Er-ayal Uyghur doktorlirining muweppeqiyiti: türkiyede échilghan ikki chong doxturxana

Ixtiyariy muxbirimiz erkin tarim
2021-10-25
Share
Er-ayal Uyghur doktorlirining muweppeqiyiti: türkiyede échilghan ikki chong doxturxana Doktor abdukérim bughra bilen ayali doktor amine bughra "Forum dént chish we éghiz salametliki merkizi" namida achqan chish doxturxanisi aldida. 2021-Yili 23-öktebir, enqere.
RFA/Erkin Tarim

Türkiyede chish doxturiliq saheside oqup yétishken doktor abdukérim bughra bilen ayali doktor amine bughra türkiyening paytexti enqere shehiride "Forum dént chish we éghiz salametliki merkizi" namida yéngi doxturxanisini échip, özlirining kespi sahesidiki yéngi muweppeqiyetlirini yene bir pelle yuqiri kötürgenlikini namayan qildi.

Bu, türkiyediki Uyghurlarning hayatidiki muhim yéngiliqlardin biri hésablinidu. 10-Ayning 23-küni mezkur doxturxanining échilip ish bashlash murasimi ötküzülgen bolup, mezkur murasimgha "Iyi" partiyesidin bolghan parlamént ezasi fahrettin yoqush ependi, "Büyük birlik" partiyesi mu'awin re'isi aliy késer ependi, "Kélechek" partiyesi mu'awin re'isi fatma marash xanim, dunya Uyghur qurultiyi rehberliri, sherqiy türkistan teshkilatlar birliki re'isi hidayettulla oghuzxan ependi we abdukérim bughra bilen amine bughraning oqutquchiliri, kesipdash dostliri shuningdek türkiyening her qaysi jayliridin kelgen Uyghurlardin bolup köp sanda kishi ishtirak qildi. Échilish murasimi enqerediki chong jame imamining du'asi bilen bashlandi.

"Forum dént chish we éghiz salametliki merkizi" abdukérim bughra a'ilisining yéqinqi birqanche yillar ichide achqan ikkinchi doxturxana bolup, yéngidin échilghan mezkur doxturxanida 5 chish doxturi we bashqa xadimlar xizmet qilidiken.

Doktor abdukérim bughra bilen ayali doktor amine bughra
Doktor abdukérim bughra bilen ayali doktor amine bughra "Forum dént chish we éghiz salametliki merkizi" namida achqan chish doxturxanisining échilish murasimida lénta késish murasimi. 2021-Yili 23-öktebir, enqere.

Abdukérim bughra bilen ayali amine bughra 2000-yillarda Uyghur élidin türkiyege oqushqa kélip, tiriship oqup magistirliq we doktorluq unwani élip netije qazan'ghan Uyghurlardin hésablinidu.

Türkiyening paytexti enqere shehirining kéchi'ören rayonida échilghan "Forum dént chish we éghiz salametliki merkizi" ning ish bashlash murasimida doxtur abdukérim bughra ependi bilen uning ayali doktor amine xanimni ziyaret qilduq.

Abdukérim bughraning bayan qilishiche, u 1977-yili 9-ayning 1-küni qarimay shehiride tughulghan. 1978-Yili dadisining xizmiti munasiwiti bilen poskam néfitlikige köchüp barghan. Bashlan'ghuch we toluqsiz ottura mektepni poskamda oqughandin kéyin xitayning nenjing shehirige toluq ottura mektepni oqush üchün ewetilgen. Tunji qarar ichkiri xitayda toluq ottura mektepte oqush üchün ewetilgen 32 oqughuchi arisidin orun alghan abdukérim bughra 1996-yili béyjing merkizi milletler uniwérsitétining teyyarliq sinipida bir yil oqughan. 1997-Yilidin 2002-yilighiche shinjang tébbiy uniwérsitétining chish we éghiz boshluqi fakultétida oqughan. 2005-Yili magistir we doktorluq unwani üchün oqush meqsitide türkiyege kelgen abdukérim bughra ependi 2013-yili enqere ghazi uniwérsitéti chish doxturiliq fakultétining éghiz boshluqini dawalash we tüzesh kespide doktorluq unwani aldi.

Doktor abdukérim bughra bilen ayali doktor amine bughra
Doktor abdukérim bughra bilen ayali doktor amine bughra "Forum dént chish we éghiz salametliki merkizi" namida achqan chish doxturxanisining üskünilirining biri. 2021-Yili 23-öktebir, enqere.

Doktor abdukérim bughra ependi, hazirghiche köp sanda xelq'araliq ilmiy muhakime yighinlirigha qatnashqandin sirt yene özi yawropa ölchemlirige toshidighan 2 doxturxana échish sewiyesige yetken. U, öz kespide muweppeqiyetlerni qolgha keltürgendin sirt sherqiy türkistan tetqiqat wexpisining qurghuchiliri ichidin orun élip, mezkur wexpining re'islik wezipisini ötmekte. U, Uyghur dewasighimu zor töhpilerni qoshuwatqan Uyghur ziyaliyliridin biri hésablinidu.

Amine xanim ziyaritimiz jeryanida özining qisqiche hayat musapisi heqqide melumat berdi. U, 1979-yili ürümchide tughulghan bolup, 1997-yilidin 2003-yilighiche béyjing uniwérsitéti éghiz boshluqi dawalash kespide oqughan. U, ürümchidiki 2-doxturxanida bir mezgil ishligendin kéyin türkiyege kélip oqup chish doxturiliq kespide magistirliq we doktorluq unwani alghan. .

Abdukérim bughra ependi türkiyede oqush jeryanida köp qiyinchiliqlargha duch kelgenlikini, lékin japa-musheqqettin qorqmay tiriship öginish arqiliq muweppeqiyetlik bolghanliqini, herqandaq kishi, jümlidin Uyghur yashliri peqet tirishsila muweppeqiyet qazinalaydighanliqini bayan qildi.

Doxturxanining échilish murasimigha ishtirak qilghan sherqiy türkistan teshkilatlar birliki re'isi hidayetulla oghuzxan abdukérim bughraning kespiy jehettin muweppeqiyet qazinipla qalmastin belki Uyghurlarning siyasiy teqdirigimu bash qaturup kéliwatqan, örneklik bir ziyaliy ikenlikini bildürdi.

Erzurumdiki atatürk uniwérsitéti chish doxturiliq kespini püttürgen abduqéyum ependi chish doxturiliq kespi boyiche oqup taki doktorluq unwanighiche érishishning bek qiyin we uzun musape ikenlikini, abdukérim we uning ayalidin bashqa türkiyede bu kesipte doktorluq unwani alghan Uyghurning yoq ikenlikini, bularning ikki doxturxana échishining pexirlinishke tégishlik ish ikenlikini bayan qildi.

Abdukérim bughra 2015-yili 30-may küni türkiyening ichki anatoliye rayonidiki qirshehir shehiride "Inji chish we éghiz salametliki merkizi" ni achqan we qisqa waqit ichide uning kespi qabiliyiti we doxturxana mulazimitide shu jaydiki xelqning alqishigha ériship doxturxanisi tereqqiy qilish we barghanséri kéngiyish derijisige qarap yüzlen'genidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet