Д у қ явроасия язғучилар бирликиниң уйғур әдәбияти үчүн көрсәткән хизмәтлирини тәқдирләп медал тәқдим қилған

Ихтиярий мухбиримиз әркин тарим
2022-05-16
Share
Д у қ явроасия язғучилар бирликиниң уйғур әдәбияти үчүн көрсәткән хизмәтлирини тәқдирләп медал тәқдим қилған Явроасия язғучилар бирликиниң рәиси доктор яқуп өмәроғлуға әпәнди йиғинда сөзгә тәклип қилинди. 2022-Йили 13-май, истанбул.
Photo: RFA

Дуня уйғур қурултийи муһаҗирәттә уйғур әдәбияти үчүн төһпә қошқан бир қисим шәхисләр вә уюшмиларға медал тәқдим қилди. Бу мунасивәт билән 2022-йили 5-айниң 13-күни түркийә пайтәхти әнқәрәдә мәхсус мурасим өткүзүлүп, явроасия язғучилар бирликиниң рәиси доктор яқуп өмәроғлуға “шүкран медали” берилди вә тон кейдүрүлди. Мурасимда явросия язғучилар бирлики тәрипидин нәшир қилинған уйғур шаири мутәллип сәйдулланиң “соғуқ қирғақ” намлиқ шеирлар топлими тонуштурулди.

Дуня уйғур қурултийиниң рәиси долқун әйса әпәндиниң тәшәббуси билән истанбулда паалийәт елип бериватқан дуня уйғур қурултийи вәхписи уюштурған мәзкур йиғинға явроасия язғучилар бирликиниң рәиси доктор яқуп өмәроғлу башчилиқидики язғучилар, шаирлар, университетләрдә уйғур тили вә әдәбияти тәтқиқати билән шуғуллиниватқан мутәхәссисләр, уйғур тили бойичә докторлуқ вә магестирлиқ оқуватқан оқучилар һәмдә уйғур зиялийлардин болуп, 60 әтрапида киши қатнашти.

явроасия язғучилар бирликиниң рәиси доктор яқуп өмәроғлуға “шүкран медали” берилди вә тон кийдүрүлди. 2022-Йили 13-май, истанбул.
Явроасия язғучилар бирликиниң рәиси доктор яқуп өмәроғлуға “шүкран медали” берилди вә тон кийдүрүлди. 2022-Йили 13-май, истанбул.
RFA/Erkin Tarim

Йиғинда алди билән д у қ вәхписиниң рәиси абдурәшит абдулхәмит әпәнди д у қ рәиси долқун әйса әпәндиниң саламини йәткүзгәндин кейин, явроасия язғучилар бирликиниң уйғур әдәбияти үчүн қилған хизмәтлири тоғрисида мәлумат берип өтти. У мундақ деди: “хитай һөкүмити уйғур тилидики миллий маарипни чәкләп, уйғур язғучи, шаирларни лагер вә түрмиләргә ташлаватқан бүгүнки күндә, уйғур әдәбиятиниң түркийәдә тонулушида зор төһпиләрни қошқан доктор яқуп өмәроғлуға рәһмәт ейтиш үчүн бу мурасимни өткүзүватимиз. явроасия язғучилар бирлики бүгүнгичә қазақистанлиқ уйғур язғучи әхмәтҗан ашириниң ‛идиқут‚ намлиқ тарихий романини, тонулған язғучи мәрһум хевир төмүрниң ‛балдур ойғанған адәм‚ намлиқ тарихий романини, мәрһум язғучи зордун сабирниң ‛ана юрт‚ намлиқ романини түрк тилиға тәрҗимә қилдуруп, нәшир қилдурди. Булардин сирт норвегийәдә туруватқан уйғур шаири мутәллип сәйдулланиң икки шеирлар топлимини түрк тилида нәшир қилдурди. Униңдин башқа йәнә уйғур шаири абдухалиқ уйғур билән абдурәһим өткүрниң һаяти тонуштурулған һөҗҗәтлик кино ишләп тарқатти. явроасия язғучилар бирлики қурулған күндин тартип һәр йили ‛хәлқара мәһмуд кашғәри һекайә йезиш мусабиқиси‚ өткүзүп, уйғур елиниң тонулушиға зор төһпә қошмақта. Булардин сирт явроася язғучилар уюшмиси нәшир қиливатқан ‛туғқан қәләмләр‚ намлиқ тор журнилида уйғур әдәбияти торғисида нурғун тәтқиқат мақалиси елан қилинди. Биз дуня уйғур қурултийи вәхписи болуш сүпитимиз билән уларниң қилған бу хизмәтлиригә рәһмәт ейтимиз.”

Мурасимниң күнтәртипи бойичә медал тәқдим қилинип, тон вә доппа кейдүрүлгән яқуп өмәроғлу өзиниң миннәтдарлиқини билдүрүп, сөз қилди. У сөзидә д у қ ниң хәлқарада уйғурларға вәкиллик қиливатқан әң муһим тәшкилат икәнликини, д у қ рәиси долқун әйса әпәндини 1995-йилидин тартип тонуйдиғанлиқини, бундин кейинму явроасия язғучилар бирликиниң уйғур әдәбиятиниң түркийә вә оттура ася түркий җумһурийәтлиридә техиму көп тонутулиши үчүн төһпә қошушқа тиришидиғанлиқини тәкитлиди. У сөзини мундақ давамлаштурди: “явроасия язғучилар бирликигә рәһмәт ейтиш үчүн бу паалийәтни уюштурғанлиқиңларға көп рәһмәт! биз уйғурлар үчүн, уйғур әдәбияти үчүн техиму көп хизмәтләрни қилишни арзу қилимиз. Лекин имканийәтимиз таза яр бәрмиди. Шундақ болсиму биз 16 йилдин буян уйғур әдәбиятини түркийәдә тонутуш үчүн тиришип кәлдуқ. Бундин кейинму биз уйғур әдәбиятини түрк дунясида, болупму түркийә тонутуш үчүн техиму көп әдәбий әсәрләрни нәшир қилдурушни ойлишиватимиз. Уйғур шаир вә язғучиларниң биз билән йәниму һәмкарлишишини үмид қилимиз.”

Норвегийәдә яшаватқан шаир мутәллип сәйидулланиң “соғуқ қирғақ” намлиқ шеирлар топлимини тонуштуруш вә явроасия язғучилар бирликигә рәһмәт ейтиш мурасими ахирлашқандин кейин, биз йиғинға иштирак қилған әнқәрәдики йилдирим бәязит университетиниң оқутқучиси намәтҗан мәмәт әпәндини зиярәт қилдуқ. У уйғур әдәбиятини түркийәдә тонуштурушниң әһмийитиниң зор икәнликини баян қилди.

Явроасия язғучилар бирлики 2006-йили түркийә пайтәхти әнқәрәдә қурулған болуп, оттура асия түркий җумһурийәтлири, русйә федератсийәси вә һәрқайси дөләтләрдики түркий милләтләрдин болған язғучи вә шаирлар әза болған тәшкилаттур. явроасия язғучилар бирликиниң башқуруши астида “бәнгү нәшрияти” билән “қериндаш қәләмләр” намидики журнал бар болуп, улар түркий милләтләрдин болған язғучи вә шаирларниң әсәрлирини таллап түркчигә тәҗимә қилдуруп, нәшир қилмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт