Уйғур һәрикити тәшкилати «уйғур әркинлик риқабити» мусабиқисини башлиди

Мухбиримиз җәвлан
2020-08-27
Елхәт
Пикир
Share
Принт
Уйғур һәрикити тәшкилати башлиған «уйғур әркинлик риқабити» мусабиқисиниң торбәт көрүнүши.
Уйғур һәрикити тәшкилати башлиған «уйғур әркинлик риқабити» мусабиқисиниң торбәт көрүнүши.
runsignup.com

Уйғур һәрикити тәшкилати йеқинда мәзкур тәшкилатниң тәшвиқат хизмитини күчәйтиш вә техиму көп инсанларға уйғурларниң бешиға кәлгән етник қирғинчилиқни билдүрүш мәқситидә «уйғур әркинлик риқабити» мусабиқисини башлатқан.

Уйғур һәрикити тәшкилатиниң бу паалийәт үчүн ишләнгән тор бетидә мундақ дейилгән: уйғур районидики қәшқәр билән турпанниң арилиқи 1400 километир келиду. У йәрдә бүгүнкидәк ваба болмиған тәқдирдиму кишиләр бир йәргә келип паалийәт өткүзәлмәйду; һәр җай қамал астида, һәр йәрдә тосуқ вә сақчи камералири бар, уйғурлар өзиниң гүзәл юртлирида бималал сәпәр қилалмайду. Милйонлиған уйғурлар хитайниң өлүм лагерлирида җан талашмақта. Лагер сиртидикиләр өйлиригә солинип, ачлиқ, моһтаҗлиқ азабида иңримақта. Биз бу қәбиһ җинайәтни паш қилип уйғур дәвасини күчәйтиш, үмид юлтузи болуп һәрикәт қилиш үчүн бу паалийәтни башлидуқ. Бу мусабиқидә топланған ианиләр уйғур һәрикити тәшкилати үчүн ишлитилиду. Мәзкур тәшкилат хитайниң зулумиға учриған уйғур вә башқа түркий хәлқләрниң кишилик һоқуқи вә демократик әркинликини қоғдашни нишан қилған халис(пайда алмайдиған) тәшкилат. Йиғилған ианә арқилиқ хитай зулумиға қарши паалийәтлиримизни җанландуруп, вәтинимиздики зулумға учриған барлиқ хәлқниң һәқ-һоқуқини қоғдаш үчүн тиришимиз. Мусабиқимизгә қатнашсиңиз, уйғурлар дуч кәлгән ирқий қирғинчилиқни паш қилип, тәшкилатимизниң техиму көп дөләтләрдә актип вә үнүмлүк паалийәт қилишимизға ярдәм қилған болисиз.

Уйғур һәрикити тәшкилатидин җулия ханим бу паалийәтни тонуштуруп мундақ деди: «нөвәттә уюштурулуватқан ˃уйғур әркинлик риқабити˂ мусабиқиси әмәлий паалийәт болуп, дуняниң һәр қайси җайлиридики кишиләр қатнишалайду. Буниңға қатнишиш үчүн 50 доллар тизимлитиш һәққи тапшурсила болиду, буниңдин киридиған пул уйғур һәрикити тәшкилатиниң уйғурлар үчүн қиливатқан паалийәтлиригә ишлитилиду. Андин қатнашқучилар өзи тамамлимақчи болған мусапини таллайду. 9-Айниң 1-күнидин 12-айниң 31-күнигичә давамлишидиған бу төт айлиқ мусабиқә җәрянида қатнашқучилар тор бекитимизгә тизимлитип кирип, өзиниң маңған мусаписини хатириләп маңиду, рәсимлири яки видийолирини чиқириду. Буларни UyghurFreedomChallenge дегән һәштәгдин пайдилинип иҗтимаий таратқуларда һәмбәһирлисә яхши, шундақ қилғанда инсанлар уйғурларниң бешиға келиватқан ишларға көпрәк диққәт қилидиған болиду. Улар йәнә тәнһәрикәтчи достлирини бу мусабиқигә тәклип қилса болиду. Бу көңүллүк паалийәт арқилиқ биз өзимизгә җәң елан қилалаймиз, шундақла яхши ишларға түрткә болалаймиз».

