Қирғизистан уйғур сәнәткари торда консерт өткүзүп, кишиләргә илһам бәрди

Ихтиярий мухбиримиз ферузә
2020-04-20
Елхәт
Пикир
Share
Принт
Оттура асияда тонулған нахшичи шөһрәт яқупоф 18-март күни өйидә туруп инстаграм сәһиписидә икки саәттин ошуқ давам қилған консерт уюштурған.
Оттура асияда тонулған нахшичи шөһрәт яқупоф 18-март күни өйидә туруп инстаграм сәһиписидә икки саәттин ошуқ давам қилған консерт уюштурған.
RFA/Féruze

Феврал ейиниң ахирлирида қирғизистан һөкүмити корона вирусиниң алдини елиш үчүн һәр хил мәдәний вә иҗтимаий паалийәтләрни өткүзүшкә чәклимә қойғаниди, буниңдин сирт 22-март күни бишкәк шәһиридә вә қирғизистанниң җәнубидики ош, җалал-абад вилайәтлиридиму җиддий һаләт йолға қоюлғаниди. Бу һаләттә баһарға интизар болған кишиләр өйлиридә турушқа тәвсийә қилинған һәм мутләқ көп қисим кишиләр күндилик киримлиридин айрилип, көп кишиләр қийинчилиққа учримақта. Хитайниң вухән шәһиридин тарқалған корона вируси пүтүн дуня хәлқи қатарида қирғизистан хәлқи, җүмлидин қирғизистан уйғурлири үчүн зор тәһдит вә зия елип кәлди.

Бундақ бир һаләттә қирғизистан уйғурлириниң яш сәнәткарлири адәмләрниң роһи кәйпиятини көтүрүш үчүн ойлирида туруп тор бәтлиридә һәр хил мәдәний паалийәтлирини уюштуруп кәлмәктә, шу җүмлидин оттура асияда тонулған нахшичи шөһрәт яқупоф 18-март күни өйидә туруп инстаграм сәһиписидә икки саәттин ошуқ давам қилған косерт уюштурди. Торда берилгән мәзкур консертиға 400 ға йеқин тамашибин қатнашти.

Униң уйғур вә башқа тилларда ейтқан нахшилири пәқәтла уйғурларла әмәс, бәлки һәр милләт көрүрмәнлири көрүп алқишлиди.

Мәзкур консертни тор арқилиқ көргән қирғизистанлиқ көрүрмәнләрдин султан мурат һашимоф зияритимизни қобул қилип, өз тәсиратлирини сөзләп, шөһрәт яқупофниң мәнилик нахшилири бу қийин күнләрдә кишиләргә роһи озуқ беғишлиғанлиқини баян қилди.

Игилинишичә қирғизистанда 80 дин ошуқ милләт яшайдикән. Уларниң ичидә уйғурлар нопус җәһәттә бәшинчи орунни игиләйду. Шундақ болсиму уйғур уссул вә нахшилири хәлқ ичидә әң сөйүшкә еришилгәнләрниң бири болуп һесаблиниду. Болупму нахшичи шөһрәт яқупофниң уйғур, рус тиллирида ейтқан нахшилири пүтүн оттура асия миқясида алқишқа еришкән.

Зияритимизни қобул қилған шөһрәт яқупоф уйғур нахшилириниң юқири алқишлириға еришкәнлики вә буниң сәвәблири һәққидә өз пикирлирини изһар қилип, бу қетимқи инстграм консертиниң мәқсити тоғрисида тохталди.

Рәсмий мәлуматлар бойичә қирғизистанда 60 миңға йеқин уйғур аһалиси яшайду. Улар өзлириниң мәдәнийәт сәнитини сақлап қелиш үчүн тиришчанлиқ көрсәтмәктә. Қирғизистан уйғурлири рәсмий тизимиға елинған «иттипақ» гезит вә җәмийитигә игә. Шундақла яшлар арисида нурғун талантлиқ сәнәткарлар бар, уларниң ичидә сазәндә саһибҗан ашироф, нахшичилар алимҗан розийеф, нуртай абдуреһмоф, сабирҗан ниязоф, ришат аюпоф, ришат садиқоф қатарлиқлар көзгә көрүнгәнләрдур. Буниңдин башқа бир қанчә уссул ансамбиллири тәшкил қилинған, уларниң арисида әң тонулғанлири «юлтуз», «интизар» вә «дил садаси» уссул ансамбиллиридур.

Нахша чолпини султан кәримоф қирғизистанниң хизмәт көрсәткән артиси намиға вә башқа шан-шәрәпләргә сазавәр болған болуп, униң нами пүтүн җумһурийәткә узундин буян кәң тонушлуқ.

Кино чолпини айтурған темурованиң нами 1980-йиллардила пүтүн совет иттипақи вә қирғизистанға тонулған болуп, у көп сандики қирғизистан, қазақистан вә башқа әлләр ишлигән кино филимлирида баш рол алғаниди.

«Иттипақ» җәмийитиниң мәдәнийәт бөлүминиң рәиси вә «юлтуз» ансамбилиниң бәдиий рәһбири гүлназ мәхсутова, қирғизистан уйғурлириниң мәдәнийәт саһәсидә елип бериватқан мурасимлири вә паалийәтлири тоғрисида сөзләп, уссул ансамбиллириниң һәтта йәнә миллий уссул вә миллий кийим-кечәк мусабиқиләрни уюштурғанлиқини ейтти.

Гүлназ ханим йәнә йеқинда өткән шөһрәт яқупофниң консерт паалийитини юқири баһалиди.

Тор бәтлиридә елип берилгән паалийәтләрдин сирт, қирғизистан уйғурлири 23-март күнидин тартип сахавәтлик ишлирини давамлашмақта. Улар пәқәт бишкәк шәһири вә униң әтрапидики йезиларғила әмәс, бәлки пүтүн чуй вилайитидики йезиларға милләт айримастин ярдәм көрсәтмәктә. Уларниң арисида әң актиплири «илшат», «ярдәм садиқә» «интизар» сахавәтлик фонтлири вә «қайнар» ширкитидур.

Пикирләр (0)
Share
Толуқ бәт