“уйғур һәрикити тәшкилати” “анилар байрими” да хәлқара җәмийәтни уйғур ирқий қирғинчилиқини тохтитишқа чақириди

Мухбиримиз мәмәтҗан җүмә
2021.05.09
Уйғур паҗиәсиниң җанлиқ картиниси: “һәдәмни издәш йолида” “уйғур һәрикити” тәшкилатиниң башлиқи рошән аббас ханим һәдиси гүлшән аббас ханимниң рәсимини көтүрүп из-дерикини қиливатқан көрүнүш. 2018-Йили 17-декабир, вашингтон.
Rushan Abbas teminligen

Америкидики “уйғур һәрикити тәшкилати” “анилар байрими” күни елан қилған тәбрикнамисидә пүтүн дуня “анилар байрими” ни қутлаватқан пәйтләрдә көплигән уйғурларниң мәзкур байрамни тәбрикләштин мәһрум қалдурулғанлиқини билдүрди вә хәлқара җәмийәтни уйғур ирқий қирғинчилиқини тохтитишқа чақириди.

Улар баянатида мундақ деди: “бүгүнки күндә, шәрқий түркистандики ирқий қирғинчилиқ техиму рошәнләшти. Нурғунлиримиз һаятимиздики есил анилиримизни әркин һалда қутлуқлаватқан пәйтләрдә, йәнә нурғунлиримизниң өз анилири билән болған риштиси хитай компартийәсиниң айриветиш тактикисида зәрдаб чәкмәктә.”

Баянатта нәқил қилишичә, мәзкур тәшкилатниң хадими әқидә полат 2017-йили декабирдин буян тутуп кетилгән аниси, уйғур алим раһилә давут һәққидә тохталған. У мундақ дегән: “өткән үч йерим йилдин буян, мән анамниң авазини аңлиялмайла қалмай, һәтта униң нәдә икәнликиниму биләлмидим.”

” уйғур һәрикити тәшкилати” ниң иҗраийә директори рошән аббас мундақ дегән: “уйғур аяллириниң тени бу ирқий қирғинчилиқниң җәң мәйдани боливатиду, улар мәҗбурий бала чүшүрүш, мәҗбурий туғмас қилиш вә һөкүмәт қоллиған кәң көләмлик басқунчилиққа дуч кәлмәктә. Хитай һакимийитиниң җинайитигә қарши туруш һазир дуняниң виҗдани үчүн әң чоң синақ. Хәлқара җәмийәт чоқум инсаний иззәт-һөрмәт принсипиға әмәл қилиши вә бу дәһшәтләрни тохтитиши керәк.”

Кишилик һоқуқ органлири вә тәтқиқатчилар хитайниң 1. 8 Милйондин 3 милйонғичә уйғурни лагерларға бәнд қилғанлиқи, буларниң арисида аялларниңму барлиқи, йәнә 500 миңға йеқин уйғур пәрзәнтиниң ата-анилиридин айрилип һөкүмәт контроллуқидики йетимханиларға елип кетилгәнликини билдүргән.

Униңдин башқа дуняниң һәрқайси җайлиридики уйғурларниң 2017-йилидин буян юртида қалған ата-анилири билән болған алақисиниң үзүветилгәнлики хәвәр қилинған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.