Мәзкур паалийәтниң мәхсус тор бети (https://runsignup.com) Дә мусабиқә тәпсилатлири тонуштурулған болуп, мусабиқиләр мусапиниң узун-қисқилиқи бойичә 1400 километирлиқ мусабиқә(толуқ мусабиқә), 700 километирлиқ мусабиқә (йерим мусабиқә) вә 200 километирлиқ, 50 километирлиқ, 20 километирлиқ, 10 километирлиқ мусабиқиләргә бөлүнгән, қатнашмақчи болғанлар өзиниң әһвалиға қарап булардин бирини таллап тизимлитип киридикән; бу мусабиқә меңиш, йүгүрүш, марафончә йүгүрүш, велисипит миниш, ат миниш, қейиқ һәйдәш вә башқа актип тәнһәрикәт түрлирини өз ичигә алидикән. Җулия ханимниң билдүрүшичә, америкадики тизимлатқучиларға уларниң таллишиға асасән һәр хил номурда калтә йәң майка берилидикән, буни кийип рәсимгә чүшүп торға чиқириш арқилиқ «уйғурларға әркинлик» дегән тәшвиқат елип берилидикән.

Җулия ханим «қандақ болуп бу мусабиқини уюштуруп қалдиңлар?» дегән соалимизға җаваб берип мундақ деди: «биз бу паалийәтни уйғурлар дуч келиватқан ишларға көңүл бөлидиған бир достимизниң тәклипи билән уюштурдуқ. Униң пикричә, дунядики кишиләр интернет арқилиқ бир йәргә келәләйду, шундақла интернет дунядики кишиләрниң диққитини җәлп қилалайдиған әң яхши васитә. У достимиз өз исминиң тилға елинишини халимайду, әмма биз бу паалийәтни уюштурушта униң пикри вә ярдимигә еришкәнликимиз үчүн униңға рәһмәт ейтимиз».

Җулия ханимниң билдүрүшичә, бу мусабиқигә қатнашқучилар уйғур һәрикити тәшкилати үчүн маддий ярдәм қилипла қалмай, уйғур қирғинчилиқини паш қилип, уйғурлар мәсилисини техиму көп инсанларға билдүрүшкә һәссә қошалайдикән. Бу дәл мәзкур паалийәтниң мәқсәт-нишани икән. У бу һәқтә тохтилип мундақ деди: «биз бая ейтқандәк, дуняниң мәйли қайси йеридә болсун кишиләр мәлум паалийәт арқилиқ яхши ишлар үчүн пул топлиялайду. Әмма әң муһими, кишиләр бу паалийәт арқилиқ уйғурларниң бешиға келиватқан ишларға техиму диққәт қилидиған болиду. Биз кишиләрниң бу паалийәткә әтрапидики достлирини, қошнилирини тәклип қилишини, UyghurFreedomChallenge дегән һәштәг арқилиқ иҗтимаий таратқуларда уйғурлар дуч кәлгән паҗиәни билдүрүп, дуняниң техиму диққитини қозғишини үмид қилимиз».

Уйғур һәрикити тәшкилатиниң башлиқи рошән аббас ханим уйғур районини пүтүнләй қамал қиливалған хитайниң уйғурларға йүргүзүватқан ирқий қирғинчилиқиға қарши туруш, бу җинайәтни хәлқи аләмгә техиму кәң билдүрүш вә бу мәсилини дуняниң, җүмлиниң американиң диққәт нәзиридә тутуп туруш үчүн бу паалийәтни өткүзгәнликини билдүрди.

Пикирләр (0)
Share
Толуқ бәт