"Uyghur herikiti teshkilati" 2021-yilliq "Démokratiye jasaritige éhtiram" mukapatigha érishti

Muxbirimiz eziz
2021-07-08
Share
Uyghur paji'esining janliq kartinisi: "Uyghur herikiti" teshkilatining bashliqi roshen abbas xanim hedisi gülshen abbas xanimning resimini kötürüp iz-dérikini qiliwatqan körünüsh. 2018-Yili 17-dékabir, washin'gton.
Rushan Abbas teminligen

Yillardin buyan démokratiye ghayisi dunyaning herqaysi jayliridiki insanlarning ortaq arzulirining biri bolup kelgen bolsimu emma buninggha tosqun bolghuchi köpligen amillarning otturigha chiqishi hemde qismen jaylarda démokratiyening ornini diktatoriliqning igilishi ‍izchil dunya jama'itining diqqet-neziride bolup kelgen hadisilerning biri bolup qéliwatqanliqi melum. Öz nöwitide ene shu xildiki selbiy hadisilerni, jinayetlerni hemde qebihliklerni ashkarilash, uni tosush hemde uninggha qarshi küresh qilishta yene nurghunlighan pidakarlarning kökrek kérip otturigha chiqishimu yillardin buyan alqishlinip kelmekte.

Bash shtabi washin'gton shehirige jaylashqan "Dunya démokratiye herikiti" ene shu xildiki démokratiye we uni kéngeytish tirishchanliqlirigha ijabiy tesir körsitish meqsitide teshkillen'gen xelq'araliq teshkilatlar birleshmisidur. 1999-Yili amérika démokratiyeni ilgiri sürüsh fondi bilen hindistandiki ikki puqrawiy teshkilat birlikte dunya miqyasidiki démokratiye pa'aliyetchiliri we alimlarni yéngi déhli shehirige jem qilip, démokratiyeni qandaq qilghanda téximu yaxshi omumlashturghili bolidighanliqini muzakire qilghanda mezkur teshkilat deslepki qedemde shekillendi. Ene shuningdin tartip ular izchil ikki yilda bir qétim dunyawi qurultay chaqirip kéliwatqan bolup, 2021-yilliq 10-qurultay tajsiman wirusi tüpeylidin torda ötküzüldi.

8-Iyul küni mezkur yighinning ikkinchi küni bolup, bu küni chaqirilghan yighinning 4-basquchi mezkur teshkilatning yilda bir qétim tarqitilidighan "Démokratiye jasaritige éhtiram" mukapatini tarqitish murasimi boldi. Yighin'gha xarford fondi qatarliq köpligen teshkilatlarning wekilliri ishtirak qilghan bolup, ular dunya miqyasida démokratiyening kéngiyishi emeliyette kishiler oylighandek undaq asan'gha chüshmeywatqanliqi, bu yolda nurghunlighan qehriman shexslerning heqiqetni sözlesh yolida köpligen éghir bedellerni tölewatqanliqi, köpligen shexsler we teshkilatlarning démokratiye boghulghan ré'alliqqa qarshi ornidin dest turush jeryanida öz tirishchanliqlirini ayimighanliqi, shuningdek bu xil pidakarliqlarning bihude ketmeydighanliqi hemde tégishlik netijilerni yaritidighanliqi heqqide léksiyeler boldi.

Shu qatarda ottura sherq we shimaliy afriqa qatarliq jaylarda, jümlidin misir, iraq, süriye qatarliq döletlerde köpligen axbarat xadimlirining démokratiye chuqanliri hemde hörlük heriketliri üchün öz hayatidin ayrilghanliqi, bu kishilerning töligen bedellirining birdek "Démokratiyeni omumlashturush hemde heqiqetni sözlesh bedelsiz bolmaydu" dégen achchiq ré'alliqni qizil qan arqiliq namayan qilip bergenliki eslep ötüldi. .

