Qazaqistanliq bokschi hézim izbaqi: “Amérikada öz xelqimni tonutqanliqimdin xushalmen”

Yéqindin buyan qazaqistanning ijtima'iy taratqulirida qazaqistanliq tenheriketchi hézim izbaqining amérikagha bérip, boks musabiqiside chémpiyon bolghanliqi heqqide uchurlar tarqilishqa bashlighan idi. Xewerlerge qarighanda, u oklaxoma shtatining brokén arraw shehiride ötküzülgen éghir derijidiki bokschilar musabiqisige qatniship, yekmuyek élishishta armont samérsni yenggen. Hézim izbaqi almuta wilayitining Uyghurlar zich olturaqlashqan chélek yézisidin bolup, shu yerde oqup, meshiqlen'gen.

Biz hézim izbaqining ötken küni amérikadin qaytip kelgenlikini bilip, uning bilen alaqileshtuq. Hézim izbaqi ziyaritimizni qobul qilip, özining boks tenheriketchisi bolup yétilish tarixini mundaq dep chüshendürdi: “Méning akam tenheriketke barghandin kéyin, uning arqisidin menmu uning trénéri malik xeyrullin'gha bardim. Kéyin almutagha hémit toxtaxunofqa bérip, kikboksing, yeni erkin mushtlishishtin hun'gariyede ötküzülgen musabiqide 3-orunni élip keldim. Kéyin akamning arqisidin bardim”.

Igilishimizche, hézim tursun oghli izbaqi 1994-yili almuta wilayitining chélek yézisida tughulup, shu yézidiki abdulla rozibaqiyéf namidiki ottura mektepni tamamlighan. U kichikidin tartip boks, kikboksing we tenheriketning bashqa türliri boyiche chéniqqan we jumhuriyet boyiche bir qatar musabiqilerge qatniship, chémpiyon atalghan. Hézim izbaqi qazaqistan jumhuriyitining tenheriket mahiri atiqining namzati, köp tereplimilik chélishish boyiche qazaqistanning xizmet körsetken tenheriket mahiri.

Hézim izbaqi sözini dawamlashturup, yene mundaq dédi؛ “Amérikadiki musabiqige ukra'ina, rusiye, özbékistan, amérika we méksika bokschiliri qatnashti. Men qazaqistanda turuwatqanliqtin özümni qazaqistanning puqrasi süpitide Uyghurlardin birinchi bolup qazaqistanni kespiy meydanda kötürginimge xushalmen. Ikkinchidin, özümning Uyghur xelqimni tonutqanliqimdin xushalmen.”

Radiyomiz ziyaritini qobul qilghan, hazir chélek yézisida yashawatqan töt balining anisi tursun'ay hede mundaq dédi: “Chong oghlum ezizmu kichikidin boksqa barghan. Uning trénéri malik xayrullin uni musabiqilerge élip bardi. Uninggha inimiz shawket hamiyliq qilip, amérikagha ewetti.”

Tursun'ay hede kichik oghli hézimningmu hem oqup, hem boks bilen shughullinip ülgürgenlikini bildürdi. “Kichikini men oylimighan. U oqushlarni püttürüp, menmu akamgha oxshash bolimen dep, meshiqlerge bardi. Umu musabiqilerge qatniship yürdi. Uning amérikagha bérip, musabiqige qatnishish armini bar idi. Hézimni hazir körüp, xushal boluwatimen.”

Biz hézimning trénéri, “Fréé sparing” birleshmisining prézidénti, qazaqistanning xizmet körsetken trénéri, chambashchiliq we boks boyiche xelq'ara tenheriket mahiri hémit toxtaxunof bilen söhbetleshtuq. U mundaq dédi: “Hézimni aldi bilen kikboksingda teyyarliduq. U yuqiri derijilerge yetti. Ikkimiz sözliship, kespiy boksni alduq. Bashta körüp baqtuq. Qarisaq, yaxshi mangdi. Shuning bilen amérika bilen kélishimler tüzduq. Hézim ukimiz yaxshi netijilerni körsitip kéliwatidu.”

Hémit toxtaxunofning éytishiche, hazir qazaqistanda Uyghurlardin boks boyiche köpligen yashlar yétilip chiqiwatqan iken. U eziz izbaqi we dilmurat mijitoftin köp ümid kütidighanliqini otturigha qoydi.