“Uyghur melike” erden'ay xelq'ara xanqizlarni tallash hel qilghuch musabiqisining talant türide üchinchi boldi

2023.11.23
Erdenay-02

Uyghur qizi erden'ay wirjiniye shitatining “Aléksandiriye xanqizi” süpitide 2023-yilliq amérika xanqizi we xelq'ara xanqizi tajisini tallash musabiqisige qatnashqan körünüsh. 2023-Yili 21-noyabir, orlando RFA/Gulchehre

Erdenay-03

Uyghur qizi erden'ay wirjiniye shitatining “Aléksandiriye xanqizi” süpitide 2023-yilliq amérika xanqizi we xelq'ara xanqizi tajisini tallash musabiqisige qatnashqan körünüsh. 2023-Yili 21-noyabir, orlando RFA/Gulchehre

Erdenay-04

Uyghur qizi erden'ay wirjiniye shitatining “Aléksandiriye xanqizi” süpitide 2023-yilliq amérika xanqizi we xelq'ara xanqizi tajisini tallash musabiqisige qatnashqan körünüsh. 2023-Yili 21-noyabir, orlando RFA/Gulchehre

Erdenay-05

Uyghur qizi erden'ay wirjiniye shitatining “Aléksandiriye xanqizi” süpitide 2023-yilliq amérika xanqizi we xelq'ara xanqizi tajisini tallash musabiqisige qatnashqan körünüsh. 2023-Yili 21-noyabir, orlando RFA/Gulchehre

Erdenay-06

Uyghur qizi erden'ay wirjiniye shitatining “Aléksandiriye xanqizi” süpitide 2023-yilliq amérika xanqizi we xelq'ara xanqizi tajisini tallash musabiqisige qatnashqan körünüsh. 2023-Yili 21-noyabir, orlando RFA/Gulchehre

Erdenay-07

Uyghur qizi erden'ay wirjiniye shitatining “Aléksandiriye xanqizi” süpitide 2023-yilliq amérika xanqizi we xelq'ara xanqizi tajisini tallash musabiqisige qatnashqan körünüsh. 2023-Yili 21-noyabir, orlando RFA/Gulchehre

2023-Yilliq amérika xanqizi we xelq'ara xanqizi tajisini tallash musabiqiliri 19-noyabirdin 27-noyabirghiche filorida shitatining orlando shehiride ötküzülidu. Amérikining her qaysi shitatliridin we dunyaning bashqa jayliridiki tarmaq musabiqilerdin tallinip chiqqan ikki mingdin artuq mahir “Xanqiz taji” ni kiyish üchün keskin riqabet ichide bu qétimqi hel qilghuch musabiqige chüshti.

Bu noqul haldiki güzellerni tallash musabiqisi bolmastin yash katégoriyesi boyiche töt xil guruppigha ayrilip musabiqige chüshken mahirlar özining uniwérsal talanti, xaraktéri, eng güzel qiyapiti we eng mukemmel ipadisini namayende qilidu. Onlighan telepchan bahalighuchilarning her xil irq we milletlerdin bolghan qizlarning sehne haliti, maslishishchanliqi, özige bolghan ishenchi qatarliq 30 nechche tereptin nomur quyushi bilen tallap chiqilghan “Xanqiz” largha melike taji kiydürülidu. “Xelq'ara xanqizi tajisi” ni talishiwatqan alte yashliq Uyghur mahir erden'ay chimen doppa kiyginiche apisi adalet xanim we newre akisi bilgiyarning hemrahliqida bu musabiqe türlirige qatnishiwatqan bolup, amérikidiki Uyghurlar üchün éytqanda bu türdiki musabiqige qatnashqan tunji, shundaqla birdin bir Uyghur qizi hésablinidu.

 Erden'ay amérikining wirjiniye shitatida tughulghan. Tughulghandin buyan dadisi bilen körüshüp baqmighan alte yashliq erden'ay xelq'araliq sehnilerde özini “Uyghur qizi” dep tonushturdi. Shuningdek eng chong ghayisining dadisini élip kélip a'ilisini jem qilish ikenlikini tesirlik bayan qilip, özining balilarche qeyserliki bilen tamashibinlarni heyran qaldurup kelmekte hemde Uyghurlarning nöwettiki weziyitini janliq anglatmaqta. Apisi adalet xanim amérikigha kélishtin ilgiri Uyghur élidiki muqam ansambilining ussul artisi idi. Amérikaning wirjiniye shitatida turushluq adalet sabit xanim xitay hökümitining Uyghur diyaridiki “Pasport yighiwélish siyasiti” ning qurbanliridin boluwatqan yoldishi ablimit abliz bilen jem bolalmay, yillardin buyan yalghuz ana bolup qizini bir qolluq chong qilmaqta.

