Мюнхен шәһиридә өткүзүлгән уйғур миллий кимликини тонутуш паалийити алқишқа еришти

Мәркизи германийәниң мюнхен шәһиридә болған “уйғур мәдәнийәт-маарип бирлики” тәшкилати 20-январ күни өткүзгән паалийәтлири тоғрилиқ өзлириниң тор сәһиписидә мундақ баянларға орун бәргән: “бүгүн қәһритан ейиниң 20-күни германийә уйғур мәдәнийәт-маарип бирлики мюнхен шәһиридә өткүзүлгән ‛мәдәнийәт беғи‚ паалийитигә қатнишип, маарип, таам мәдәнийити, кийим-кечәк мәдәнийити вә усул сәнити қатарлиқ җәһәтләрдә кәң иштиракчиларни һәйрәттә қалдурди”.

Дәрвәқә, мәзкур паалийәткә даир елан қилинған син көрүнүшлири вә сүрәтләрдә мәзкур “мәдәнийәт беғи” паалийитигә иштирак қилған мюнхендики уйғурларниң уйғур миллий кимликини намаян қилиш үчүн көрсәткән тиришчанлиқлири рошән көзгә челиқип туратти. Шәһәрлик мәдәнийәт тармақлири тәрипидин орунлаштурулуп 20-январ кәчтә өткүзүлгән бу паалийәткә мюнхен шәһиридики һәр милләт хәлқиниң көп сандики вәкиллири қатнашқан.

RFA/Ekrem

Уйғур мәдәнийәт-маарип бирлики тәшкилати бу сорунда, сап уйғурчә кийингән уйғур өсмүр қизлириниң орундишидики гүзәл “долан уссули” ни тәқдим қилипла қалмай, мюнхендики уйғур ханим-қизлар өйлиридә һазирлап кәлгән һәр хил ләззәтлик уйғур таамлириниму көргәзмә қилған. Уйғур миллий кимликиниң бу намайәндилириниң бу сорунға дахил болған һәр саһә хәлқниң қизғин алқишлириға сазавәр болғанлиқи тәсвирләнмәктә.

Мәзкур паалийәтни тәшкиллигән “уйғур мәдәнийәт-маарип бирлики” тәшкилатиниң рәиси пәридә ханим бүгүн бу хусуста тохталғанда, алди билән бу паалийәткә қатнишиштики мәқсәтниң өзгичә алаһидиликкә игә болған уйғур миллий мәдәнийитини германлар вә башқа милләтләргә тонутуштин ибарәт икәнликини тилға алди. Пәридә ханим сөзидә йәнә, уйғур уссуллири вә рәңдар уйғур таамлириниң сорун әһлиниң мәдһийәлиригә еришкәнликини вә һөкүмәт даирилириниңму паалийәттин кейин өзлиригә алаһидә рәһмәт хәтлири әвәткәнликини тәкитлиди.

RFA/Ekrem

“уйғур мәдәнийәт-маарип бирлики” тәшкилати тәркибидики “уйғурийә мәктипи” ниң оқутқучилиридин абидә ханимниң билдүрүшичә, улар паалийәт әснасида өз мәктипидә оқуватқан 100 дин артуқ уйғур өсмүрлирини йиллардин буян уйғур ана тили, мәдәнийити, сәнити, тарихи, җуғрапийәси қатарлиқ саһәләрдә тәрбийәләватқанлиқини кәң тамашибинларға тонуштуруп өткән.

2018-Йили германийәниң мюнхен шәһиридә қурулған “уйғур мәдәнийәт-маарип бирлики” тәшкилати һәмдә униң тәркибидики “уйғурийә мәктипи” мәркизи мюнхен шәһиридики д у қ вә мюнхендики һәр саһә мәшрәп әһлиниң йеқиндин қоллишиға еришип келиватқан болуп, улар түрлүк мәдәний, иҗтимаий паалийәтләрдә өзара һәмкарлишишни давамлаштурмақта.