Qirghizistan Uyghur sen'etkari torda konsért ötküzüp, kishilerge ilham berdi

“Yultuz” ansambilining milliy ussul musabiqisige qatnashquchiliri.

Féwral éyining axirlirida qirghizistan hökümiti korona wirusining aldini élish üchün her xil medeniy we ijtima'iy pa'aliyetlerni ötküzüshke cheklime qoyghanidi, buningdin sirt 22-mart küni bishkek shehiride we qirghizistanning jenubidiki osh, jalal-abad wilayetliridimu jiddiy halet yolgha qoyulghanidi. Bu halette bahargha intizar bolghan kishiler öyliride turushqa tewsiye qilin'ghan hem mutleq köp qisim kishiler kündilik kirimliridin ayrilip, köp kishiler qiyinchiliqqa uchrimaqta. Xitayning wuxen shehiridin tarqalghan korona wirusi pütün dunya xelqi qatarida qirghizistan xelqi, jümlidin qirghizistan Uyghurliri üchün zor tehdit we ziya élip keldi.

Bundaq bir halette qirghizistan Uyghurlirining yash sen'etkarliri ademlerning rohi keypiyatini kötürüsh üchün oylirida turup tor betliride her xil medeniy pa'aliyetlirini uyushturup kelmekte, shu jümlidin ottura asiyada tonulghan naxshichi shöhret yaqupof 18-mart küni öyide turup instagram sehipiside ikki sa'ettin oshuq dawam qilghan kosért uyushturdi. Torda bérilgen mezkur konsértigha 400 gha yéqin tamashibin qatnashti.

Uning Uyghur we bashqa tillarda éytqan naxshiliri peqetla Uyghurlarla emes, belki her millet körürmenliri körüp alqishlidi.

Mezkur konsértni tor arqiliq körgen qirghizistanliq körürmenlerdin sultan murat hashimof ziyaritimizni qobul qilip, öz tesiratlirini sözlep, shöhret yaqupofning menilik naxshiliri bu qiyin künlerde kishilerge rohi ozuq béghishlighanliqini bayan qildi.

Igilinishiche qirghizistanda 80 din oshuq millet yashaydiken. Ularning ichide Uyghurlar nopus jehette beshinchi orunni igileydu. Shundaq bolsimu Uyghur ussul we naxshiliri xelq ichide eng söyüshke érishilgenlerning biri bolup hésablinidu. Bolupmu naxshichi shöhret yaqupofning Uyghur, rus tillirida éytqan naxshiliri pütün ottura asiya miqyasida alqishqa érishken.

Ziyaritimizni qobul qilghan shöhret yaqupof Uyghur naxshilirining yuqiri alqishlirigha érishkenliki we buning sewebliri heqqide öz pikirlirini izhar qilip, bu qétimqi instgram konsértining meqsiti toghrisida toxtaldi.

Resmiy melumatlar boyiche qirghizistanda 60 minggha yéqin Uyghur ahalisi yashaydu. Ular özlirining medeniyet sen'itini saqlap qélish üchün tirishchanliq körsetmekte. Qirghizistan Uyghurliri resmiy tizimigha élin'ghan “Ittipaq” gézit we jem'iyitige ige. Shundaqla yashlar arisida nurghun talantliq sen'etkarlar bar, ularning ichide sazende sahibjan ashirof, naxshichilar alimjan roziyéf, nurtay abduréhmof, sabirjan niyazof, rishat ayupof, rishat sadiqof qatarliqlar közge körün'genlerdur. Buningdin bashqa bir qanche ussul ansambilliri teshkil qilin'ghan, ularning arisida eng tonulghanliri “Yultuz”, “Intizar” we “Dil sadasi” ussul ansambilliridur.

Naxsha cholpini sultan kerimof qirghizistanning xizmet körsetken artisi namigha we bashqa shan-shereplerge sazawer bolghan bolup, uning nami pütün jumhuriyetke uzundin buyan keng tonushluq.

Kino cholpini ayturghan témurowaning nami 1980-yillardila pütün sowét ittipaqi we qirghizistan'gha tonulghan bolup, u köp sandiki qirghizistan, qazaqistan we bashqa eller ishligen kino filimlirida bash rol alghanidi.

“Ittipaq” jem'iyitining medeniyet bölümining re'isi we “Yultuz” ansambilining bedi'iy rehbiri gülnaz mexsutowa, qirghizistan Uyghurlirining medeniyet saheside élip bériwatqan murasimliri we pa'aliyetliri toghrisida sözlep, ussul ansambillirining hetta yene milliy ussul we milliy kiyim-kéchek musabiqilerni uyushturghanliqini éytti.

Gülnaz xanim yene yéqinda ötken shöhret yaqupofning konsért pa'aliyitini yuqiri bahalidi.

Tor betliride élip bérilgen pa'aliyetlerdin sirt, qirghizistan Uyghurliri 23-mart künidin tartip saxawetlik ishlirini dawamlashmaqta. Ular peqet bishkek shehiri we uning etrapidiki yézilarghila emes, belki pütün chuy wilayitidiki yézilargha millet ayrimastin yardem körsetmekte. Ularning arisida eng aktipliri “Ilshat”, “Yardem sadiqe” “Intizar” saxawetlik fontliri we “Qaynar” shirkitidur.