2023-Yili awghust éyida adalet xanim qizi erden'ayni “Amérika dölet xanqizi” wirjiniye shitatliq musabiqe rayonidiki musabiqige qatnashturghan. Erden'ay buning aldidiki tallash musabiqiliride riqabetchilirini yéngip, wirjiniye shitatining “Aléksandiriye xanqizi” süpiti bilen amérika dölet xanqizi kandidati salahiyitige érishkenidi. Amérika döletlik we xelq'araliq xanqiz tallash musabiqisining bu yilliq hel qilghuch basquchida erden'ayning 21-noyabir (seyshenbe) künidiki bir künlük pa'aliyitini xatiriliduq.

Özidinmu büyük hékayisi bolghan “Uyghur melike” erden'ay özini bizge “Essalam, men Uyghur melike” dep tonushturdi. Kichikkine, shuningdek yasanchuq we erke qizdek körünidighan bu Uyghur melike her küni seher sa'et altide yuqiri keypiyat bilen ornidin turup musabiqilerge teyyar bolidiken. Bügünki musabiqe etigen sa'et 9:30 din chüshtin kéyin altigiche dawam qilidiken. U bu nöwet wirjiniye shtatining “Aléksandiriye xanqizi” bolush süpiti bilen amérika qoshma shitatliri ösmür xanqizi tallash musabiqe türlirige qatnashqandin bashqa, téximu hayajanliq yéri u “Uyghur melike” dégen namida xelq'araliq xanqiz tajisini talishish musabiqisigimu qatnishidu.

U 21-noyabir bir kün ichide bu ikki katégoriye boyiche yene töt türde maharet körsetti. Mahirlarning sehnide özini qisqiche tonushturushi bilen musabiqe bashlandi. Xuddi chöcheklerdiki barliq melikilerni bir yerge ekélip qoyghandek bu musabiqe meydanida öz shitatlirigha we döletlirige wekillik qilip musabiqige qatnishiwatqan melikiler ichide peqet “Uyghur melike” ning kiyimi, qiyapiti we hékayisi héchkimge oxshimaytti. Shundaqla bashqa mahirlargha ata-anisi we tughqanliri hemrah boluwatqan bolsa erden'ay üchün peqet uning apisi adalet xanimla paypétek bolmaqta idi. Közni qamashturghudek janliq we moda kiyin'gen her xil irq we millettin bolghan melikiler nomur we isim tertipi boyiche bir-birlep sehnige chiqip özlirini tonushturdi. Ulughwar arzu-armanlirini ipadiliship sehnige tizilghan mahirlar qatarida 87-nomurluq mahir erden'ay Uyghur sehnige chiqqanda sehne arqisidiki chong ékranda latinche “UYGHUR” dégen chong xetler peyda boldi. Ap'aq könglekliri bilen qar leylisige oxshap qalghan Uyghur qizi erden'ay mikrofonni qoligha aldi: “Wérjiniye shitatidiki aléksandiriyedin kelgen kelgüsidiki chish doxturi erden'ay Uyghurdin hemminglargha salam. Men alte yashqa kirdim, yeslide oquymen. Méning bekmu ésil apam we dadam bar. Men dadamni bekmu séghindim. Men uning a'ilimizge qaytip kélishi üchün küresh qilimen. ”

“Almidek yürekte alemche söygü” dégendek bu yumran ghunchining xitabi tamashibin we bahalighuchilarni tesirlendürdi. Ular erden'ay sehnidin chüshüp ketküche uninggha méhribanliq neziride hewes qiliship qarap turushti. Qizidin közini üzmey jiddiylishiwatqinini yoshurush üchün külümsirep olturghan adalet xanim bolsa erden'ay sözini tamam qilishi bilenla köz yashlirini toxtitalmidi. “Uyghur melike” erden'aygha medet bérish üchün kelgen hemde orlando shehiride yashawatqan bir qanche Uyghur uni deste-deste güller we sowghatlar bilen oriwélishti.

21-Noyabir küni erden'ay we uning apisi üchün jiddiy we japaliq, shuningdek tolimu hayajanliq bir kün boldi. Musabiqining teleplirige mas halda erden'ay töt qétim kiyim we ayaghlirini, hetta zibu-zinnetlirinimu maslashturup özgertishi kérek idi. Qizil etleslik gaz könglek, qar leylisi köngliki, yéshil yaqut közlük könglek we axirida chécheklerdek halreng köngleklirining hemmisila erden'aygha bekla yarashti. Her qétim u kiyim almashturghanda yéngidin bashqa bir rengde poreklewatqan ghunchigha oxshap qalatti. U eynektiki eksige qarap tatliq bir külümsirep memnunluqini ipadilep qoyghandin kéyin “Uyghur” dep yézilghan melike léntisini yarashturup yan'gha ésishni untup qalmaytti. Artuqche yasalmiliqtin xali, saddiliqi mana men dep körünüp turidighan bu Uyghur melike yumran we siliq xaraktéri bilen bir demdila riqabetchisidin bir qanchisi bilen dostmu bolup qaptu. Uning hékayiliri musabiqige kelgenlerni tesirlendürüptu. Mizuri shitatidin kelgen gram kéysi (Gram Casey) xanim mizuri shitatliq xanqizi bolghan qizi béntili (Bentley) bilen bu musabiqige qatnishish jeryanida erden'ay we uning apisi bilen tonushqan we erden'ayning hékayisidin bekmu tesirlen'geniken.

