Бурса шәһиридә уйғур мәдәнийити тонуштурулуп көргәзмә ечилди
2023.07.25

23-Июл күни түркийәниң бурса шәһиридә ечилған 6-нөвәтлик түрк дуняси әнәниви тәнһәрикәт паалийитидә уйғур мәдәнийити тонуштурулуп көргәзмә қилинди.
Бурса шәһәрлик һөкүмәт тәрипидин уюштурулған бу паалийәтни бурса валий мәһкимиси қармиқидики мәдәнийәт вә саяһәт идариси, түркийә әнәниви тәнтәрбийә түрлири федератсийәси, дуня етник тәнһәрикәт федератсийәси қатарлиқ җәмийәт вә органлар қоллап һәмкарлашқан.
Паалийәт мәйданиға түрк тарихида қурулған 16 түрк дөләт вә империйә симвул қилинип 16 данә чедир тикилгән болуп, уйғур, қазақ, татар қатарлиқ һәр қайси милләткә бирдин чедир берилгән. Уйғурларға берилгән чедирда мәркизи истанбулдики шәрқий түркистан нузугүм җәмийити көргәзмә ечип уйғур мәдәнийитини тонуштуруш паалийити елип барди.
Тәнһәрикәт паалийитиниң ечилиш мурасимида сөз қилған бурса шәһәр башлиқи алинур ақташ әпәнди бирлик-баравәрлик һәм миңларчә йилдин буян һәм нормал һаләттә һәм уруш-җәңләрдиму давам қилип кәлгән әнәниви тәнтәрбийәниң түрк мәдәнийитиниң айрилмас бир парчиси икәнликини тәкитлиди.
У мәдәнийәт вә өрп-адәтләргә игә чиқиш керәкликини тәкитләп мундақ деди: “бүйүк бир мәдәнийәтниң қиммәтлик мираси болған әҗдадлиримизниң әнәниви тәнһәрикәтлириниң бүгүнки күндики мәвҗутлуқини сақлап қелиш арқилиқ, уни кәлгүсигә мирас қалдурушни мәқсәт қилимиз. Тез сүрәттә өзгириватқан дуняда әҗдадлиримизниң нәччә миң йиллиқ мәдәнийәт, өрп-адәтлирини әслитиш, тонуштуруш вә өгитиш бизниң мәҗбурийтимиздур. Түрк дунясиниң қәлби болған бурсада бүгүн нәччә миң йиллиқ түрк мәдәнийитиниң топланғанлиқиға шаһит болисиләр, бизләр мәдәнийәт, өрп-адәтләр, тарихни қоғдайдиған кишиләр. Мән ата-аниларға шуни илтимас қилимәнки, әнәнилиримизни қоғдайли, челишиш, оқя етиш, ат чаптуруш вә шуниңға охшаш әҗдадлиримизниң башқа тәнһәрикәтлиригиму игә чиқайли, чүнки биз уларни қоғдап, уларни сақлап қалсақла, бизниң мәвҗутлуқимиз давамлишиду. Бундақ болғанда бирлик, баравәрлик ичидә яшаймиз, кәлгүсигә ишәнч билән қараш үчүн бирлик вә иттипақлиқта чиң туруп җапалиқ ишлишимиз керәк”.
Бу бу паалийәт тоғрисида пикир қарашлири елиш үчүн уйғур мәдәнийитини тонуштуруп көргәзмә ачқан шәрқий түркистан нузугүн җәмийитиниң рәиси мунәввәр өзуйғур ханим билән сөһбәт елип бардуқ.
Мунәввәр өзуйғур ханим бу, уйғурлар ирқий қирғинчилиққа вә мәдәнийәт қирғинчилиқиға учраватқан бир әһвалда әркин дуняда болсиму уйғур мәдәнийитини қоғдап қелиш вә тонуштурушниң муһим икәнликини тәкитлиди.
Мунәввәр өзуйғур ханимниң билдүрүишчә, һәр йили бир қетим өткүзүлүп келиватқан түрк дуняси әнәниви тәнһәрикәт паалийитиниң 6-нөвәтлики бу йил 7-айниң 23-күни өткүзүлгән болуп, буниңдин илгирики йилларда өткүзүлгән паалийәтләргиму шәрқий түркистан нузугум җәмийити қатнишип мәдәнийәт көргәзмиси ечип уйғур мәдәнийитини тонуштуруп кәлгәникән.