Ene shular bilen birlikte démokratiye üchün sada chiqirish imkaniyitidin mehrum qalduruluwatqan sherq xelqliri heqqide söz bolghanda yawropa parlaméntining ezasi ana gomés xanim özining sotsiyalizm we diktator hakimiyetlirining qabahitini bekmu yaxshi chüshinidighanliqini, bu jehette Uyghurlar, tibetler we xongkong démokratchilirining tolimu japaliq küresh bilen meshghul boluwatqanliqini alahide tekitlidi. U sözining dawamida 2021-yilliq "Démokratiye jasaritige éhtiram" mukapatining del ene shu seweblerdin Uyghur, tibet we xongkongluq pa'aliyetchilerning ötken birnechche yildin buyan zich ittipaqliship, xitay hakimiyitining démokratiyeni boghush urunushlirigha qarshi birlikte mürini mürige tirep küresh qilishtek rohigha ilham bérish üchün "Uyghur herikiti", "Erkin tibet oqughuchiliri" we "Xongkongni közitish" teshkilatlirigha ortaq teqdim qilinishigha yüksek baha berdi. Shuningdek bu heqtiki sözide "Sherqiy türkistanda démokratiye we kishilik hoquq éghir derijide depsende bolup kelgenidi. Emdilikte biz bir milyondin artuq Uyghurning lagérlargha qamilip bolghanliqini, tibettiki ehwalning yamanliship méngiwatqanliqini, xongkongdiki démokratiyening bolsa pütünley tügeshkenlikini körüwatimiz" dédi.

"Uyghur herikiti" teshkilatining xadimliridin juliy milsapmu bu heqte söz qilip "Uyghur herikiti" teshkilati 2017-yili 4-dékabirda qurulghandin buyanqi pa'aliyetler heqqide qisqiche melumat berdi. Shuningdek özlirining Uyghur jem'iyiti duch kéliwatqan ré'alliqni ashkarilash hemde bu heqtiki chüshenchini omumlashturushta dunya miqyasida tégishlik tirishchanliqlarni körsetkenlikini, bolupmu yashlarni bu mesile heqqide oylinish hemde bu ré'alliqqa qarshi öz mejburiyitini ada qilishqa yéteklep kelgenlikini bayan qilip, bu jeryanda izchil tibet, xongkong teshkilatliri bilen birlikte pa'aliyet qilip kelgenlikini, buningda heqiqetenmu kolléktipning roli yaxshi jari bolghanliqini tekitlidi. .

"Uyghur herikiti" teshkilatining re'isi roshen abbasmu mukapat tapshuruwélish munasiwiti bilen mexsus söz qildi. U sözide bu mukapatni démokratiyege teshna boluwatqan Uyghur xelqige wakaliten tapshuruwalidighanliqini tekitlesh bilen birge özlirining eng deslep yashlar we ayallarni merkez qilip pa'aliyet bashlighanliqini, shuningdek bu jeryanda tibetlikler, xongkongluqlar qatarliqlar bilenmu zich hemkarlashqanliqini, bu arqiliq téximu köp kishilerni bu sepke jelp qilghanliqini sözlep kélip "Biz téxi emdi ish bashliduq. Biz qet'iylik bilen algha qarap siljiymiz. Ishinimizki téximu köp kishiler bu sepke qoshulidu hemde heqiqetmu namayan bolidu. Biz bu yoldin hergizmu chékinmeymiz" dédi. .

Shu qatarda bu qétimqi ortaq mukapat sahibliri bolghan "Erkin tibet oqughuchiliri" teshkilatining wekilliridin péma doma we dorji tsétén, xongkong démokratchi yashlirining wekilliridin jow syu qatarliqlarmu ayrim-ayrim söz qilip nöwette Uyghurlar, tibetler we xongkongluqlarning ortaq halda xitay diktatora hakimiyitining hujum obyékti bolup qalghanliqini, shu sewebtin bu ortaq düshmen'ge qarshi dawamliq halda birlikte küresh qilidighanliqini bildürdi. .

Yighindin kéyin "Uyghur herikiti teshkilati" ning re'isi roshen abbas ayrim ziyaritimizni qobul qildi. U bu qétimqi mukapatning eng muhimi xitay hökümitining zulum zindanlirida azab chékiwatqan Uyghur xelqige mensup bolidighanliqini alahide tekitlidi.

Roshen abbasning bildürüshiche, bundaq bir mukapatning qolgha kélishi bu jehetlerdiki xizmetlerning utuqluq bolghanliqining ipadisi iken. Eksiche bu yolda mangidighan yol téxi uzun iken. .

Nöwette Uyghurlar mesilisi ene shu teriqide barghanséri köpligen sahelerning étirap qilishigha érishiwatqan bolup, bu jehette bir qisim ijabiy netijilermu qolgha kelmektiken.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet