Uyghur herikiti teshkilati "Uyghur erkinlik riqabiti" musabiqisini bashlidi

Muxbirimiz jewlan
2020-08-27
Élxet
Pikir
Share
Print
Uyghur herikiti teshkilati bashlighan "Uyghur erkinlik riqabiti" musabiqisining torbet körünüshi.
Uyghur herikiti teshkilati bashlighan "Uyghur erkinlik riqabiti" musabiqisining torbet körünüshi.
runsignup.com

Uyghur herikiti teshkilati yéqinda mezkur teshkilatning teshwiqat xizmitini kücheytish we téximu köp insanlargha Uyghurlarning béshigha kelgen étnik qirghinchiliqni bildürüsh meqsitide "Uyghur erkinlik riqabiti" musabiqisini bashlatqan.

Uyghur herikiti teshkilatining bu pa'aliyet üchün ishlen'gen tor bétide mundaq déyilgen: Uyghur rayonidiki qeshqer bilen turpanning ariliqi 1400 kilométir kélidu. U yerde bügünkidek waba bolmighan teqdirdimu kishiler bir yerge kélip pa'aliyet ötküzelmeydu؛ her jay qamal astida, her yerde tosuq we saqchi kaméraliri bar, Uyghurlar özining güzel yurtlirida bimalal seper qilalmaydu. Milyonlighan Uyghurlar xitayning ölüm lagérlirida jan talashmaqta. Lagér sirtidikiler öylirige solinip, achliq, mohtajliq azabida ingrimaqta. Biz bu qebih jinayetni pash qilip Uyghur dewasini kücheytish, ümid yultuzi bolup heriket qilish üchün bu pa'aliyetni bashliduq. Bu musabiqide toplan'ghan i'aniler Uyghur herikiti teshkilati üchün ishlitilidu. Mezkur teshkilat xitayning zulumigha uchrighan Uyghur we bashqa türkiy xelqlerning kishilik hoquqi we démokratik erkinlikini qoghdashni nishan qilghan xalis(payda almaydighan) teshkilat. Yighilghan i'ane arqiliq xitay zulumigha qarshi pa'aliyetlirimizni janlandurup, wetinimizdiki zulumgha uchrighan barliq xelqning heq-hoquqini qoghdash üchün tirishimiz. Musabiqimizge qatnashsingiz, Uyghurlar duch kelgen irqiy qirghinchiliqni pash qilip, teshkilatimizning téximu köp döletlerde aktip we ünümlük pa'aliyet qilishimizgha yardem qilghan bolisiz.

Uyghur herikiti teshkilatidin juliya xanim bu pa'aliyetni tonushturup mundaq dédi: "Nöwette uyushturuluwatqan ˃Uyghur erkinlik riqabiti˂ musabiqisi emeliy pa'aliyet bolup, dunyaning her qaysi jayliridiki kishiler qatnishalaydu. Buninggha qatnishish üchün 50 dollar tizimlitish heqqi tapshursila bolidu, buningdin kiridighan pul Uyghur herikiti teshkilatining Uyghurlar üchün qiliwatqan pa'aliyetlirige ishlitilidu. Andin qatnashquchilar özi tamamlimaqchi bolghan musapini tallaydu. 9-Ayning 1-künidin 12-ayning 31-künigiche dawamlishidighan bu töt ayliq musabiqe jeryanida qatnashquchilar tor békitimizge tizimlitip kirip, özining mangghan musapisini xatirilep mangidu, resimliri yaki widiyolirini chiqiridu. Bularni UyghurFreedomChallenge dégen heshtegdin paydilinip ijtima'iy taratqularda hembehirlise yaxshi, shundaq qilghanda insanlar Uyghurlarning béshigha kéliwatqan ishlargha köprek diqqet qilidighan bolidu. Ular yene tenheriketchi dostlirini bu musabiqige teklip qilsa bolidu. Bu köngüllük pa'aliyet arqiliq biz özimizge jeng élan qilalaymiz, shundaqla yaxshi ishlargha türtke bolalaymiz".

Mezkur pa'aliyetning mexsus tor béti (https://runsignup.com) De musabiqe tepsilatliri tonushturulghan bolup, musabiqiler musapining uzun-qisqiliqi boyiche 1400 kilométirliq musabiqe(toluq musabiqe), 700 kilométirliq musabiqe (yérim musabiqe) we 200 kilométirliq, 50 kilométirliq, 20 kilométirliq, 10 kilométirliq musabiqilerge bölün'gen, qatnashmaqchi bolghanlar özining ehwaligha qarap bulardin birini tallap tizimlitip kiridiken؛ bu musabiqe méngish, yügürüsh, marafonche yügürüsh, wélisipit minish, at minish, qéyiq heydesh we bashqa aktip tenheriket türlirini öz ichige alidiken. Juliya xanimning bildürüshiche, amérikadiki tizimlatquchilargha ularning tallishigha asasen her xil nomurda kalte yeng mayka bérilidiken, buni kiyip resimge chüshüp torgha chiqirish arqiliq "Uyghurlargha erkinlik" dégen teshwiqat élip bérilidiken.

Juliya xanim "Qandaq bolup bu musabiqini uyushturup qaldinglar?" dégen so'alimizgha jawab bérip mundaq dédi: "Biz bu pa'aliyetni Uyghurlar duch kéliwatqan ishlargha köngül bölidighan bir dostimizning teklipi bilen uyushturduq. Uning pikriche, dunyadiki kishiler intérnét arqiliq bir yerge kéleleydu, shundaqla intérnét dunyadiki kishilerning diqqitini jelp qilalaydighan eng yaxshi wasite. U dostimiz öz ismining tilgha élinishini xalimaydu, emma biz bu pa'aliyetni uyushturushta uning pikri we yardimige érishkenlikimiz üchün uninggha rehmet éytimiz".

Juliya xanimning bildürüshiche, bu musabiqige qatnashquchilar Uyghur herikiti teshkilati üchün maddiy yardem qilipla qalmay, Uyghur qirghinchiliqini pash qilip, Uyghurlar mesilisini téximu köp insanlargha bildürüshke hesse qoshalaydiken. Bu del mezkur pa'aliyetning meqset-nishani iken. U bu heqte toxtilip mundaq dédi: "Biz baya éytqandek, dunyaning meyli qaysi yéride bolsun kishiler melum pa'aliyet arqiliq yaxshi ishlar üchün pul topliyalaydu. Emma eng muhimi, kishiler bu pa'aliyet arqiliq Uyghurlarning béshigha kéliwatqan ishlargha téximu diqqet qilidighan bolidu. Biz kishilerning bu pa'aliyetke etrapidiki dostlirini, qoshnilirini teklip qilishini, UyghurFreedomChallenge dégen heshteg arqiliq ijtima'iy taratqularda Uyghurlar duch kelgen paji'eni bildürüp, dunyaning téximu diqqitini qozghishini ümid qilimiz".

Uyghur herikiti teshkilatining bashliqi roshen abbas xanim Uyghur rayonini pütünley qamal qiliwalghan xitayning Uyghurlargha yürgüzüwatqan irqiy qirghinchiliqigha qarshi turush, bu jinayetni xelqi alemge téximu keng bildürüsh we bu mesilini dunyaning, jümlining amérikaning diqqet neziride tutup turush üchün bu pa'aliyetni ötküzgenlikini bildürdi.

Toluq bet