Түркийәдин норвегийәгә келивалған уйғур мусапирлар хатирҗәмликкә еришкән

Ихтиярий мухбиримиз әкрәм
2021-09-27
Share
Әнглийәдики йәһудийлар оргини түркийәдики уйғурлар үчүн һәрикәткә өтти "дуня йәһудийларға ярдәм бериш оргини" түркийәдики уйғур мусапирлири үчүн елан қилған мураҗиәтнамәсигә ишлитилгән сүрәт. 2021-Йили апрел.
Social Media

Қисқиғинә икки һәптә ичидә 100 дин артуқ уйғур мусапир түркийәдин айрилип, норвегийәгә келип сиясий панаһлиқ тилигән.

100 Дин артуқ уйғурниң икки һәптә ичидә түркийәдин норвегийәгә келип хатирҗәмликкә еришкәнлики норвегийәдики йәрликләр үчүн бир йеңилиқ болған болса, норвегийәдики уйғурлар үчүн һәм бу мусапир уйғурларниң өзлири үчүн зор хушаллиқ болған.

Норвегийәдә яшайдиған д у қ ниң тәптиши пәрһат яқуп әпәндиниң билдүрүшичә, қисқиғинә икки һәптә ичидә 100 дин артуқ уйғурниң түркийәдики хитай тәһдитидин қутулуп норвегийә саламәт йетип кәлгәнлики вә хатирҗәмликкә еришкәнлики норвегийәдики уйғурларни көп сөйүндүргән. У сөзидә, бу уйғур мусапирлириниң һазир корона синиқи мәзгилидә туруватқанлиқини, пат арида һөкүмәтниң уларни охшимиған районларға тәқсим қилидиғанлиқини тилға алди.

Уйғур мусапирлири норвегийәгә қәдәм басқандин кейинла норвегийәдики уйғурлар уларни йоқлап берип һал сориған. Норвегийә уйғур комитетиниң рәиси, "уйғур әдлийәси архип амбири" ниң мудири бәхтияр өмәр әпәнди бу һәқтә тохталғанда, бу мусапир уйғурларниң түркийәни тәрк етип норвегийәгә келишидики асаслиқ сәвәбниң түркийә билән хитай оттурисида имзаланған "җинайәтчиләрни өткүзүп бериш келишими" ниң тәһдитидин қутулуш икәнликини тәкитлиди.

Корона синиқи мәзгили ахирлашқучә вә сиясий панаһлиқ рәсмийәтлири беҗирилип болунғучә бу мусапир уйғурларниң сиртқа чиқиши, ахбаратниң зияритини қобул қилиши вақтинчә чәкләнгәникән. Шундақтиму, биз васитилик һалда уларниң авазини аңлаш пурситигә ериштуқ. Түркийәдин кәлгән бир ханим өзлирини һәр түрлүк усулларда йоқлап турған норвегийәдики уйғурларға болған миннәтдарлиқини ипадә қилди. Исмини ашкарилашни халимиған йәнә бир әрму норвегийәдики уйғур қериндашлириниң ғәмхорлуқидин көп мәмнун болғанлиқини тәкитлиди.

Бирдинла 100 дин артуқ уйғур мусапирниң норвегийәгә келип сиясий панаһлиқ тилигәнлики норвегийә ахбарат саһәсиниңму диққитини тартқан. Норвегийәниң "күндилик гезит" иниң муһәррири кари фуре ханим бу һәқтә елан қилған "уйғурлар сәкрәп чүшивалғанда" намлиқ мақалисидә, түркийәдин кәлгән бу мусапир уйғурларниң башқа йәргә баридиған айропиланға олтуруп, айропилан норвегийәдә тохтиғанда "сәкрәп чүшивалған" лиқини әскәртиду. Андин буларниң дәрди бар бир хәлқниң әзалири икәнликини, уларниң қовми-қериндашлириниң хитайниң җаза лагерлирида азаб тартиватқанлиқини, өзлириниңму хитайға қайтурулуп лагерларға кирип қалмаслиқи үчүн түркийәдики хитай тәһдитидин қечип норвегийәгә келип панаһлиқ тилигәнликини тәкитләп өткәндин кейин, норвегийә һөкүмитидин бу уйғурларниң норвегийәдә яшишиға йол қоюшини, уларниң дәрдини чүшинишини тәләп қилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт