Түрмә әтрәт башлиқи: “мәһбуслар әмгәк мәйданиға аптомат вә апшаркилар билән ялап елип чиқилиду”
2023.10.05

Керийә түрмисиниң бир әтрәт башлиқи мәһбусларниң әмгәк мәйданиға аптомат вә апшарка итлар билән ялап елип чиқилип, еғир бир тәһдит астида ишқа селинидиғанлиқини ашкарилиди. Илгири керийә түрмисидә җаза өтигән, нөвәттә чәтәлдә яшаватқан бир сабиқ мәһбус, мәзкур түрмидикиләрниң қиш-яз бикар қоюлмайдиғанлиқи, пахта териған мәзгиллиридә қоллири қапирип, һәтта қанап кәткүчә ишқа селинидиғанлиқини ашкарилиди.
Керийә түрмисидә әтрәт башлиқи болуп вәзипә өтигән бир хадим, керийә түрмисидики әмгәк мәйданлирини хитай көчмәнлириниң һөддигә алидиғанлиқи вә уйғур мәһбусларниң ишқа селинидиғанлиқини ашкарилаш билән бирликтә, мәһбусларниң түрмә қорусидин әмгәк мәйданиға һәйвә вә тәһдит билән елип чиқидиғанлиқини баян қилди.
Нөвәттә чәт әлдә яшаватқан, илгири керийә түрмисидә бир мәзгил җаза муддити өтигән бир сабиқ мәһбусму мәһбусларниң түрмә қорусидин һәйвә билән елип чиқилиш арқилиқ, уларниң қечип кетиш яки қаршилиқ көрситишиниң толуқ алди елинидиғанлиқини әскәртти. У йәнә мәһбусларниң әмгәк мәйданидики җапалиқ ишләш вә қаттиқ назарәт қилиниш җәряни һәққидиму мәлумат бәрди. Униң дейишичә, мәһбуслар қиш-яз бикар қоюлмайдикән, һечқандақ иш тепилмиғанда мәһбусларни йәр колаш вә йәр тиндуруш билән мәшғул қилинидикән. Мәһбуслар бу хил еғир ишқа селиниш билән бирликтә меңә чарчитиш шәклидики сиясий өгинишләрму давамлишидикән.
Мәзкур сабиқ мәһбус йәнә мәһбуслар ичидә ашханиға ярдәмләшкүчиләр билән йетип қалған ағриқларниңла әмгәккә селинмайдиғанлиқи, адәттики ағриқларниң болса һарвиға олтурғузуп әмгәк мәйданиға елип чиқилидиғанлиқини ашкарилиди.
Юқириқи түрмә әтрәт башлиқиму өзиниң темитип суғурушқа мәсул болған мәзгилидә, мәһбусларниң химийәлик оғутни қолллири билән чачқанлиқини баян қилиш арқилиқ, әмгәккә селиниватқан мәһбусларниң саламәтлик әһвалиниң қилчә нәзәргә елинмайдиғанлиқини дәлиллиди.
Мәзкур сабиқ мәһбус 2005- вә 2010-йиллар арисида керийә түрмисидә җаза муддити өтигән болуп, у түрминиң кейинки вәзийитини өзидин кейин қоюп берилгән камирдашлири арқилиқ уқуп турған икән. У нөвәттики түрмә мәшғулатлири вә әмгәклириниң буниңдин нәччә һәссә еғир икәнликини илгири сүрди.