Birinchi qétimliq Uyghur ayallar ilim chéyi istanbulda ghelibilik ötküzüldi

Ixtiyariy muxbirimiz azigh
2021-06-18
Share
Birinchi qétimliq Uyghur ayallar ilim chéyi istanbulda ghelibilik ötküzüldi Risalet tursun abduqadir damollamning exlaq chüshenchisi namliq maqalisini oqumaqta. 2021-Yili 12-iyun, istanbul.
RFA/Azigh

Uyghur jem'iyiti siyasiy jehettin qattiq basturuluwatqan bügünkidek künde, mutexessisler künséri ötkürlishiwatqan ijtima'iy mesililerge ünümlük hel qilish charisi tépishning zörüriyitini tekitlimekte.

Uyghur jem'iyitidiki ayallarning orni, ayallarning ma'arip, xizmet we siyasiy jehettin barawer pursetke érishish mesilisi muhajirettiki Uyghur jem'iyitidimu muhim nuqta bolup kelmekte.

12-Iyun küni istanbuldiki Uyghur ayallirining teshkillishide ilim chéyi pa'aliyiti ötküzülgen bolup, pa'aliyette abduqadir damollamning idiyesi we otturigha qoyghan pikirliri tepsiliy muhakime qilin'ghan.

Pa'aliyetke meghpiret kamal, amine sedef, risalet tursun qatarliq istanbuldiki Uyghur ziyaliyliri qatnashqan bolup, qatnashquchilar abduqadir damollamning hayati, exlaq chüshenchisi, wetenperwerlik we ayallar heqqidiki qarashliri toghrisida teyyarlighan maqalilirini oqup ötken.

Amine sedef xanim

Mezkur pa'aliyetning teshkillinishide muhim rol oynighan istanbuldiki Uyghur ziyaliysi we pa'aliyetchi amine sedef xanim ziyaritimizni qobul qilip, ilim chéyini abduqadir damollam témisi bilen bashlashning sewebi heqqide toxtaldi.

Xitayning Uyghur a'ililirini parchilash we qirghinchiliq siyasetliri seweblik Uyghur jem'iyitide nurghun ijtima'iy krizislarning peyda boluwatqanliqi otturigha qoyuluwatqan bolup, Uyghur ayallirining ijtima'iy ornini östürüsh, ayallarni terbiyelesh we ishqa orunlashturush mesilisi nöwette türkiyediki Uyghur jem'iyitidiki muhim mesililerning biri hésablinidiken.

Mutexessisler her xil ijtima'iy we medeniyet pa'aliyetliridin paydillinip ayallarni terbiyelesh we yétishtürüshning muhimliqini tekitlimekte.

Mezkur pa'aliyetning teshkillinishi we ötküzülüshide muhim rol oynighan shiwétsiyediki Uyghur ziyaliyliridin abdushükür muhemmet qumtur ependim ziyaritimizni qobul qilip, bu pa'aliyetning roli we meqsiti heqqide tepsiliy toxtaldi.

Doktoranit risalet tursun xanim ziyaritimizni qobul qilip bu xil ilim chaylirining köplep ötküzülüshining ayallarning turmush we ma'arip sewiyesini östürüshke, özide bolghan iqtidarlarni jari qildurushqa we ayallarning özige ishinishini östürüshke intayin paydiliq ikenlikini éytip ötti.

Bir qisim Uyghur ziyaliyliri türkiyediki Uyghur jem'iyitide yüz bériwatqan ijtima'iy mesililerni hel qilish üchün her xil medeniyet-sen'et pa'aliyetlirini uyushturushning muhim rol oynaydighanliqini ilgiri sürüp kelmekte. Ular medeniyet-sen'et pa'aliyetliri arqiliq yüz bériwatqan ijtima'iy mesililerni chongqur analiz qilghili, siyasiy we ijtima'iy mesililer shekillendürüwatqan bésim we psixik mesililerni medeniyet-sen'et we her xil ijtima'iy pa'aliyetler arqiliq hel qilghili bolidighanliqini bildürüshmekte.

Közetküchilerning qarishiche, ayallar hoquqi we ayallarning ornini östürüsh mesiliside jem'iyetning téximu sezgür we téximu angliq bolushi, Uyghur jem'iyitining mewjutluqi we tereqqiyati üchün muhim rol oynaydiken.

Risalet tursun xanim ziyaritimiz dawamida, ayallarning jem'iyettiki ornini östürüsh, a'ile zorawanliqi mesilisi heqqide jem'iyetni terbiyelesh, ayallarning qanuniy jehettin özini qoghdishini kapaletlendürüsh qatarliq mesililerde konkrét xizmetlerning élip bérilishi kéreklikini éytti.

Közetküchilerning qarishiche, xitayning qirghinchiliq siyasiti seweblik türlük ijtima'iy krizislargha yoluquwatqan Uyghur jem'iyiti pütün dunyada milliy mewjutluqini qoghdash we medeniy bir jem'iyet qurush yolida tirishchanliq körsitip kelmekte iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet