Bursa shehiride Uyghur medeniyiti tonushturulup körgezme échildi

Istanbuldin ixtiyariy muxbirimiz arslan teyyarlidi
2023.07.25
turkiye-uyghur=medeniyiti-1.jpg Bursa shehiride échilghan Uyghur medeniyitini tonushturush körgezmidin körünüshler. 2023-Yili 23-iyul, türkiye.
RFA/Arslan

23-Iyul küni türkiyening bursa shehiride échilghan 6-nöwetlik türk dunyasi en'eniwi tenheriket pa'aliyitide Uyghur medeniyiti tonushturulup körgezme qilindi.

Bursa sheherlik hökümet teripidin uyushturulghan bu pa'aliyetni bursa waliy mehkimisi qarmiqidiki medeniyet we sayahet idarisi, türkiye en'eniwi tenterbiye türliri fédératsiyesi, dunya étnik tenheriket fédératsiyesi qatarliq jem'iyet we organlar qollap hemkarlashqan.

Bursa shehiride échilghan Uyghur medeniyitini tonushturush körgezmidin körünüshler. 2023-Yili 23-iyul, türkiye.

Pa'aliyet meydanigha türk tarixida qurulghan 16 türk dölet we impériye simwul qilinip 16 dane chédir tikilgen bolup, Uyghur, qazaq, tatar qatarliq her qaysi milletke birdin chédir bérilgen. Uyghurlargha bérilgen chédirda merkizi istanbuldiki sherqiy türkistan nuzugüm jem'iyiti körgezme échip Uyghur medeniyitini tonushturush pa'aliyiti élip bardi.

Tenheriket pa'aliyitining échilish murasimida söz qilghan bursa sheher bashliqi alinur aqtash ependi birlik-barawerlik hem minglarche yildin buyan hem normal halette hem urush-jenglerdimu dawam qilip kelgen en'eniwi tenterbiyening türk medeniyitining ayrilmas bir parchisi ikenlikini tekitlidi.

Bursa shehiride échilghan Uyghur medeniyitini tonushturush körgezmidin körünüshler. 2023-Yili 23-iyul, türkiye.

U medeniyet we örp-adetlerge ige chiqish kéreklikini tekitlep mundaq dédi: “Büyük bir medeniyetning qimmetlik mirasi bolghan ejdadlirimizning en'eniwi tenheriketlirining bügünki kündiki mewjutluqini saqlap qélish arqiliq, uni kelgüsige miras qaldurushni meqset qilimiz. Téz sür'ette özgiriwatqan dunyada ejdadlirimizning nechche ming yilliq medeniyet, örp-adetlirini eslitish, tonushturush we ögitish bizning mejburiytimizdur. Türk dunyasining qelbi bolghan bursada bügün nechche ming yilliq türk medeniyitining toplan'ghanliqigha shahit bolisiler, bizler medeniyet, örp-adetler, tarixni qoghdaydighan kishiler. Men ata-anilargha shuni iltimas qilimenki, en'enilirimizni qoghdayli, chélishish, oqya étish, at chapturush we shuninggha oxshash ejdadlirimizning bashqa tenheriketlirigimu ige chiqayli, chünki biz ularni qoghdap, ularni saqlap qalsaqla, bizning mewjutluqimiz dawamlishidu. Bundaq bolghanda birlik, barawerlik ichide yashaymiz, kelgüsige ishench bilen qarash üchün birlik we ittipaqliqta ching turup japaliq ishlishimiz kérek”.

Bursa shehiride échilghan Uyghur medeniyitini tonushturush körgezmidin körünüshler. 2023-Yili 23-iyul, türkiye.

Bu bu pa'aliyet toghrisida pikir qarashliri élish üchün Uyghur medeniyitini tonushturup körgezme achqan sherqiy türkistan nuzugün jem'iyitining re'isi munewwer özUyghur xanim bilen söhbet élip barduq.

Munewwer özUyghur xanim bu, Uyghurlar irqiy qirghinchiliqqa we medeniyet qirghinchiliqigha uchrawatqan bir ehwalda erkin dunyada bolsimu Uyghur medeniyitini qoghdap qélish we tonushturushning muhim ikenlikini tekitlidi.

Munewwer özUyghur xanimning bildürüishche, her yili bir qétim ötküzülüp kéliwatqan türk dunyasi en'eniwi tenheriket pa'aliyitining 6-nöwetliki bu yil 7-ayning 23-küni ötküzülgen bolup, buningdin ilgiriki yillarda ötküzülgen pa'aliyetlergimu sherqiy türkistan nuzugum jem'iyiti qatniship medeniyet körgezmisi échip Uyghur medeniyitini tonushturup kelgeniken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.