Mizuri shitatidin kelgen gram kéysi (Gram Casey) xanim mizuri shitatliq xanqizi bolghan qizi béntili (Bentley),  2023-yili 21-noyabir, orlando
Mizuri shitatidin kelgen gram kéysi (Gram Casey) xanim mizuri shitatliq xanqizi bolghan qizi béntili (Bentley), 2023-yili 21-noyabir, orlando
RFA/Gulchehre

Erden'ay bilen qizining omaq külüp oynashlirigha mesliki kélip qarap turghan kéysiy xanim ziyaritimizni qobul qilip mundaq dédi: “Men erden'ay tonushturulghan waraqchini körüp, uning tughulghandin buyan dadisini körüp baqmighanliqini bilgendin kéyin, Uyghurlar duch kéliwatqan ishlargha ishen'güm kelmidi. Bu bekmu qorqunchluq. Buni körgen her qandaq ademning ulargha yardem qilghusi kélidu. Könglüm bek yérim boldi, men ularning bu éghir künlerni qandaq ötküzüwatqanliqini qiyas qilalmaymen. Uning apisi bekmu jasaretlik iken. Hemme teyyarliqni özi yalghuz qiliwatidu. Erden'ay bolsa bekmu chirayliq hem qeyser, yéqimliq bir qiz. U dadisini aghzidin chüshürmeydu, u téxi bala. Emma uning qeyserlikige heyran qaldim. Uning özining yéshigha mas bolmighan bu éghir külpetlerge uchrishi ajayip bir naheqchilik. Héchkimning, bolupmu her qandaq bir sebiyning béshigha bundaq künler kelmesliki kérek idi” .

Hel qilghuch musabiqisige qatnishiwatqan hemme mahirlar we ata-anilar bügünki pa'aliyet kün tertipining eng axirqi basquchida oxshash bir zalgha yighildi. Xelq'araliq ösmürler xanqizni tallash jiddiy dawam qiliwatqan deqiqilerde aldinqi kündiki musabiqilerning netijilirimu élan qilindi. Erden'ay 5-nöwet musabiqe üchün emes, belki mukapat tapshuruwalghili sehnige chiqti. Erden'ay ösmür xanqizlarning talant türide 3-chilikni qolgha keltürgen mahir süpitide lewheni tapshuruwaldi. U 20-noyabir küni ösmür xanqizi tallash musabiqisining talant körsitish türide apisi ögetken “Chimen doppa” dégen Uyghurche usulni oynighan idi. Adalet xanim hayajanliq köz yashlirini sürtüwétip “Uf. . . Emdi ziyaritinglarni qobul qilay” dédi.

Adalet xanim bu heqte toxtilip “Xelq'ara xanqizlarni tallash musabiqisige chüshüwatqan erden'ay musabiqilerde özining ichki güzellikini namayan qilishni, méhir-muhebbetni etrapigha yetküzüshni, shuningdek kishilik hayatqa toghra qarash, özige oxshash ata-anisidin ayrilip yashawatqan Uyghur balilirining awazini anglitishni arzu qilidu؛ u yene barliq Uyghur balilirigha ‛men qilalidim, sizmu qilalaysiz‚ dégen xitabni yetküzüshni, qiyinchiliqning héchqachan bizni yiqitalmaydighanliqi, eksiche bizni téximu mukemmel qilip tawlap chiqidighanliqini bildürüshni xalaydu” deydu.

“Bu musabiqiler jeryanida siz hés qilghan eng muhim nerse néme? ” dep sorighinimizda u “Biz yalghuz emeskenmiz. Biz Uyghurlar yalghuz emeskenmiz” dédi. Bu musabiqilerde mahirlarning utup chiqishida ularning musabiqilerdiki netijiliridin bashqa torda bilet tashlash türide érishken qollash sanimu halqiliq rol oynaydiken. Qanche köp bilet tashlansa utush éhtimali shunche yuqiri bolidiken.

Bu qétimqi musabiqining tordin bilet tashlash basquchi 20-noyabir axirlashqan. Erden'ay 27-noyabirghiche yene xelq'ara sewiyediki bu xanqizlarni tallash musabiqisi sehniliride oxshimaydighan türler boyiche musabiqilerge qatnishidu. Uyghurlargha wekillik qilip bu musabiqige qatnashqan erden'ay yalghuz özi üchün emes, belki xitay teripidin a'ilisi parchilan'ghan hemde a'ile judaliqining derdini tartiwatqan yüz minglighan Uyghur sebiyliri, shuningdek irqiy qirghinchiliqning qurbanigha ayliniwatqan Uyghurlar üchün jasaret körsetmekte. U mushu bir kün ichidila töt qétim Uyghurlargha wekillik qilip sehnige chiqti we töt qétim sehnining chong ékranida “Uyghur” dégen xetlerni julalatti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.