Atush bughra soda sheherchisining qurghuchisi, milyardér iminjan rehmitullamu 20 yilliq késilgen

Muxbirimiz shöhret hoshur
2021-06-08
Share
Atush bughra soda sheherchisining qurghuchisi, milyardér iminjan rehmitullamu 20 yilliq késilgen Jem'iyette "Atushtiki soda-karxanichilarning serkisi" dep bilin'gen we xeyr-saxawet ishliridiki keng qolluqi bilen tonulghan karxanichi iminjan rehmitulla ependi. (Orni we waqti éniq emes)
Oqurmen teminligen

Jem'iyette "Atushtiki soda-karxanichilarning serkisi" dep bilin'gen we xeyr-saxawet ishliridiki keng qolluqi bilen tonulghan karxanichi iminjan rehmitulla bu yil aprilning deslepki heptisi sotlan'ghan we ötken ayning deslepki heptisi 20 yilliq késilgenlik höküm qeghizi qoligha tutquzulghan. Norwégiyediki "Uyghuryar fondi" teripidin qolgha chüshürülgen bu uchur muxbirimizning atushtiki alaqidar idare-organlargha qarita élip barghan téléfon ziyaretliri dawamida delillendi.

Norwégeydiki "Uyghuryar fondi" qolgha chüshürgen atushtiki 4 neper milyardérning aldinqi ayda sotlinip késilgenliki heqqidiki uchurda bulardin birning atush bughra soda sheherchisining qurghuchisi, qeshqer chelq'araliq chong bazarning qurghuchiliridin biri iminjan bughra ikenliki tilgha élin'ghan. Pa'aliyetchi abduweli ayup teyyarlighan "Tutqundiki soda-karxanichilar arxipi" din melum bolushiche, 1962‏-yili tughulghan we shinjang maliye oniwérsitétini püttürgen iminijan rehmitulla soda hayatini méwe-chéwe tijaritidin bashlighan. U yéza-igilik matériyalliri ishlepchiqirish we sétishni asas qilghan, kéyinki yillarda atushta bughra soda sheherchisi, qeshqerde bashqilar bilen birlikte xelq'ara chong bazarni qurup, Uyghur rayondiki soda-karxanichilarning serkiliridin birige aylan'ghan. Déyilishiche, uning ilkide 9 shirket bar bolup, u birqanche sahede tijaret qilish bilen birlikte, jenubtiki wilayetlerning yéza-igilik mehsulatlarni ottura asiya bazarlirigha yüzlendürüshte yétekchilik rol oynighan.

Uyghur jem'iyitini belgilik sanda ish pursiti bilen teminlep kéliwatqan bu serke karxanichiningmu 2018 ‏-yilining axirida béshigha qara xalta kiydürlgen. Ikki yildin artuq atalmish "Inchike tekshürüsh" tin kéyin, u 20 yilliq qamaq jazasigha höküm qilin'ghan. Atushtiki ottura sot mehkimisining xadimi iminjan rehmitulla délosi heqqidimu téléfonda melumat bérelmeydighanliqini bayan qildi, emma uning sotlan'ghanliqini inkar qilmidi.

Abduweli ayupning déyishiche, iminjan rehmitullaning tutulushidimu Uyghur rayondiki mutleq köp sandiki soda-karxanichilargha oxshashla, uning xeyr-saxawet ishliridiki keng qolluqi sewep bolghan iken. Uning bilip yaki bilmey mal-mölkining zakitini bérishi dawamida siyasiy mehbuslarning tul qalghan ayali yaki yétim perzentlirige pul i'ane qilishi, "Térorchilarni qollash" we "Térorluqqa teyyarliq qilish" dep eyiblen'gen. Iminjan rehmitulla xitay kompartiyesige yash waqitlirda kirgen we ezaliq mejburiyitini hem ada qilip kelgenliki üchün, memliketlik soda sana'etchiler birleshmisining ijra'iye ezasi qatarliq bir qatar simwolluq wezipiler bérelgen-yu, lékin 2017‏-yilgha kelgende zerbe nishanidin chette qalalmighan.

Qizilsu oblastliq ottura sot mehkimisining xadimi iminjan rehmitulla délosining sezgür délolar ikenlikini tekitlidi. Bu xadimmu iminjanning sotlan'ghan we késilgenlikini inkar qilmidi.

"Tutqundiki soda-karxanichilar arxipi" da déyilishiche, iminjan rehmitulla bilen birlikte uning singlisi nurgül rehmitulla we bir qizimu tutqun qilin'ghan. Jem'iyet paranglirida iminjan rehmitullaning soraq jeryandiki qéyin-qsitaqlar netijiside qizining qoyup bérilishi bedilige bir qatar atalmish "Jinayet" lerni boynigha alghan. Atushta siyasiy qanun saheside ishlewatqan bir xadim april éyida sotlan'ghan meshhur 4 karxanichidin birining iminjan bughra ikenlikini tilgha aldi. Iminjan rehmitlla qurghan soda sheherchiside uning "Bughra zamawniwiy soda baziri" namida ikki binasi barliqini, bu binalarning u sotlan'ghan'gha qeder tijaritini dawam qilghanliqini bayan qilghan bu xadim, iminjanning 20 yilliq késilgenlikini delilligen bolsimu, emma uning singlisi nurgül we qizining teqdiri heqqide melumat bérelmidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet