weqe heqqidiki uchurlarni kontrol qilish we uchur tarqatquchilarni izdeshke küch serp qilghanliqini inkas qildi. Bezi ahaliler mana mushu uchur kontrolliqining qattiqliqi sewebidin baliliri ghayib bolghan bezi ata-anilarning saqchilargha bérip ehwal inkas qilishqimu jür'et qilalmaywatqanliqini otturigha qoydi. Ghulja nahiyesidiki bir saqchi xadimimu toxuchiyüzde abdulla raxmanjan isimlik balining jesiti tépilghandin kéyin, özlirining aldi bilen uchurni kontrol qilish üchün jiddiy heriketke ötkenlikini ashkarilidi. Ghulja nahiyesidiki yene bir amanliq xadimi bala yütüsh weqesi heqqide uchur tarqatqan balilardin öz kentidin 4 kishining tutulghanliqi, bulardin birsi qoyup bérilip qalghan üchining téxiche tutup turuluwatqanliqini ashkarilidi. Saqchilar nahiye boyiche ghayib balilar heqqide uchur tarqatqan qanchilik kishining tutulghanliqi heqqidiki so'alimizgha jawap bérishni keskin ret qildi.

Ötken hepte ijtima'iy taratqularda ghulja nahiyesidiki nijat isimlik bir balining mezkur weqeler heqqide uchur tarqatqanliqi üchün élan qilghan bir töwiname bayanati tarqalghan idi. Biz bu heqtimu éniqlash élip barduq. Éniqlashlirimiz dawamida alaqidar bir saqchi xadimi bu weqege alaqidar tutqunlardin biri süpitide nijat isimlik balini tilgha aldi. Emma u nijatning öz bashqurushidiki yéza tewelikidin emeslikini eskertip, uning kimliki heqqide tepsiliy melumat bermidi.

Melum bolushiche, nijat gerche bala yütüsh weqesi heqqide uchur tarqatqan eng deslepki yaki birdin-bir shexs emes, uning üstige u ishligen widiyosida birer éghir hökümetke qarshi gep qollan'ghanmu emes. Perez qilinishiche, u peqet ziyankeshlikke uchrighuchigha qarita héssidashliq tonida gep qilghanliqi, bolupmu ahalilerni hushyarliqqa chaqirghanliqi üchün da'iriler bu widiyodin bi'aram bolghan we'uni töwiname élan qilishqa mejburlighan.

Apet xaraktérlik weqelerge duch kelgende, qolum-qoshnilirini agahlandurush, yurt-jama'etni herketke chaqirish, Uyghur jama'etchilik exlaqining muhim terkibiy qisimliridindur. Melum bolushiche, nijat isimlik yash mana mushundaq eqelliy bir mejburiyitini ada qilghanliqi üchünla tutqun qilin'ghan. Emma uning nede tutup turuluwatqanliqi we uni qandaq bir jazaning kütüp turuwatqanliqi hazirche melum emes.