Атуш буғра сода шәһәрчисиниң қурғучиси, милярдер иминҗан рәһмитулламу 20 йиллиқ кесилгән

Мухбиримиз шөһрәт һошур
2021-06-08
Share
Атуш буғра сода шәһәрчисиниң қурғучиси, милярдер иминҗан рәһмитулламу 20 йиллиқ кесилгән Җәмийәттә "атуштики сода-карханичиларниң сәркиси" дәп билингән вә хәйр-сахавәт ишлиридики кәң қоллуқи билән тонулған карханичи иминҗан рәһмитулла әпәнди. (Орни вә вақти ениқ әмәс)
Oqurmen teminligen

Җәмийәттә "атуштики сода-карханичиларниң сәркиси" дәп билингән вә хәйр-сахавәт ишлиридики кәң қоллуқи билән тонулған карханичи иминҗан рәһмитулла бу йил априлниң дәсләпки һәптиси сотланған вә өткән айниң дәсләпки һәптиси 20 йиллиқ кесилгәнлик һөкүм қәғизи қолиға тутқузулған. Норвегийәдики "уйғуряр фонди" тәрипидин қолға чүшүрүлгән бу учур мухбиримизниң атуштики алақидар идарә-органларға қарита елип барған телефон зиярәтлири давамида дәлилләнди.

Норвегәйдики "уйғуряр фонди" қолға чүшүргән атуштики 4 нәпәр милярдерниң алдинқи айда сотлинип кесилгәнлики һәққидики учурда булардин бирниң атуш буғра сода шәһәрчисиниң қурғучиси, қәшқәр чәлқаралиқ чоң базарниң қурғучилиридин бири иминҗан буғра икәнлики тилға елинған. Паалийәтчи абдувәли аюп тәйярлиған "тутқундики сода-карханичилар архипи" дин мәлум болушичә, 1962‏-йили туғулған вә шинҗаң малийә ониверситетини пүттүргән иминиҗан рәһмитулла сода һаятини мевә-чевә тиҗаритидин башлиған. У йеза-игилик материяллири ишләпчиқириш вә сетишни асас қилған, кейинки йилларда атушта буғра сода шәһәрчиси, қәшқәрдә башқилар билән бирликтә хәлқара чоң базарни қуруп, уйғур райондики сода-карханичиларниң сәркилиридин биригә айланған. Дейилишичә, униң илкидә 9 ширкәт бар болуп, у бирқанчә саһәдә тиҗарәт қилиш билән бирликтә, җәнубтики вилайәтләрниң йеза-игилик мәһсулатларни оттура асия базарлириға йүзләндүрүштә йетәкчилик рол ойниған.

Уйғур җәмийитини бәлгилик санда иш пурсити билән тәминләп келиватқан бу сәркә карханичиниңму 2018 ‏-йилиниң ахирида бешиға қара халта кийдүрлгән. Икки йилдин артуқ аталмиш "инчикә тәкшүрүш" тин кейин, у 20 йиллиқ қамақ җазасиға һөкүм қилинған. Атуштики оттура сот мәһкимисиниң хадими иминҗан рәһмитулла делоси һәққидиму телефонда мәлумат берәлмәйдиғанлиқини баян қилди, әмма униң сотланғанлиқини инкар қилмиди.

Абдувәли аюпниң дейишичә, иминҗан рәһмитулланиң тутулушидиму уйғур райондики мутләқ көп сандики сода-карханичиларға охшашла, униң хәйр-сахавәт ишлиридики кәң қоллуқи сәвәп болған икән. Униң билип яки билмәй мал-мөлкиниң закитини бериши давамида сиясий мәһбусларниң тул қалған аяли яки йетим пәрзәнтлиригә пул ианә қилиши, "терорчиларни қоллаш" вә "терорлуққа тәйярлиқ қилиш" дәп әйибләнгән. Иминҗан рәһмитулла хитай компартийәсигә яш вақитлирда киргән вә әзалиқ мәҗбурийитини һәм ада қилип кәлгәнлики үчүн, мәмликәтлик сода санаәтчиләр бирләшмисиниң иҗраийә әзаси қатарлиқ бир қатар символлуқ вәзипиләр берәлгән-ю, лекин 2017‏-йилға кәлгәндә зәрбә нишанидин чәттә қалалмиған.

Қизилсу областлиқ оттура сот мәһкимисиниң хадими иминҗан рәһмитулла делосиниң сәзгүр делолар икәнликини тәкитлиди. Бу хадимму иминҗанниң сотланған вә кесилгәнликини инкар қилмиди.

"тутқундики сода-карханичилар архипи" да дейилишичә, иминҗан рәһмитулла билән бирликтә униң сиңлиси нургүл рәһмитулла вә бир қизиму тутқун қилинған. Җәмийәт параңлирида иминҗан рәһмитулланиң сорақ җәряндики қейин-қситақлар нәтиҗисидә қизиниң қоюп берилиши бәдилигә бир қатар аталмиш "җинайәт" ләрни бойниға алған. Атушта сиясий қанун саһәсидә ишләватқан бир хадим април ейида сотланған мәшһур 4 карханичидин бириниң иминҗан буғра икәнликини тилға алди. Иминҗан рәһмитлла қурған сода шәһәрчисидә униң "буғра замавнивий сода базири" намида икки бинаси барлиқини, бу биналарниң у сотланғанға қәдәр тиҗаритини давам қилғанлиқини баян қилған бу хадим, иминҗанниң 20 йиллиқ кесилгәнликини дәлиллигән болсиму, әмма униң сиңлиси нургүл вә қизиниң тәқдири һәққидә мәлумат берәлмиди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт